ژەنۍ واتشا: قەیوم دوژمنایەتی ژەنان، کۊشېیای گۊرە مکەرمۍ
ڕېکوزیاکاو ژەنا دژوو دەس سەرەرەگېرتەی شارەوانی جولەمێرگین واتشا: "ڕا مەڎەیمۍ ئیرادەو ژەنا جولەمێرگی دەسش سەرەرە بگیریۆ. قەیوم دوژمنایەتی ژەنان، کۊشېیای گۆرە مکەرمۍ".
ڕېکوزیاکا ژەنا و چالاکا و فێمینیستەکا دژوو زەوتکەردەی شارەوانی جولەمێرگی ئەرەیاۋنێوە هامبەششا ۋەناوە.
واتەواچەو مەجلیسوو ژەنا دەم پارتی خالیدە تورکئۆغلوە ئەرەیاۋناکەش ۋەناوە.
جە ئەرەیاۋناکەینە سەرنج وزیا سەرو سزاکاو دۆزو کۆبانێ و تەئکید کریاوە کە ئینە بەڵگەن پەی ئانەی دەسەڵاتوو ئاکەپە-مەهەپەی دوژمنایەتی ژەنا مکەرۊ، ماچۊ: "سیاسەتوو قەیومی، هجووم پەی سەرو ماف و دەسکۆتەکا ژەنا، نیشانۍ دوژمنایەتی دەسەڵاتین ۋەرا ۋەر بە ژەنا".
ئەرەیاۋناکەی تەئکیدش مکەرۊوە، دژوو ئی هجووما، ژەنا کۊششکاری و کۊشېیای ژەنا هەن، ماچۊ: "پېسە چنی جە هۊرچنیەی هەرېمی ٣١ و ئادارینە قەیومەکېما کیاستێوە، ئارۊیچ نمازمۍ جولەمێرگەنە ئیرادەو ژەنا زەوت بکریۆ".
جە ئەرەیاۋناکەینە ئامان: "وەختش ئامان دژوو فاشیزمی کۊشېیای ئازاڎیی ژەنۍ گۊرە بکەرمۍ و زیاتەر یۊ بگېرمۍ. گەر جەنگبۊ، دژوو ئینەی کۊشېیای ئېمەی ژەنا، کۊشېیای ئېمەی فێمێنیست، کۊشېیای ئېمەی سۆسیالیستی گۆرەبۊ".
