چالاکی یادکردنەوەکە بە خولەکێک ڕێزلێنان بۆ شەهیدان دەستیپێکرد. دواتر بە ناوی کۆمسیۆنی بنەماڵەی شەهیدانەوە، دایکی شەهید سوڵتان هەڵبەستێکی لەسەر شەهیدانی ١٤ی تەمووز خوێندەوە.

هەر لە چالاکیەکەدا نوسەر فواد کاڤ قسەیکرد و لە قسەکانیدا باسی لە قۆناغەکانی زیندانی ئامەد کرد. هەڵسەنگاندی بۆ بەرخۆدانی ڕۆژووی مردنی مەزن کرد و سەرنجی خستە سەر گرنگی تێکۆشان لە دژی دەوڵەتی داگیرکەری تورک.

دواتر ڕەمزی کارتال هاوسەرۆکی کۆنگرەی گەل دەربارەی کودەتای فاشیستی ١٩٨٠ قسەیکرد و ئاماژەی بەوەدا کودەتاکە بە پلانسازی ناتۆ ئەنجامدرا و بە تایبەت لە دژی تەڤگەری ئازادی بوو.

لە درێژەی قسەکانیدا ڕەمزی کارتال ئاماژەی بەوەدا تێکۆشانی ئازادی هێڵی سوری گەلی  کوردە و وتی: "دەوڵەتی تورک هەموو بنەماکانی خۆی لەسەر نکۆڵیکردن و لەناوبردنی کوردان بونیاتناوە، کودەتای ١٢ی ئەیلولیشی بەم ئامانجەوە پێکهێنا."

لە کۆتایی قسەکانیدا ڕەمزی کارتال ئاماژەی بە ڕۆڵی گەنجان کرد و وتی: "پێویستە ژن و ژنانی گەنج زۆر باش خۆیان بەڕێکخستن بکەن بۆ دامەزراندنی مۆدێرنێتەی دیموکراتیک."

لە چالاکیەکەدا بەڵگەفیلمێک دەرباری شەهیدانی ١٤ی تەمموز نمایشکرا و چالاکیەکە بە دروشمەکانی "بژی سەرۆک ئاپۆ" و "شەهید نامرن" کۆتایهات.