لە غەززە ٣٠ کوژران کە ١٣یان منداڵە
بەرگریی شارستانی فەلەستینی ڕایگەیاند، لە ئەنجامی هێرشەکانی ئیسرائیل بۆسەر غەززە ٣٠ کەسی دیکە گیانیان لەدەستداوە، کە ١٣یان منداڵە.
ئاماری کوژرانی مەدەنییەکانی فەلەستین لە هەڵکشاندایە و هێرشەکانی سوپای ئیسرائیل بەردەوامە لەسەر پێگە و کەرتە مەدەنییەکان. بەرگریی شارستانی فەلەستین لە راگەیەندراوێکدا ئاماری کوژراوانی فەلەسەتینی لە دوو هێرشی سوپای ئیسرائیلدا بڵاوکردەوە و ڕایگەیاندووە، لە ئەنجامی هێرشەکانی ئیسرائیل بۆسەر غەززە ٣٠ کەس گیانیان لەدەستداوە، کە ١٣یان منداڵە.
هەر لە ڕاگەیاندراوەکەدا وتراوە، هێرشی یەکەم لە شاری جبالی ئەنجامدراوە کە دەکەوێتە باکووری غەززە و تێیدا ٢٥ کەس گیانیان لە دەستداوە، لەو ژمارەیە ١٣یان منداڵە. هێرشی دووەم لەسەر گەڕەکی ئەل سابرا ئەنجامدراوە، کە تێیدا ٥ کەس گیانیان لە دەستداوە. ئاماژەش بەوەکراوە هێشتا چەندین کەس لە ژێر داروپەردووی بینا ڕووخاوەکاندا گیرییان خواردووە.
