ڕۆژنامەنووس عەزیز ئۆروچ، ڕۆژی ١١ی ئەم مانگە لەلایەن دەوڵەتی تورکەوە لەگەڵ هاوسەرۆکی هەدەپەی بازید و هاوڵاتییەکی دیکە لە بازید دەستگیرکرا، ئێستا ٢٠٠ ڕۆژنامەنووس لەسەر ناونیشانی ئینتەرنێتی www.Change.org   کامپەینێکی واژۆ کۆکردنەوەیان بۆ دەستپێکردووە و داوایان کردووە کە نادادپەروەری دژی ئۆروچ کۆتاییپێبێت و ئازاد بکرێت.

لە ناو ئەو دەقەی لەسەر کامپەینەکە بڵاو بووەتەوە، هاتووە: عەزیز ئۆروچ ماوەی حەوت ساڵە لە زۆرێک لە شارەکانی کوردستان و تورکیا کاری ڕۆژنامەنووسیی کردووە، بەو هەواڵانەی دروستی دەکرد و بە لێدوانەکانی لەسەر هەڤاڵانی زیندانیی ڕۆژنامەنووسی دەناسرا، وەزارەتی ناوخۆ و ڕاگەیاندنی دەسەڵات بە تیرۆریست ناوی دەهێنن.

لە بەردەوامی هاتووە: سەرەڕای ئەوەی ئەشکەنجەیەکی زۆری دژ کراوە، کاتێک گواستوویانە بۆ نەخۆشخانە، چارەسەری بۆ نەکراوە و تا ئێستا نەیانهێشتووە خانەوادەکەی چاویان پێبکەوێت.

لە کۆتاییشدا هاتووە: ئێمە داوا دەکەین ئەو نادادپەروەرییە لەسەر ئۆروچی هاوپیشەمەن کۆتاییپێبێت و ئازاد بکرێت، بۆ ئەوەی ئەم بەسەرهاتە بەسەر ڕۆژنامەنووسانی دیکە نەیەت، بانگەوازی لە هەموو دەزگا ڕۆژنامەنووسییەکان، سەندیکاکان، کۆنسەی مافی مرۆڤی نەتەوە یەکگرتووەکان، پەرلەمانی ئەوروپا و هەموو ڕێکخراوەکانی مافی مرۆڤ دەکەین کە بەدواداچوون بۆ ئەم ڕووداوە بکەن و پشتیوانیی لێبکەن.

ف.ق