جە مەنتیقەو سلۆپو شەرناخی، ناوەندوو چاندی و هونەرو شارەوانی سلۆپی کۆرسو فێربیەی زوانو کوردیش کەردۆ. هامسەرۆکا شارەوانی سلۆپی، پەرلەمانتارێ شارەکەی و ڕێکوزیێ سەندیکاو کرێکارا جەماوەری (کەسک)ی و کۆمەڵەو مافناسا پەی ئازادیی (ئیهەدە) و چنین هاموڵاتی بەشدارێ کۆرسەکەی بیێ. خۆنکارێ ومامۆسێ کوردی و بەشداربیا بە جلوبەرگی کوردیۆ بەشداریشا کەرد.

مامۆساو زوانو کوردی موسلم ئەرگین سەرنجش وست سەرو گرنگی زوانی و ئەرەیاوناش ئی هەنگامێشە پەی خزمەتو زوانی کوردی گێرتەن وەر گەل پێشوازیێوە گەرمش جە هەنگامەکا کەردەن و فرەو کەسی پەی فێربیەی زوانو کوردی سەردایشا کەردێنێ، واتش: "ئینەیچ  هۆشیاری گەلەکەیما بەروزۆ دەربارەو چاندی و زوانو وێش".

موسلم ئەرەیاوناش ئاخروو هەر حەفتێوەنە پەروەردەو زوانو کوردی مرا و داواش جە گردی کەرد سەردایشا کەرا و وێشا فێرو زوانو کوردی بکەرا.

دماتەر مامۆساو کوردی ئایدن دەنیز ئەرەیاوناش ٨ ساڵێ چێوەڵی ڕێکوزیاکەما بە نامێ کوردی-دەری وزیارە، ئارۆ جەسایەو شارەوانییەکا وێماوە تاومێ کۆرسو زوانو کوردی کەرمێوە و، واتش: "ئینە دڵوەشی و شانازیێوە گەورەن . ئێمە واچمێ گرد روێما کوردی و کوردەوارییا. زوانو کوردی ئنە دەوڵەمەنا ئارۆ جە ئاستو جیهانینە جە پلەو دەیەمی وینریۆ. بەڵام داخەم مەشۆ هەڵای نازتەنشا بۆ بە زوانی ڕسمی. بەڵام وەعد مدەیمێ با سەرمەشقو قارەمانا کە بەپاو دەرفەتو وێشا خزمەتو زوانو کوردیشا کەردەن و یاونانشا بە ئارۆی، ئێمە زوانو وێما جەویر مەکەرمێ و درێژە بە ئەرەکۆشای مدەیمێ".

دماتەر پەروەردەو زوانو کوردی دەسش پنە کەرد. جەدمادماینە کەردەیۆ کۆرسو زوانی کوردی بە هۆرپڕایۆ مبارەک کریا.