ئەمڕۆ بە مەڕاسیمێکی جەماوەری شکۆدار لە گۆڕستانی شەهیدانی شەدادی شەڕڤانانی هێزەکانی سووریا دیموکراتیک (قەسەدە) لەیس حەمادی عەلی خەڵەف کە لە ٢٧ی ئایار و مەحمود حوسێن ئەل فەرحان کە لە ٣١ی ئایار لە کاتی جێبەجێکردنی ئەرکەکانیاندا شەهید بوون، بە خاکسپێردران.

لە مەڕاسیمی بە خاکسپاردنەکەدا نوێنەرانی ڕێکخراوە مەدەنی و سەربازییەکان و سەدان دانشتووی شاری شەدادی ئامادە بوون.

مەراسیمەکە بە خولەکێک ڕێزگرتن لە شەهیدانی ئازادی کوردستان و نمایشی سەربازی شەڕڤانانی قەسەدە دەستیپێکرد. پاشان ئەندامی ئەنجوومەنی بنەماڵەی شەهیدانی شاری شەدادی محەمەد ئەل خەلیل قسەی کرد و گوتی: "شەهیدان سیمبولی قارەمانێتی و بەرخۆدانن، هەمیشە لە یادی نیشتیماندا دەمێنەوە. هەروەها خاوەندارێتی لە خەونەکانیان دەکەین و تاوەکو مسۆگەرکردنی ئازادی و شکۆمەندی شوێنکەوتەی شەهیدان دەبین."

پاشان لە فەرماندەکانی ئەنجوومەنی سەربازی شەدادی محەمەد ئەل ئەحمەد  بە ناوی هێزەکەیانەوە قسەی کرد و گوتی: "ئێمەی قەسەدە قەرزاری شەهیدانین. شەهیدان بەخوێنی خۆیان ڕێگەی ئازادییان ڕووناک کردەوە و لە ڕێگەی پاراستنی نیشتمان و شکۆی گەلدا گیانی خۆیان فیدا کرد. تاوەکو بونیاتنانی کۆمەڵگەیەکی ئازاد و دادپەروەرانە درێژە بە هێڵی شەهیدان دەدەین."

لە دوای قسەکان ناسنامەی هەر دوو شەهید خوێندرایەوە و ڕادەستی بنەماڵەکانیان کرا. تەرمی شەهیدان بە هەلهەلەی دایکان و دروشمی دڵسۆزی بۆ شەهیدان بە خاک سپێردران.