دەسپێشخەریی ئازادی بۆ ئۆجالان لە ٢٥ی حوزەیرانی ٢٠١٢ەوە لە شاری ستراسبۆرگ لە فەرەنسا بۆ ئازادیی جەستەیی عەبدوڵا ئۆجالان رێبەری گەلی کورد دەستپێکردووە و چالاکییەکە لە ٤٧٢هەمین هەفتەیدایە.

بۆ بەدیهێنانی ئازادیی جەستەیی عەبدوڵا ئۆجالان رێبەری گەلی کورد و تێکشکاندنی گۆشەگیریی سەریان ماوەى ١٠ ساڵە ئەو چالاکییە بەردەوامە و هەموو هەفتەیەک لەلایەن دەستەیەک لە ئەوروپاوە چالاکییەکە بەڕێوەدەچێت. ئەم هەفتەیە چالاکییەکە لەلایەن دەستەیەک لە هامبورگەوە بەڕێوەدەچێت، کە پێکهاتوون لە، مەسعود گیوندار، گوڵتەن پۆڵات و ئیدریس ساڤجی.

مەسعود گیوندار بە ناوی دەستەکەوە رایگەیاند، "کاتێک من هاتم بۆ چالاکییەکە هەمان ئەو هەستەم بۆ زیندوو بوویەوە، کە رێبەرایەتی هاتبوو بۆ ئیتالیا. وەک ئەوە وابوو، کە دێم و لێرە دەیبینم، بەڵام بە داخەوە رێبەرایەتیمان ٢٢ ساڵە بە بەرچاوی دونیاوە لە چوارچێوەی پرۆژەیەکی نێونەتەوەیدا دیلکراوە".

مەسعود گیوندار باسی ئەوەیکرد، ئەوە ١٠ ساڵە دەیانەوێت دەنگی گەلی کورد بە دونیا بگەیەنن و وتی، "ئێمە بەو چالاکییە دوڕوویی ئەوروپامان خستەڕوو و ریسوایان دەکەین و دەیسەلمێنین، کە ئێمە ئەو پیلانگێڕییە تێکدەشکێنین. تێکۆشانێک، کە ئێمە بە دروشمی "ئێمە گەنجی دەستمان پێکرد و بە گەنجیش سەریدەخەین" بە دڵنیاییەوە بە سەرکەوتن دەگات".

گیوندار ئاماژەی بەوەکرد، دەبێت گەلی کورد لە بەرامبەر گۆشەگیری، داگیرکەری و پاکتاوکاری لە دەوری تێکۆشانی عەبدوڵا ئۆجالان رێبەری گەلی کورد و و تێکۆشانی گەریلا یەکبگرن و دەبێت لە دژی هێرشەکانی دەوڵەتی تورک بۆ سەر باشووری کوردستان بە هۆشمەندیی یەکێتیی نەتەوەییەوە بجوڵێینەوە.

ئێشکگریی ئازادی بۆ ئۆجالان لە هەفتەى ٤٧١دا لەلایەن رێکخراوە کوردییەکان لە ئەوروپا و نوێنەرانی رێکخراوە ئایینییەکان و چالاکوانانی بزووتنەوەى ژنانی کوردستان لە ئەوروپا بەڕێوەچوو بوو.

ژ.ت