لە کانتۆنی فورات دوو ناوەندی سەرەکی وەرگرتنی گەنم بۆ جووتیاران کرایەوە، سایلۆیەکییان لە گوندی ڕۆڤییە کە بە سایلۆی ڕۆڤی ناسراوە و ئەوی دیکەیان لە شاری چەلەبیە، هەردوو ناوەندەکە گەنم لە جووتیاران وەردەگرن.

ئەندامی بەڕێوەبەری سایلۆی گوندی ڕۆڤی سەر بە شاری کۆبانێ سادق خەلیل بۆ ئاژانسی هەواڵی فورات (ANF) قسەی کرد و گوتی: "چەند ڕۆژە هەر دوو ناوەندەکەمان بۆ وەرگرتنی گەنم ئامادە کردوە و چاوەروانی وەرگرتنی تۆمین. هەروەها ماوەیەکە ئامادەکاری بۆ پاکردنەوەی سایلۆکە کراوە و کۆتایی هاتووە. چاوەڕوانی دیاریکردنی بڕی گەنم دەکەین تاوەکو بتوانین بەو پێی ئەوە گەنم لە جووتیار وەربگرین".

'سایلۆی سرین بەهۆی هێرشەوە بە تەواوەتی لە خزمەت دەرچوو'

لە بەردەوامی قسەکانییدا سادق گوتی: "ساڵی ڕابردوو سێ ناوەندی سەرەکی هەبوون و هەرسێ ناوەندەکەش گەنمیان وەردەگرت. ئەوانەش سایلۆی ڕۆڤی، چەلەبی و سرین بوو، بەڵام بەهۆی هێرشەکانی دەوڵەتی تورکی داگیرکەرەوە سایلۆی سرین لە خزمەت دەرچوو. ئەمساڵ تەنها دوو سایلۆ خزمەت دەکات ئەوانیش ڕۆڤی و چەلەبین."

لە کۆتایی قسەکانییدا سادق ئاماژەی بەوەشدا ئەمساڵ بەهۆی وشکەساڵییەوە بەرهەمەکان زۆر کەمبوون، هەربۆیە لە ئێستادا چاوەڕوانی بەرهەمی گەنمی ئاوین و گوتی: "بە پێی پێشبینەکان بەرهەمی ئەمساڵ لە ساڵی ڕابردوو کەمترە. ئێستا لە ناوەندەکەمان ئامادەین و تاوەکو گەنم هەبێت وەریدەگرین."  

شایەنی بیرهێنانەوەیە ساڵی پار یەکێک لە ناوەندە سەرەکییەکانی سایلۆی گەنم سرین بوو، بەڵام بەهۆی هێرشی دەوڵەتی تورکی داگیرکەر بە فرۆکەی جەنگی و موشکە لە ئەنجامدا سایلۆکە لە خزمەت دەرچوو، زۆر زیانی گەورەی بەرکەوت.