لە دژی هێرشە داگیرکارییەکانی دەوڵەتی تورک لە باشووری کوردستان، ئەنجومەنی شاری دربێسی کانتۆنی جزیرە بەیاننامەیەکی بڵاوکردەوە. ڕازیە ئیبراهیم هاوسەرۆکی ئەنجومەنی شارەکە بەیاننامەکەی خوێندەوە. دانیشتووانی شارەکە، ئەندامانی رێکخراوەکان، کۆنگرەی ستار و بزووتنەوەی گەنجانی شۆڕشگەر بەشدارییان لە چالاکییەکەدا کرد.

لە بەیاننامەکەدا ئاماژە بەوەکرا، هێرش و داگیرکارییەکانی ئەم دواییەی دەوڵەتی تورک لە باشووری کوردستان نیشاندەری ئەوەن کە دەوڵەتی تورک دەیەوێت بە هاوکاری پەدەکە گەریلاکانی کوردستان لە هەرێمەکە گەمارۆ بدات.

ئەنجومەنی دربێسی هاوکارییەکانی پەدەکە و بێدەنگیی هێزە نێودەوڵەتییەکانی لە بەرامبەر کردەوە داگیرکارییەکانی دەوڵەتی تورکی شەرمەزار کرد و ئاماژەی بەوەدا کە ئەم بێدەنگییە ڕێگە بە دەوڵەتی تورک دەدات لە عێراق و سوریا تاوان و داگیرکاری ئەنجام بدات.