لەیلا گیوڤەن هاوسەرۆکی کۆنگرەی کۆمەڵگەى دیموکراتیک (کەجەدە) بەهۆی کار و چالاکییە سیاسییەکان و لێدوان و وتەکانیەوە لە لقی  ٩هەمین دادگای سزا قورسەکانی ئامەد سزای ٢٢ ساڵ و ٣ مانگ زیندانیی بەسەردا سەپێنرا.

دوای بڕیارەکەی دادگای دەوڵەی تورک، هێزە ئەمنییەکانی دەوڵەتی تورک دوێنێ شەو لەیلا گیوڤەنیان دەستگیرکرد و بردیان بۆ لقی بەرەنگاربوونەوەى تیرۆر (TEM) لە بەڕێوەبەرایەتیی ئاسایشی شاری ئامەد و ئەم بەیانییە گواستیانەوە بۆ زیندان.

"زۆر تێبکۆشن و کار بکەن"

بەردان ئۆزتورک هاوسەرۆکی کۆنگرەی کۆمەڵگەى دیموکراتیک (کەجەدە) و کەسکین بایندەر هاوسەرۆکی گشتیی پارتی هەرێمە دیموکراتیکەکان (دەبەپە) لەگەڵ چەندین سیاسەتمەداری تردا لە بەردەم دادگا کۆبوونەوە.

گیوڤەن بۆ ئەو کەسانەى لە بەردەم دادگا کۆبوونەوە وتی، "کێشە نییە، زۆر کار بکەن و تێبکۆشن، ئێمە بە زوویی دەگەڕێینەوە".

دوای ئەوەى لقی ٩ی دادگای سزا قورسەکانی دەوڵەتی تورک لە ئامەد بڕیاری زیندانیکردنەکەى گیوڤەنی ئاشکرا کرد، گیوڤەن لەلایەن هێزە ئەمنییەکانەوە دەستگیرکرا و سەرلەبەیانیی ئەمڕۆ رەوانەى زیندانی ژنانی ئامەد کرا.

ژ.ت

.....