ماڵپەڕو میزانی، ماڵپەڕی ڕەسمی دەسەڵاتوو دادوەری ئێرانین وەڵاش کەردۆ، بەمەڵامەتوو داواکاری ژمارېوە جە مامۆسایا ئایینی سوونەیۆ، لووایۆ پۊرەی پەی سزاو جە قەنارەدای مامۆسا محەمەد خزرنەژادی مامۆسای ئایینی خەڵکوو شارو بۆکانی کریان و سزاکېش فاڕیېنە پەی زیڼانی هەتاهەتایی.

ئینەیچ دماو ئانەی مۍ کە جە ڕووانی ۋییەردەنە هەواڵوو ئانەی وەڵاکریاوە، کە دیوانوو باڵاو دادوەری ئێرانی سزاو جە قەنارەدای ئا مامۆسا ئایینیەیشە پەسەنڎ کەردەن.

محەمەد خزرنەژاد ١٩/١١/ ٢٠٢٢ دماو بەشداریش جە تەعزیەو ئەسعەد رەحیمینە یۆ جە گیانبەخشایا سەرهۊردای ژەنۍ، ژیۋای، ئازاڎیی جە بۆکان و شەرمەزارکەردەی کوشتار و تنووتیژی هێزەکا دەسەڵاتی وەرا ۋەر بە ۋېنیشاندەرانە گیریا.

دماو زیاتەر جە یەرۍ مانگا مەنەیۆ جە زینانوو ئیتلاعاتوو ورمێنە ئا مامۆسا ئایینیە فاڕیاوە پەی زینانوو ورمێ و دماو ١٤ مانگا جەگېرتەیش جە تەرەفوو دادگاو شۆڕشیۆ جە ورمێ سزاو جە قەنارەدای و ١٦ ساڵا زینانیش سەرەرە سەپیا.

پېسە تۆڕەو مافەکا مرۆڤوو کوردسانی وەڵاش کەردەبېوە، جە وەختوو فاڕایۊیشەنە پەی زینانوو ورمێ ئاسەوارو ئەشکەنجەی جەسڎەشۆ ۋینیان و جە ئەرەنیشتەو دادگایچەنە کە بە بێ پارێزنەر لوواڕاوە، تەماموو تۆمەتەکاش ڕەڎۍ کەردێنېوە و ئەرەیاۋنانش، کە چېرو ئەشکەنجەینە ناچار بە دڎان نیایپۊرە بە تاوانێوەرە کریان کە ئەنجامش نەڎان.

جە مانگەو شوباتوو ٢٠٢٣ېنە ٢٤٠ مامۆسۍ ئایینیۍ سوننۍ جە نامېوەنە پەی دەسەڵاتی دادوەری سەرەڕاو ڕەڎکەردەیۆ تۆمەتەکا سەرو مامۆسا محەمەد خزرنەژادی پەشتیوانی ۋېشا پەی ئا مامۆسا ئایینیە بەربڕیەبۍ، حەرپاسە داواشا کەردۍ بۍ دەموودەس سزاکېش هۊرە بشنیۊوە.