١ دۆلار ١٦ لیرێش دەرباز کەرد
١ دۆلاری ئەمەریکی ١٦ لیرۍٚ تورکیش دەرباز کەرد.
سات بەسات ئابوری تورکیای ڕوو بە وڕایەن و پوڵو ئا ووڵاتەیە (لیرە) بەهاش جەدەست مڎۆنە.
هۆکاو ئانەیچە سیاسەتە هەڵەکێ دەسەڵاتداریە تاکگەرا و دژە گەلییەکێ ڕەجەب تەیب (ئەردۆغان)یەنۍٚ جە سەرجەم بوارەکانە بە تایبەتی جە بوارو ئابوری و ئیکۆنۆمیەنە تورکیاشان وێران و گەلەکێش هەراسانۍٚ کەردێنۍٚ. بە تایبەتی کاریگەری فرە خراپش کەردەن سەرو پوڵو نیشتمانیی ئاو وڵاتەیە کە لیرەن و زوو زوو وەرانوەر بە پوڵە جیهانیەکان زیاتەر بەهاکەیش جەدەست مڎۆنە و ڕۆچانە ڕوو بە وڕای و ئەرەتەپای زیاتەریەن.
جە ئی چوارچوەنە، ئارۆ دیسان لیرەی تورکی جە ئەرەوەستەی و هاڕەکەردی بەردەوام بی و جە بازارەکانە هەر ١ دۆلاری ئەمەریکی بە زیاتەر جە ١٦ لیرۍٚ و هەرپاسە ١ یۆرۆ بە زیاتەر جە ١٧ لیرۍٚ جە بۆرسۍٚ و بازارەکانو پوڵیەنە مامەڵەشان پۆوە کریان و فاڕیێنێوە.
سیاسەتە جەنگەرانەکێ ڕەجەب تەیب ئەردۆغانی بە هۆکارێ سەرەکیێ پەی جەدەستدای بەهاو لیرەی و ئەرەتەپای ئابوری تورکیای مزانانێ و هۆشداری مەڎانێ کە "ئەگەر بە زوویی سنور پەی ئەردۆغانی نەنریۆنەرە، ئاوەختە کەرەتەکێ ئابوری، دارایی، پیشەسازی و بارزگانی بەتەمامەتی بۆوڕانێرە و تورکیا و گەلەکێش ڕووبەڕووێ چارەنویسی تەرسناکی و هۆرشنایای ببانێوە".
شارەزاکێ باس جە ئانەی مەکەرانێ، "ئەگەر بە خێرای ڕێچارێ پەی گرفتە ئابوری و دارایەکێ تورکیای دەستنیشانێ نەکریانێ، ئەگەرش فرەن کە تورکیا تاپول (ئیفلاس) بکەرۆن.
یاگۍ یادئاوەرین کە جە ٢٠٠٥نە، ١ ملیۆن لیرۍٚ تورکیای وەراوەر بێ بە ١دۆلاری ئەمەریکی. بەڵام ئەردۆغان پەی ئەوەگێڵنای نرخ و بەهای پەی لیرەی، پۆلی تازەش چاپ کەرد و ٦ سفرەکێش لابەردێ. بەئی جۆرە ١ دۆلار و ١ لیرە نرخشان یەکسان بی. بەنزیکی و بەشێوازێ جە شێوازەکان، لیرە تا ساڵەو ٢٠١٥ی نرخ و بەهاو وێش وەرانوەر بە دۆلاری و یۆرۆی پارێزنا. بەڵام جە دمای تێکدای پڕۆسەو ئاشتی جەلاو ئەردۆغانیەوە کە ڕابەر ئۆجالانی دەستپنەکەردەبێ و ئەنجامی گرنگش پەی تورکیای و سەقامگیری ئابوریی، ئاساییشی و کۆمەڵایەتیی و سیاسیی ئا ووڵاتەیە چەنی وێش ئاوردەبێ، ئیتر سات بە سات لیرە بەهاش جەدەستدا و هامتەریب چەنی ئانەیە بەگردیی ئابوریی تورکیا تەپارە، سەقامگیری ئابوریی، ئاساییشی و کۆمەڵایەتیی و سیاسیی گورزی گەورەش ونەدریا. ئیتر شۆنیشەرە گرانی، هەژاری، تاپول (ئیفلاس)کەردەی هەزاران کارگا، کۆمپانیا و دوکانەکان دەستش پنەکەرد و بارودۆخەکە بە ئاستێ یاوان کە هەر ئان سات ئەگەرش هەن حکومەت وەرشکست و تاپول ببۆنە.
