٥٤ ساڵۍٚ جەی وەڵتەر، ڕۊو چوارشەمەی ١٥و ئایار (مەی)و ساڵەو ١٩٦٨، وەرانوەر بە ( ٢٥و پاژەرەژو ١٣٤٧ی وەرەتاوی)، بنەماڵە دەسەڵاتدارەکەو بارزانی تاوانیوی تەرش وست سەرو خەرمانو تاوانەکاش و بە فەرمان و سەرپەرشتی (مەلا موستەفا بارزانی)، سەرکەردەی دیار و نامی وەرکەوتو کوردستانی (سولەیمان موعینی ئەشناسیا بە فایق ئەمین) و شۆڕشگێڵ (خەلیل مستەفازادە ئەشناسیا بە خەلیل شەو باش)، دڕندانە و بێبەزەیانە کوشیۍٚ و شۆنیشەرە دوور جە گرد مۆراڵ و نەریتێوی کوردەواری و ئانزانی، تەرمەکێشان تەسلیمۍٚ ڕژێمو حەمەڕەزاشای کریێوە.

تەرمو موعینی، تەسلیم بە جەنەراڵ بەیاتی بەرپرس جە دەستگاو ساواكی کریاوە و ساواک پەی چەمتەرسنای خەڵکی چەنڎ ڕۊۍٚ شارەکانو وەرکەوتو کوردستانیەرە گێڵناشان.
بەڵام ئا کەردە دژە کورد و ئانزانیە ناڕەزایەتی خڵکیش ونەکەوتەوە و ڕژێمو شاهنشاهی حەمەڕەزای ناچار کریا تەرمەکەیش تەسلیم بە بە بنەماڵەکەیش بکەرۆنەوە و جە ئارامگەو بوداق سوڵتان-و مەهابادی بە ڕاوڕەسمی جەماوەریی گەورە ئەسپەردە بکریۆنە.

تەسفییەکەردەی سولەیمان موعینی ئەشناسیا بە( فایق ئەمین) و خەلیل مستەفازادە ئەشناسیا بە(خەلیل شەو باش)ی، دمایین تاوان و کەردەی دژەکوردی نەبۍٚ کە بنەماڵە دەسەڵاتدارەکەو بارزانی بەسەرۆکایەتیی مەلا مستەفای بارزانی و کوڕەکێش  ئیدریس و مەسعود-ی، ئەنجام دابۆنە، بەڵکو شونیشەرە جە (مەلا ئاوارە، سەدیق ئەنجیری ئازەر)یەوە بگێرە تا سەرکەردە و کۆشەری دیار و نامی (دکتۆر سەعید قرمزی تۆپراک ئەشناسیا بە دکتۆر شوان) و مەرگەساتەکەو هەکاری و کۆمەڵکوشی هەولێری سەدان سەرکەردۍٚ کۆشەرۍٚ ڕاگاو ئازادی هەر چوار بەشۍٚ کوردستانی دڕندانە کوشیێنۍٚ و تەسفییەکەردێنۍٚ.