دادگاو لوایۆپۆرەو دیلۆکی سزاو ٣٣٩ ساڵا و ٧ مانگا زیندانی کە سەروو ٦٢ ئەنداما و ڕاوەبەرا هەدەپەی، دەبەپەی، SYKPی و دەسوەڵێوستەی ئەدایا ئاشتیرە سەپنا بێ، پەسەن کەرد. دەم پارتی وەروو دەم و دادگاو دیلۆکینە کۆبیۆ و قەرارەکەش شەرمەزار کەرد.
٦٢ ئەندامۍ و ڕاوەبەرێ کۆنگرەو گلێرگەی دیموکراتیکی (کەجەدە)، پارتوو دیموکراتی گەلا (هەدەپە)، پارتوو هەرێمە دیموکراتییەکا (دەبەپە)ی و پارتوو سەر جە نۆ ئاوەڎانکەردەیۆ سۆسیالیستی (SYKP) , ئەنجومەنوو ئەدایا ئاشتی و کۆمەڵەو مافوو مرۆڤی (IHD) بە تۆمەتەو "ئەندامیەتی ڕێکوستەی" و "پڕوپاگەندەی پەی ڕێکوستەی" جە تەرەفوو دادگاو تاوانە قورسەکا دیلۆکیوە ٣٣٩ ساڵێ و ٧مانگێ سزاشا سەرەرە سەپیا. ئی سزایێ جە تەرەفوو دادگاو لوایۆپۆرەیرە پەسەن کریا. پارتوو یەکسانی و دیموکراسی گەلا دیلۆکی وەروودەم و دادگاو دیلۆکینە ۋەرا ۋەر بە پەسەن کەردەی سزاو سیاسەتمەدارەکانە بەیاننامێوەش وەناوە و قەرارەکەش شەرمەزار کەرد.
حەرپاسە پلاتفۆرموو ڕەنج و دیموکراسی دیلۆکی پەشتگیری بەیاننامەکەیش کەرد. جە گلێرۆ بیەکەینە لافیتەو" ماف، یاسا، دادپەروەری! فشارەکێتا مەتاوا شکسما پنەبارا" هۆرگیریا بێ. محەمەد ساتان، هامسەرۆکوو دەم پارتی دیلۆکی جە بەیاننامێوەنە ئەرەیاوناش، دادگاییکەردەکێ تورکیانە یاساییێ نیەنێ، بەڵکم سیاسیێنێ. حەرپاسە واتش: " بەشێوە گەورەو گلێرگەی بڕواشا بە دادپەروەری چی وڵاتەنە نەمەنەن". چونکی نامێوە هەنە بەڵام بێ دلێینەن. ئانێ دادپەروەرییشا دلێنەبەرد ئانێنێ کە کۆشیای سیاسی و دیموکراتیکی ئێمە تۆمەتبار مکەرا."
