چالاکیی ئێشکگری لە بەنداوی تشرین لە ڕۆژی ٥٣ هەمیندا بەردەوامە. گەلی کانتۆنی فورات (کۆبانێ، عەین عیسا و سیرین) کە ٢٥ ی شوبات ئێشکگرییان وەرگرت، ئەمڕۆ بە ڕاگەیاندراوێک ئێشکگرییەکەیان ڕادەستی کاروانێکی کانتۆنی جەزیرە کرد.

ڕاگەیاندراوەکە لەلایەن ئەندامی ئەنجوومەنی گەلی کۆبانێ، گەلۆ حوسێن و ئەندامی ئەنجوومەنی پەیەدەی شاری حەسەکە ڕەمەزان فەتاح بە زمانی کوردی خوێنرایەوە. لە ڕاگەیاندراوەکەدا گەلۆ حوسێن ئاماژەی بەوە کرد، ٥٣ ڕۆژە بەرخۆدان بەردەوامە و هەموو پێکهاتەکان تێیدا بەشدارن.

هەروەها جەختی کردەوە، وەک چۆن شۆڕشی ١٩ ی تەمموز کەلتووری بەرخۆدانی لە مێشکی خەڵکدا دامەزراند، بەرخۆدانی بەنداوی تشرینیش تا کۆتایی بەردەوام دەبێت.

گەلۆ حوسێن گوتی: "ئێشکگرییەکە ڕادەستی گەلی کانتۆنی جەزیرە دەکەین و دەڵێین بەرخۆدان ژیانە".

ڕەمەزان فەتاح سەرەخۆشی لە بنەماڵەی شەهیدانی بەرخۆدانی بەنداوی تشرین و هەموو شەهیدانی ئازادی کرد و ڕایگەیاند سەری ڕێز بۆ شەهیدان دادەنەوێنین.

ڕەمەزان سڵاوی لە بەرخۆدانی قەسەدە و گەلی هەرێمەکە کرد و ڕایگەیاند تا وەستاندنی هێرشەکان، بەرخۆدان لە بەنداوەکە بەردەوام دەبێت.

بە درووشمی "بژی بەرخۆدانی قەسەدە، یەپەگە، یەپەژە" ماڵئاوایی لە گەلی کانتۆنی فورات کرا.