ئێرکۊتەیۆ جە دارسانەکاو زاگرۆسینە بەردەواما
جە ڕۊو دووەشەممەو حەفتەی وەڵینیۆ تائیساتۍ ئێرکۊتەیۆ جە بڕۍ جە دارسانەکا ۋەرکەوتوو کوردسانینە بەردەواما، بەمەڵامەتوو کەمتەرخەمی لایەنە حکومیەکا وەرا ۋەر پا ئێرا، ژیۋگەپارێزنۍ ئینۍ کۊشش و کۆنترۆڵکەردەیشەنە.
بەپاو هەواڵێوە تۆڕەو مافەکا مرۆڤوو کوردسانی جە رۆو دووەشەممەی ۋییەردەیۆ زنجیرېوە ئێرکۊتەیۆ دارسانەکۍ جوانرۆ و پاوەیش جە پارێزگاو کرماشانی گرتېنۍ و دامودەزگاکۍ دەوڵەتو ئێرانی حیچ کۊششېوەش پەی کوشنایۆ ئا ئێرەیە نەوستەن گەڕ.
تۆڕەو مافەکا مرۆڤوو کوردسانی ئێرکۊتەیۆکېش "بەئەنقەس و مەبەسدار" نامۍ بەردێنۍ و ئانەش وستەن ڕووە کە ئېرەکە مەنتیقەکۍ پېسە نوئێل، لورابی، نوخان و شەسۆڵی جوانرۆی و مەنتیقەکۍ بڵبزان، وشکە و شوشمێ پاوەیش گرتەنۆ و بەخێرایی تەشەنە مسانۆ و پانتایېوە فراوانش جە لەوەڕگەی و دارسانەکا نەرۍ زاگرۆسیش دلېنەبەردېنۍ.
ئانەیچ وزیان ڕووە، کە هاموڵاتیا و چالاکا ژیۋگەپارێزنی بە شێوۍ ۋێکارانە و بە کەمتەرین کەل و پەل و پېویسیۍ کۊشش پەی کۆنتڕۆڵکەردەی و کوشنایۆ ئا ئێرەیە مکەرا.
هېزیچ کۆمیتەو ئیکۆلۆژی پارتوو ژیۋای ئازاڎیی کوردسانی (پەژاک) جە ئەرەیاۋنېوەنە ئێرکەوتەیۊکېش بە مەبەسدار و بە ئەنقەس وەسف کەردەبۍ، داواش جە کۆمەڵاو خەڵکی کەردەبۍ ۋېشا رێکبوزا و سیاسەتە دژە ژیۋگەییەکا دەوڵەتو ئێرانی پوچۍ بکەراوە.
