بەبۆنەی ٢٥ی تشرینی دووەم ڕۆژی جیهانیی توندوتیژی دژی ژنان، لە چەند شارێکی باکووری کوردستان و تورکیا ژنان ڕژانە گۆڕەپانەکان و دژی توندوتیژی و نایەکسانی و گۆشەگیری و شەڕ دەنگیان هەڵبڕی.

ڕحا

ناوەندی مافەکانی ژنانی نووسینگەی یاسایی ڕحا لەبەردەم نووسینگەکەی ڕاگەیاندراوی خوێندەوە. بەشێک لە ئەندامانی ڕێکخراوەکان و پارێزەران ئامادەبوون. جێگری سەرۆکی ناوەندی مافەکانی ژنان شیرین کزلکایا ڕایگەیاند دیوارەکانی توندوتیژی دژی ژنان دەڕوخێنین، ژیانێکی یەکسان و ئازاد و دوور لە توندوتیژی بنیات دەنێین. بۆ ئەمەش تێکۆشانمان بەردەوام دەبێت.

ڕاگەیاندراوەکە بە چەپڵەڕێزان کۆتایی هات.

ئەدەنە

کۆمیسیۆنی مافەکانی مرۆڤی لقی ئیهەدەی ئەدەنە، لە بینای کۆمەڵەکە ڕاگەیاندراوی خوێندەوە. ئەندامانی پارت و ڕێکخراوەکان بەشداربوون.

زەهرا ئایدن ڕاگەیاندراوەکەی خوێندەوە تیشکی خستەسەر ئاماری کوشتن و توندوتیژی دژی ژنان و ڕایگەیاند دەوڵەت ناچارە ڕێکار بگرێتەبەر بۆ پاراستنی ژنان، پێویستە دەست هەڵبگرێت سیاسەتی سزا نەدان.

شەرناخ

کۆمیسیۆنی ژنان و منداڵانی نووسینگەی یاسایی شەرناخ لەبەردەم دادگا ڕاگەیاندراوی خوێندەوە. گەلێک پارێزەر ئامادەبوون. پارێزەر گوڵبەهار بلیگیچ ڕایگەیاند توندوتیژی دژی ژنان تادێت زیاتر دەبێت و ژنان ناپارێزرێن.

جولەمێرگ

ژنان لە جولەمێرگ سەرەڕای ساردیی کەشوهەوا لە چوارڕیانی نەخۆشخانەی دەوڵەت کۆبوونەوە و تا ماڵی پێشووی مامۆستایان ڕێپێوانیان کرد. بەشێک لە ئەندامانی پارت و ڕێکخراوەکان بەشداربوون و پانکارت و درووشم بەرزکرایەوە.

وتەبێژی مەجلیسی ژنانی دەبەپە بێریڤان باخچەچی ڕایگەیاند ژنان نەوەک هەر لە ٢٥ ی تشرینی دووەم بەڵکو هەموو ڕۆژێک تێکۆشان دژی توندوتیژی و فشار و شەڕی تایبەت مەزن دەکەن، لە هەموو جێیەک ڕووی ڕاستەقینەی شەڕی تایبەت ئاشکرا دەکەن.

بەهەمانشێوە لە وان و ئیدر و ئاگری بۆ هەمان مەبەست چالاکی ئەنجامدرا.