٣٣ ڕۆشنویرێ هۆتێلی مادیماکنە دلێڕاسەو سێواسینە ٢ێ تەمووزوو ١٩٩٣ تیرۆرێ کریێ، جە ٣١ەمین ساڵیادوو ئا کۆکوشییەینە یادوو قوربانییا کریاوە. پا بۆنەوە هەزاران کەسێ سێواسەنە تا وەردەموو هۆتێل مادیماکی ڕاشا پیما.

ڕاپیمایەکە وەردەموو هۆتێل مادیماکینە دماییش ئاما، هامسەرۆکە گردینەکاو پارتوو هەرێمە دیموکراتیکەکا (دەبەپە) چیدەم کلچگون ئوچارە و کەسکین بایندەر، هامسەرۆکی گردینوو پارتوو یەکسانی و دیموکراسیی گەلا (دەم پارتی) تونجەر باقرخان، سەرۆکی گردینو پارتوو گەلی کۆماری (جەهەپە) ئۆزگور ئۆزەل و سەرۆکی گردینو پارتوو کرێکاراو تورکیا (تیپ) ئەرکان باش، ڕێکوزیا عەلەوییەکێ و نوێنەروو پارتە سیاسییەکا و ڕێکوزیا مەدەنییەکا و هاموەڵاتێ بەشدارێ بێنێ.

هامسەرۆکی گردینوو پارتوو یەکسانی و دیموکراسیی گەلا(دەم پارتی)، تونجەر باقرخان واتش سەرۆککۆمار و سەرۆکوەزیرانو ئا وەختی ئی ڕووەدایەشا بە ڕووەداێوی ئاسایی ئشناسنا و واتشا "شکور زەرەر بە گەلەکەیما نەیاو"، پێسە واچی حیساب پەی گیانوو کوردی و عەلەوییەکا نەکەرا، کە چا ڕووەدایەنە سۆتێ واتش: "تاوانبارە هەقەتینەکێ ئاشکرێ نەکریێ، چند کەسێوە دادگایێ کریێ و فرێشا ئازادێ کریێ و بێتاوانێ نیشانە دریێ. بە چەنەویەردەی سەرۆککۆماری ئازادێ کریێ".

باقرخان کۆکوشییەکەش بە تاوانێوی دژوو ئینسانی ئشناسنا، پەشتگیریی دەم پارتییش پەی عەلەوییەکا بەروست و واتش پێوە دژوو کۆکوشی و جیاکاری مکۆشیەیمی، هەرپاسە کۆشیای هامبەش بەردەوام مبۆ تا ئاشکراکەردەی تاوانبارە هەقەتینا.  `

سەرۆکی گردین تیپ ئەرکان باش و سەرۆکی گتدین ئەمەپە سەعید ئاسڵان واتێوەشا پێشکەش کەرد.

لاو وێشۆ هامسەرۆکەی گردینەو دەبەپەی چیدەم کلچگون ئوچارە واتش کۆکوشییەکەش لاو هێزە تاریکەکاو دەوڵەتیوە کریان، دماو ٣٠ ساڵا دۆزوو کۆکوشییەکە بێئەنجام مەنۆ و ٣١ ساڵێن زیهنیەتوو کۆکوشی بەردەواما، واتش: "دەسەڵات دماو ٣١ ساڵا سەرووکورسیی تاوانیوە نیشتەرە و بکوشێش پارێزنێ" و ئەوەخوایش کەردۆ و پێسەو کوردە عەلەوییا کۆکوشییەکا ویر نمەبەراوە و هەقە وەنەو وەرپەرسا مسانا.

دمایی خەڵک ولیشا وەردەموو هۆتێلەکێنە نیێرە و یادەکە تەمامیا.