وێرەگاو ئارۆی، هۆڵوو ڕێکوزیاو ئازادبییەینە شاروو سلێمانی-ینە، بە بەشداریی چندین میدیا و ڕۆشنویرێ و ژینگەپارێزنێ و مامۆسێ زانکۆی، دیبەیتێوە پەی  دەسەو گۆیژەی بپارێزنەی، بە مەبەستوو ڕاگێریکەردەی جە پاشێلکارییە ژیوگەییەکا هەرێموو کوردستانینە و بەتایبەت کەشوو گۆیژەینە ڕێک وزیا.

دلێنەو دیبەیتەکەی بە یەرێ بابەتێ دەسش پەنە کەرد پی ناموونیشانە:

یەکەم: پیسبییەی هەواو شارەکا و خراپیای تەندروسیی هاموەڵاتا- یەریڤان شاسوار- کۆڵیاروو بواروو کوالیتیی هەوای.

دووەم: کاریگەری ژیوگەیی و کۆمەڵایەتی دەسکاریکەردەیە ژیوگەییەکا شاروو سلێمانی - د.فازیل لاوە، پسپۆڕوو بەشوو جیۆلۆجیی زانکۆو سلێمانی.

یەرەم: ئانە کە سلێمانیینە مگوزەریۆ چێشا غەڵەتەکەش– یاسین ئافتاو – نویسەر و ڕۆشنویر.

 بابەتی ئەوەڵنە یەریڤان شاسوار ئاماژەش دا، سەوزایی و ژیوگەی شاروو سلێمانی جە کوالیتییە جیهانییەکا فرە کەمتەرا و بەردەوام بەرەو کەمبییەیوەیچ ملۆ و ئینەیچە پاسە مکەرۆ سەروو هاموەڵاتا زیاتەر بۆ و واتیچش: " پەی حەرکەسێو چی شارەنە پێویسما بە نۆ مەتر دووەجا سەوزایی هەن و ئا بڕە هەنما تەنیا یەرێ مەترێ دووەجان، ئینەنە ئا کوالیتییە کە ماچانێ نزیکا جە ستانداردی جیهانییوە ."

ئینجا دکتۆر فازیل لاوە، ئاماژەش پانەیە دا، کە ئی دەسکاریکارییە جیۆلۆجییانە کاریگەرییش هەن هەم سەروو ژیوگەی جە ڕووەو پەرەسانای زەمینیوە، هەمیچ کاریگەرییش هەن سەروو تێکدای کولتووری و بواری کۆمەڵایەتی خەڵکێوە، کە لە ژیوگەیێوی کەشینە مژیوانێ و وەنەشا تێک مدریۆنە.

بابەتی یەرەمنە یاسین ئافتاو ئاماژەش دا پانەیە، کە ئانە سلێمانیینە مگوزەریۆ جە ڕووەو دۆخی تەندرووستییوە فرە خراپ مگنۆوە و یۆ جە نیشانەکاش، زیادبییەی شێرپەنجەین و بە دۆخێوی خەتەرش قەڵەم دا.

 واتیچش کەدەسەو گۆیژەی بپارێزنەی هەرمانێ و چالاکییشا بەردەوام مبۆنە و نمەمدرانێ  و پەی ڕاگێریکەردەی چا سیاسەتەیە دەسوو سەرمایەداراوە سەروو ژیوگەو سلێمانی میاونیۆ یاگێ.

ئاخروو پانێڵەکێنە ڕەخنە و وەڵێنیار و قسێ ئامادەبییا ورگیریا و جواب دریاوە.

ماوێوا پەرسەو دەسکاریکەردەی و شێونای کەشوو گۆیژەو سلێمانی و وەشکەردەی بیناو ئەرەنیشتەی کەشەکەوە کاردایوە جادەیش شۆنیوە بێ و بە چالاکیێ جیاجیێ ناڕەزایەتیێ  دژش مکریانێ.