ڕۆنامەوان کارزان بادینی ئاماژە پانەیە مکەرۆ پێوەس بە ناڕەزایەتییەکاوە سوریانە وپانیشتوو کوردسانینە دژوو ئەرەگیرکاریی تورکی، ماچۆ ئەرەگیرکاری و خیانەت سەبەبنێپەی گەشەکەردەئ جمیەرە کۆمەڵایەتییەکا.
چی ڕوا دماینە مەنتێقە ئەرەگیرکریایەکاو سوریای و وەرنیشتوو کوردستانینە ئەرەپڕای جەماوەری دژوو ئەرەگیرکەری تورکی سەرەش وردا و چند کەسێوە بە دەسمجوو گولەو سەروازاو ئەرەگیرکەراو تورکی کوشیێ و بریندارێ بیێ، هەرپاسە پانیشتوو کوردستانینە ناڕەزایەتییەکێ دژوو لەشکرکێشییەکاو دەوڵەتی ئەرەگیرکەروو تورکی پەی سەروو خاکوو کوردستانی تا مێ زیاتەرێ با.
ڕۆنامەوان کارزان بادینی بابەتێوەش هەژماروو وێشەنە تۆڕەو کۆمەڵایەتیی فەیسبووکینە وەڵا کەردەنۆ، ئاماژە مکەرۆ بە یۆشییەی سەرەوردایە جەماوەرییەکا و جمیەرە کۆمەڵایەتییەکا سوریانە و پانیشتوو کوردستانینە.
کارزان بادینی ئاماژە پانەیە مکەرۆ ناڕەزایەتییەکێ سوریانە بەرئەنجاموو پاشێلکارییەکاو مافوو ئینسانی و بییەی دەوڵەتوو تورکینێ هەرێمەکەنە، حەرپاسە ماچۆ: "بە هەمان شێوە داینامیکی هامشێوە پانیشتوو کوردستانینە کاریگەرا، سیاسەتوو پەدەکەی و بنەیانەو بارزانی تووڕەیی خەڵکی زیاتر مکەرا و زەمینە پەی جمیەرە کۆمەڵایەتییەکا ساز مکەرا. بەتایبەت پەیوەندییە بێبنەمێکێ و هامکاری و خیانەتەکێ چەنی سوپاو ئەرەگیرکەرەو تورکیای و هەرپاسە ئا سەختییە ئابووری و گەندەڵییا، کە خەڵک تووشێش با، کاردایوەی جەماوەری گەرموگوڕتەر مکەرا".
هەرپاسە درێژەنە ماچۆ: "فشارە سیاسییەکێ و پاشێلکارییەکاو مافوو ئینسانی پانیشتوو کوردستانینە، هامشێوەو ئا فشارانێ کە مەنتێقە ئەرەگیرکریایەکاو سووریاینە چێروو دەسوو تورکیاینە ئەزموون کریێنێ. ئا کوشتەیێ 'تاوانبارە نەشناسیێ' کە پەدەکە و بنەیانەو بارزانی پەی سەرکوتکەردەی بنەما ئینسانییەکا و پاشێلکەردەی مافوو ئینسانی بەهامکاریی پاراستنی و میت کەردشا، ئا سەبەبێنێ کە کاردایوەی دیموکراسی و جەماوەریی هامشێوەشا وەراوەروو یاگە ئیدارییەکانە و ئەرەمەرزیا ڕسمییەکانە و بنکەکاو تورکە ئەرەگیرکەرەکانە چنە کەوتۆ، ئا مدرامانێ کە ویەردەنە شیلادزێنە نیشانە دریێ، دەرئەنجاموو ئینەیە بێنێ. دمایی گێرتەی و ئەشکەنجەدای مدرامانکەراو شیلادزێ لاو پەدەکەیوە فاکتەرێوی تەر بێنێ ".
ڕۆنامەوانەکە ئاماژە پانەیە مکەرۆ ئیساتێ بۆنەو گەشەو سۆشیال میدیای و میدیای میاندەوڵەتیی گەلوو پانیشتی متاوا دەنگوو وێشا بیاونا بە جیهانوو بەری و ناڕەزایەتییشا وەراوەروو دەوڵەتی ئەرەگیرکەروو تورکی و پەدەکەی بیاونا بە گلێرگەی میاندەوڵەتی، دەسوستەیە میاندەوڵەتییەکێ دەورێوی وەرەچەم مگێڵنانە جە دیاریکەردەی ڕەوتوو جمیەرە کۆمەڵایەتییەکانە مەنتێقەکەنە.
ئاخرۆ تیشکە موزۆنە سەروو یۆشییەی ئەرەپڕایە جەماوەرییەکا دژوو ئەرەگیرکەروو تورکی سوریانە و پانیشتوو کوردستانینە و ماچۆ: "گوزارشتا جە تووڕەیی هامبەشی دژوو حکومەتە ستەمکارەکا. جە هەردووە حاڵەتەکەنە دینامیکی ئابووری و سیاسی و کۆمەڵایەتی جە دیاریکەردەی شێوەو ناڕەزایەتی و جمیەرە کۆمەڵایەتییەکاو دماتەرینە گرنگا".
