ڕێپێوانی ڕێزگرتن لە ئیرادە لە ئەنقەرە
ڕێپێوانی ڕێزگرتن لە ئیرادەی دەم پارتی کە لە ئیستەنبوڵ دەستی پێ کرد، گەیشتە ئەنقەرە.
ڕێپێوانی ڕێزگرتن لە ئیرادەی دەم پارتی کە لە ئیستەنبوڵ دەستی پێ کرد، گەیشتە ئەنقەرە.
ڕێپێوانی ڕێزگرتن لە ئیرادەی پارتی یەکسانی و دیموکراسیی گەلان (دەم پارتی) دژی دەستبەسەراگرتنی ئیرادە گەیشتە ئەنقەرە. ڕێپێوانکەران بە مەبەستی چوونە جولەمێرگ، لە ئیستەنبوڵ و ئەزمیرەوە بەڕێ کەوتن، لە ئەنقەرە گەیشتن بە یەک. بەشێوەیەکی جەماوەری پێشوازی لە ڕێپێوانکەران کرا، درووشمەکانی "بژی بەرخۆدانی جولەمێرگ" و "شانبەشان دژی فاشیزم" و "جولەمێرگ بەرخۆدان بکە، ئەنقەرە لەگەڵتە" بەرزکرایەوە.
وتەبێژی مەجلیسی ژنانی دەم پارتی ئەنقەرە نەباهەت چاپلان ڕایگەیاند بەرامبەر دەستبەسەراگرتنی ئیرادە سەر نەوی ناکەن و درێژە بە تێکۆشان دەدەن.
چاپلان ڕایگەیاند سیاسەتی قەیوم و گۆشەگیری، گەل ڕووبەڕووی شەڕ و کارەسات دەکاتەوە، گوتی: "دەست لە سیاسەتی شەڕ و تاڵان و زۆرداری هەڵبگرن. گۆشەگیری کۆتایی پێ بهێنن. دەرگای دیالۆگ و کۆبوونەوە بکەنەوە و بڕیاری مەجلیسی شارەوانی جولەمێرگ بۆ دانانی ڤیان تەکچە وەک سەرۆکی شارەوانی لە شوێنی محەمەد سدیق ئاکیش قبووڵ بکەن".
پاشان پەرلەمانتاری دەم پارتی مەحمود دیندار ڕایگەیاند سەرەڕای فێڵ و ساختەکارییەکان دەسەڵاتی ئاکەپە-مەهەپە لە کوردستان گورزێکی مەزنی خوارد، دووپاتی کردەوە قەیوم جوگرافیای کوردستان تاڵان دەکەن، گوتی: "ئەمڕۆ لە ئەنقەرە دەنگی خۆمان هەڵدەبڕین. ئێمە دان بە قەیوم نانێین، تا ئەم نادادییە نەکشێنرێتەوە، تێکۆشانمان بەردەوام دەبێت".
ڕێپێوانکەران ئەمشەو لە ئەنقەرە دەمێننەوە و سبەی بەرەو ئەدەنە دەچن. درێژە بە ڕێپێوانەکەیان دەدەن و ٣ ی تەمموز دەگەنە وان، لە ٨ ی تەمموزیش لە جولەمێرگ دەبن.