تووڕەیی خەڵکوو سەرنیشت و وەرکەوتوو سوریای دژوو هجوومە ئەرەگیرکارییەکا زیاتەر مبۆ
خەڵکوو سەرنیشت و وەرکەوتوو سوریای دژوو هجوومە ئەرەگیرکارییەکاو دەوڵەتوو تورکیای پەی سەروو هەرێمەکەی شەرمەزار کەرد و هەوڵەکاش پەی تێکدای ورچنیەیەکا زیاتەر مبۆ.
وەرپەرساو دەوڵەتی ئەرەگیرکەروو تورکی چەنی نزیکبییەیوە ورچنیەی شارەوانییەکاو ١١و حوزەیرانی، هەڕەشێ و هجوومەکێشا پەی سەروو هەرێمەکەی زیاتەرێ با.
دەوڵەتوو تورکی هیزی بە فڕۆکەی بێفڕۆکەوانی هجوومبەر، هجوومش کەرد سەروو کانتۆنوو جەزیرەی. ئەنجاموو هجوومەکەینە ٤ جەنگەوانێ هێزەکاو سوریای دیموکراتیک (قەسەدە)ی گەشمەردێ بیێ و ١٢ هاموەڵاتێ بریندارێ بیێ.
وەراوەرو هجووم و هەڕەشەکاوە، تووڕەیی گەلی زیاتەر بییەن، مەجلیسی گردینوو گەڕەکەکاو شێخ مەقسودی و ئەشرەفیەو حەلەبی، مەجلیسوو ڕاوەبەریی کانتۆنوو ڕەقەی، کۆنفیدراسیۆنی ڕێکوزیاو جڤاکی دیموکراتیکوو کانتۆنوو ڕەقەی، دەسوەڵێوزوو گەلوو شاروو عامودای و مەجلیسوو ڕاوەبەریی کانتۆنوو عەفرینی و شەهبای ئەرەیاوناێوی هامبەششا واناوە.
دلێشنە هجوومەکاو سەروو هەرێمەکەی شەرمەزارێ کریێ و بانگەواز وەنەو گەلوو هەرێمەکەی کریا خاوەنداریی ونەو هێزە سەروازییەکا بکەرا و دەسکەوتەکاو گەشمەردا بپارێزنا.
ئاماژە کریان، دەوڵەتوو تورکی پی هجووما موزۆ پرۆسەو ورچنیەی دمابوزۆ، وەختێوەنە خەریکا ئیدارەو وێڕێوەبەری ئاستی میاننەتەوەیینە ددانش منریۆ پۆرەرە.
داوا وەنەو ڕێکوزیا و دەسەکاو جیهانی پێوەس بە مافەکاو ئینسانی کریان، هەرمانەو وێشا بیاونانێ یاگێ و هجوومەکاو دەوڵەتی ئەرەگیرکەروو تورکی پەی سەروو هەرێمەکەی بمردنانێ.
