قسەکەرەو دەم پارتی ئایشەگوڵ دۆغانە واتش ئیمراڵیینە تاوانی دژوو ئینسانی مکریۆ، بانگەوازش جە وەزارەتوو دادی و وەزارەتوو تەندروسیی کەرد پێوەس بە ڕابەروو گەلوو کوردی عەبدوڵا ئۆجالانی و زیندانییای تەرو ئیمراڵییوە قسێ بکەرا.
قسەکەرەو پارتوو یەکسانی و دیموکراسیی گەلا (دەم پارتی) ئایشەگوڵ دۆغانە جە ناوەندی گردینوو پارتەکەیشنە دەربارەو کۆبییەیوەو لوجنەو ڕاوەبەریی ناوەندیینە قسێش کەردێ.
ئایشەگوڵ دۆغانە واتش پەرسەی سەرەکییەی حەرە گرنگەو کۆبییەیوەکا جەنگەکاو وەرکەوتوو دلێڕاسەی بێنێ، ئەرەیاوناش: " جە غەززەوە تا ئامەد، گرد یاگێوەنە بییەن مەیدانوو جەنگی و ماڵاییۆیرەی، تورکیا بۆنەو ئی دۆخەیوە باجێوی قورسی ئابووری و سیاسی و گیانیی مدۆ".
هەرپاسە ئەوەخوایش کەردۆ کۆبییەیوەکەنە گۆشەگیریی سەروو ڕابەروو گەلوو کوردی عەبدوڵا ئۆجالانی تاوتۆ کریان، بانگەوازش جە وەزارەتوو دادی و وەزارەتوو تەندروستیی کەرد، پێوەس بە ڕابەروو گەلوو کوردی عەبدوڵا ئۆجالانی و زیندانییای تەروو ئیمراڵییی قسێ بکەرا، دەس جە پاشێلکاری و تاوانەکا وەربدانە، واتش: "ڕەوشی تەندروسیی زیندانییاو ئیمراڵی یاگێ نیگەرانیین. پەنەوازا چی بارەوە قسێ بکریا."
هەرپاسە تیشکەش وستە سەروو هجوومەکاو دەوڵەتوو تورکی پەی سەروو هەرێموو پانیشتوو کوردستانی، واتش گەلوو کوردی سوریانە و عێراقنە و تورکیانە و ئێرانەنە کۆشیای بییەی بکەرۆ، ئەوەخوایش کەردۆ نمەبۆ هامپەیمانیی بەینوو تورکیای و سوریای و عێراقینە بۆ بە هامپەیمانیی جەنگی و ماڵاییۆیرەی، بەڵکوم بۆ بە هامپەیمانیی پارێزنای دەسکەوتوو گەلا، هەرپاسە داواش کەردە کە هیچ هێزێوی کوردی بەشداریی چی جەنگینە نەکەرۆ و نەبۆ بە بەشێو چەنەش.
هەرپاسە سەبارەت بە قسەکاو هاکان فیدانی کە واتەبێش "ڕۆحوو سەردەمەکەی ئاشتی و سەقامگیریی مسەپنۆ"؛ ئایشەگوڵ دۆغانە واتش دەمێوەن ڕۆحوو سەردەمەکەی ئینەیە مسەپنۆ، بەڵام ئاشتی و سەقامگیریی بە زیهنیەتوو شمە و بە سیاسەتی ئەمنی و ئەوەخوایکەردەیوەی ڕایەکاو وەڵێ نمێ بەرهەم، جەختش کەردۆ مشۆم پەیوەندیی چەنی کورداو سوریای ئاسایی بکریۆوە و واتش : "پەنەوازا کورداو واگەیە پێسە هێزوو پتەوکەردەی کۆشیای دیموکراسی بوینیانێ. کوردەکێ سەرچەمەو هەڕەشا نییەنێ. بە پێچەوانەوە، گەرەنتیی ژیواێوی یەکسان و دادپەروەرینێ".
