بە بۆنەی ٨ی مارس ڕۆژی جیهانی ژنانی زەحمەتکێش لە ١٦٠ ناوەندی فەرەنسا چالاکی بەڕێوەچوو. لەسەر بانگەوازی کۆمەڵەی فێمینیست "Un Jour Sans Nous" (ڕۆژێک بەبێ ئێمە) مانگرتنێکی یەک ڕۆژە ئەنجامدرا و هەڵسەنگاندن بۆ سیستەمی پیاوسالاری کرا وپەیامی تێکۆشانی ژنان تا ئازادی ژن بەردەوامی دەبێت خوێنرایەوە.

مارسیلیا

ژنانی کورد ڕۆژی پێشوو بە چالاکییەک ناوی ژنانی شۆڕشگێڕیان لە شەقامەکانی مارسیلیا کردبوو و ٨ی مارسیان بە گوێگرتن لە ستران بێژێک دەست پێکردبوو، ئەمڕۆ بەپێشەنگایەتی ئەنجوومەنی ژنانی ئارین میرکان، لە گۆڕەپانی کانبیێرەوە بەرەو بارەگای پارێزگاری مارسیلیا ڕێپێوانیان ئەنجامدا.

 ژنان بە جۆش و خرۆشەوە لە ژێر بارانێکی بەخوڕدا لە ڕێپێوانەکەیاندا داوای ئازادی ڕێبەری گەلی کورد عەبدوڵا ئۆجالانیان بەرزکردەوە، و سەرنجیان بۆ ٢٥ ساڵەی گۆشەگیری ڕاکێشا. ژنانی کورد بە دروشمی"ژن، ژیان، ئازادی" بەرەو نۆئایل بەڕێکەوتن و لەوێ لەگەڵ ژنانی فەرەنسی کۆبوونەوە و پێکەوە بەرەو بارەگای پارێزگاری مارسیلیا ڕێپێوانیان کرد.

پاریس

هەروەها لەسەر بانگەوازی ٧٠ ڕێکخراوی ژنان، ڕێکخراوە فێمینیستەکان، سەندیکاکانی کرێکاری و لایەنە سیاسییەکان لە پلاس گامبێتا کاتژمێر١٤:٠٠ ڕێپێوانیان دەستپێکرد. بزووتنەوەی ژنانی کوردی فەرەنسا (تەژەکە-ف) لە پێشەوەی ڕێپیوانەکەدا بوو. لافیتەی نووسراوی "ژن، ژیان، ئازادی" و وێنەی سەکینە جانسز، فیدان دۆغان، لەیلا شایلەمەز و ئەمینە کارا کە لە ٩ی ژانویەی ٢٠١٣ و ٢٧ی کانوونی دووەمی ٢٠٢٢ لە پاریس تیرۆر کران، هەڵدابوو. لە میانی ڕێپێوانەکەدا بەردەوام دروشمی "ژن، ژیان، ئازادی" بە زمانەکانی فەرەنسی و تورکی وترانەوە. هەروەها لە ڕێپێوانەکەدا باس لە توندوتیژی دژی ژنان، چەوسانەوە و کاری ژنان، تاوانی ڕق و کینە بەرامبەر بە ژنان لە شەڕەکاندا کرا و باس لەوە کرا کە ژنانی کورد بە تێکۆشانێکی گەورە لە دژی دەسەڵاتی دەوڵەت و سیستەمی پیاوسالاری کۆنفیدرالیزمی دیموکراتیکیان لە ڕۆژهەڵاتی ناوەڕاستدا بنیاتنا.

ستراسبۆرگ

لە شاری ستراسبۆرگ ٨ی مارس ڕۆژی جیهانی ژنانی زەحمەتکێش چالاکیی بەڕێوەچوو.

ڕێپێوانەکە کە لەلایەن ٢٥ ڕێکخراوی ژنان و ڕێکخراوە فێمینیستەکان و سەندیکاکانی کرێکاری و لایەنە سیاسییەکان و دەستپێشخەری ژنانی زین بانگەوازی بۆ کرابوو، کاتژمێر ١٤:٠٠ لە پلەیس کلێبەر بەڕێوەچوو.

ئەندامانی دەستپێشخەری ژنانی زین سەر بە تەژەکە-فە، کە لە پێشەوەی ڕێپێوانەکەدا بوون، وێنەی شەهیدانی پاریسیان بەدەستەوە بوو وبە زمانی فەرەنسی نووسراوی"ئێمەی ژنان، بە ژن، ژیان، ئازادی بەرەو شۆڕش دەرۆین" بەرزکردەوە .

لە میانی ڕێپێوانەکەدا، چالاکانی دەستپێشخەری ژنانی زین، بروشورەکانی مێژووی شۆڕش و تێکۆشانی ژنانی کورد بۆ ئازادی، ژنولۆژی و ڕۆڵی ڕێبەری گەلی کورد عەبدوڵا ئۆجالان لە شۆڕشی ژناندا بەسەر چالاکواناندا دابەش کرد. ڕێپێوانان بەردەوام دروشمی "ژن، ژیان، ئازادی"یان بە زمانەکانی فەرەنسی و کوردی وتەوە.

مولهاوس

لە شاری مولهاوسی فەرەنسا کاتژمێر ١٧.٣٠ لە پلەیس دی لا بۆرس چالاکی ٨ی مارس دەستیپێکرد. ژنان بە بانگەوازی کۆمەڵەکانی فێمینیست بە دەستپێشخەری سەما یوجە، کۆبوونەوە و بە دروشمی "ژن، ژیان، ئازادی" سەرنجیان بۆ خەباتی هاوبەش ڕاکێشا. پێش ڕێپێوانەکە، ڕێکخراوە بەشدار بووەکان لێدوانێکیاندا و هونەرمەند زەریف زەرین گۆرانیەکی بۆ شەهیدانی پاریس پێشکەشکرد.

لە کۆتایی ڕێپێوانەکە، بە بەردەوامی دروشمی "شەقام هی ئێمەیە" و "ژن، ژیان، ئازادی" لە ڕێپێوان و گردبوونەوەکە سەرنج بە گرنگی یەکگرتوویی ژنان ڕاکێشرا.