لە کابۆلی پایتەختی ئەفغانستان، ٢٠ ژن بۆ شەرمەزارکردنی سنوردارکردنی مافەکانیان لەلایەن تالیبانەوە، بە دروشمی ' نان، کار و ئازادی' چالاکیان ئەنجامدا. ژنان لەبەردەم وەزارەتی پەروەردە کۆبونەوە و بە دروشمی ' پەروەردە مافی منە' داوایان کرد، مافی خوێندن لە ژنان زەوت نەکرێت.

ژنان بەر لەوەی لەلایەن هێزە مەدەنیەکانی تالیبانەوە بوەستێنرێن، چەن سەد مەترێک ڕێپێوانیان ئەنجامدا. دواتر بەشداربوویەکی ڕێپێوانەکە بۆ میدیاکان وتی، " ویستمان بەیاننامەیەک بخوێنینەوە، بەڵام رێگەیان نەدا. تەلەفۆنی هەندێک ژن دەستیبەسەرداگیراوە و رێگەیان بە تۆمارکردنی ڤیدیۆ و دیمەنی چالاکیەکە نەدرا.

تالیبان بۆ سەرکوتکردنی کۆمەڵگەی مەدەنی و ژنان، چەند بریارێکی بەپێی دەسەڵاتی رادیکالی ئیسلامی دەرکرد. بریاردرا کە ژنان لە زۆر کار دووربکەونەوە. مافی ژنان نییە کە گەشت بکەن و منداڵانی کچ مافیان نییە لە کۆلێژ و زانکۆ و خوێندنگای ئامادەیی بخوێنن.

بریارەکان لەلایەن حەبیبواللە ئاخوندزادە سەرۆکی ئایینی تالیبان و ئەفغانستانەوە پەسەند کراوە. ژنان پێویستە بە پەچە و عەباوە کارە گشتیەکانیان ئەنجام بدەن.

بەپێی بریارنامەکە، ئەگەر زۆر پێویستە نەبێت، باشترە ژنان لە ماڵەکانیان نەچنە دەرەوە.

ف.ق