هامسەرۆکوو هەدەکەی جەنگیز چیچەک واتش: "ڕووبەڕوو قڕکەردەیۍ تاریخی بیێنمێوە. یا ئانەنە فاشیزم بەشێوێوە هەمیشەیی دەس سەرو گلېرگەیرە مگێرۆ، یا ئانەنە ئێمە دەس سەرو فاشیزمیرە مگێرمۍ و دمایش پنەمارمۍ."
هامسەرۆکوو کۆنگرەو دیموکراتیکی گەلا (هەدەکە) جەنگیز چیچەک قسێش پەی ئاژانسیما کەردۍ و باسش چانەیە کەرد مشۆم پېسە بەردەەوامیدای بە سیاسەتوو نکۆڵیکەردەی دەوڵەتی جە گۆشەگیری سەرو ڕابەرو گەلوو کوردی عەبدوڵا ئۆجالانی بیاومێنە.
جەنگیز چیچەک باسش چانەیە کەرد کە سیستەموو نکۆڵیکەردەی و دلېنەبەردەی دەوڵەتی جە ئیساتێنە جە لایەنوو دەسەڵاتداری فاشیزموو ئاکەپە-مەهەپەیۆ بریۆڕاوە، جە لێوەتەرۆ بەشێوێوە تایبەت هجووم مکریۆ سەرو ژڵێوەو ئازاڎیی کوردی و واتش: "ۋەرو ئانەی ئانۍ دەوڵەتی بەرانۍ ڕاوە و جە ئیساتێنە دەسەڵاتدارێنۍ فرە عال ئانەی مزانا کە تامۍ ئەرەکۊشای دیموکراتیکی گەلوو کوردی گۆرەتەر و گلېرگەییتەر مبۆوە، چارەسەرو دیموکراتیکی پەرسوو کوردی مبۆنە بە پەنەوازی تاریخی. جە لېوەتەرۆ ئۆپۆزسیۆنی کۆمەڵایەتی کوردی جە ۋەرا ۋەر بە پەرسەکا ژەنۍ و گەنجینە، جە ۋەرا ۋەرو گرڎوو پەرسەکانە ئۆپۆزسیۆنی کۆمەڵایەتی گەوەرەتەر مکەرۆ.
هرووژموو قڕکارییا
چیچەک باسش چانەیە کەرد کە دەوڵەت و دەسڵاتداری جە جوڵەو ئەرەکۊشای کۆمەڵایەتی یۆگێرتەی، هۊرچەرخنای، فاڕیای و ئازاڎیی متەرسۆ و واتش: "بەڕێز ئۆجالان سەرکردێوە سیاسییا و جە کورڎەسان و جیهانەنە جە لایەنوو ملیۆنان کەساوە قبووڵ کریان. پۊکەی گۆشەگیری بە تەنیا سەرو ئاڎی نیا، ئینا سەرو مرۆڤایەتیۆ. مشۆم گۆشەگیری پېسە هرووژموو قڕکاری و سیاسەتوو دەوڵەتی ۋەرا ۋەر بە ئەرەکۆشای پراکتیکی و هێڵۆو ئەرەکۆشای و ئا بەهایا بوینیۆ کە بەڕێز ئۆجالان سەرمەشقایەتیشا مکەرۆ."
چیچەک ئاماژەش پانەیە کەرد کە هەڵای کاریگەرییەکۍ گۆشەگیری پەیوەس بە گلېرگەیۆ پەی ڕای گرڎینی جە تورکیانە بە تەمامی ڕۆشن نەکریانۆ، چی مژاریچنە سیاسەتوو دیموکراتیکی کوردی ئینا ڕەخنە جە وۍ گێرتەینە
جە بەردەوامی قسەکاشەنە چیچەک ئاماژەش بە پەیوەندی بەینوو گۆشەگیری و گرفتە کۆمەڵایەتییەکا کەرد و واتش: "پێكئاماو پەیوەندی گۆشەگیری بە گرفتە کۆمەڵایەتییەکاوە، ئەنەیاواین جە ئازاڎیی جەستەیی بەڕێز ئۆجالانی و نمەبۆ بە ۋەرتەسکی تەماشەو ئینەی بکەرمۍ. لایەنێوە ئی مژاریە پی جۆرەنە: بەڕێز ئۆجالان و پەرسوو ستاتۆو گەلوو کوردی، پەرسوو ئازاڎییا چی خاکەنە. قەناعەتم چامنەن کە ئازاڎیی جەستەیی بەڕێز ئۆجالانی، پەیوەس بە ئازاڎیی جەستەیی ئاڎیوە جە مېڎانی جەماوەرینەگفتوگۆش سەر مکریۆ، حەرپاسە پێکئامای بنەڕەتی چارەسەری دیموکراتیکی جە لایەنوو چنڎین هێز و کەسایەتیاوە دژ بە سیستەمی جە ڕوو تیۆرییوە قبووڵ کریان. بەڵام ئا ئاستەی موازیۆ جە ئەرەکۊشاینە ۋەرفراوان نمەکریۆ و ئەنجام بەدەس نامان."
شکڵوو شێوێوە تازەو ئەرەکۊشاین
جەنگیز چیچەک باسش جە شێوەو پەشتوانیەکا پەی شارەوانی جۆلەمێرگی کەرد و واتش: "فاشیزموو ئاکەپە-مەهەپەی پەی گرڎیما گرفتا و پەنەوازا ئیتر ئا گرفتەیە بنەبڕبکەرمۍ. کاتێ چی ڕوانگۆ نرخنای مکەرمۍ ، ڕووبەڕوو هەڵوێسێوە تاریخی بیمێوە. مېڎانوو ئەرەکۊشای کۆمەڵایەتی و سیاسی جە تورکیانە ئینا دلۍ گێڵایۍ تازەینە."
جەنگیز چیچەک ئاماژەش پانەیە کەرد پەنەوازا ئا هەرمانۍ کە دژوو ئاکەپەی مکریا گفتوگۆشا سەر بکریۆ و پلانەشا پەی مجیابۆرە. هێڵێوە پراکتیکیە ئەرەمەرزیۆ و واتش: "مشۆم ئیتر حیچ کەسێوە ۋێش چی هێڵۍ دوور نەگێرۆ. ڕەنگاتی جە یۊترینی جیاوازۍ بیمۍ، ڕەنگاتی ناڕەحەتیما ۋەرا ۋەر بە یۆترینی بۆ، بەڵام جە دماینە ئەنجام پی جۊرەنە؛ یان ئانەنە فاشیزم بە تەمامی دەسسەرو گلېرگەیرە مگێرۆ، یان ئانەن بە ڕاسی دمایی بە فاشیزمی مارمۍ و سەرو خاکەکەیماوە بەرش مکەرمۍ."
