ئێشکگریی ئازادیی کە ١٣ ساڵە بە داخوازیی ئازادیی ڕێبەر ئاپۆ لە شاری ستراسبۆرگی فەرەنسا دەستی پێ کردووە، لە هەفتەی ٦٨٣هەمیندا بەردەوامە. ئەحمەد نوسڕەت و سینان ئاکتار و دوزگون ئیسلاک کە لە شاری دان هاگی هۆڵەنداوە هاتبوون، ئێشکگریی ئەم هەفتەیان لە ژنانی نێونەتەوەیی کە کەمپەینی " Women Defend Rojava" بەڕێوەدەبەن، وەرگرت.

ئەحمەد نوسڕەت لەسەر ناوی گرووپەکە قسەی کرد، ڕایگەیاند کە لە پارادایمی نوێی ڕێبەر ئاپۆوە هێز وەردەگرن. بانگەوازی لە دامەزراوەکانی وەک کۆنسەی ئەوروپا و کۆمیتەی ڕێگری لە ئەشکەنجەی نێونەتەوەیی کرد و گوتی: "بەدیلگرتنی ڕێبەر ئاپۆ، بەدیلگرتنی هەموومانە. ڕێبەرێتی ئیرادەی ئێمەیە، داوای ئازادکردنی ئیرادەمان دەکەین".

نوسڕەت ڕایگەیاند پارادایمێکی نوێ پێشدەکەوێت، چەک دادەنرێت، وتەیەکی ڕێبەر ئاپۆی لە چاوپێکەوتنێکی ساڵی ١٩٨٨ بیرهێنایەوە کە دەڵێت: "باوەڕم بە هێزی سیاسەتە"، دووپاتی کردەوە ئەمڕۆش باوەڕی خۆی بە هێزی گەل و سیاسەت دەپارێزێت.