فشاروو ناوەندە ئەمنییەکا و وەرپەرساو زیندانوو ورمێ سەروو زیندانییە سیاسییا تا مێ زیاتەر مبۆنێ، ئا زیندانیێ ڕووبەڕوو ئێشی، هەڵاواردەی، ئەشکەنجەی و فاڕایوە پەی ناوەندەکاو دەسبەسەرکەردەی هێزە ئەمنییەکا و هەڕەشا مکریانێوە.
بە پاو هەواڵێوی تۆڕەو مافەکاو ئینسانوو کوردستانی ئەنوەر چالشی زیندانیی سیاسیی کوردی، کە تووشوو شێرپەنجەو ڕیخۆڵەی بییەن و دۆخی تەندروستییش خاس نییا، سەربارو ئانەیە پزیشکوو دادی پەشتڕاسش کەردەنۆ، کە نمەتاوۆ زیندانەنە بمەنۆوە، بەڵام بۆنەو ناڕەزایەتیی ئیتلاعاتوو سوپاو پاسداراوە، ڕا نمەدریۆ بە شێوەی کاتی و مەرجدار ئازاد بکریۆ.
ئا زیندانییە سیاسییە ماوەو نزیکەو مانگێوا، بۆنەو خراپیی دۆخی تەندروستییشوە وە فاڕیانۆ پەی خەسەخانەی، بەڵام بۆنەو ئانەیوە تواناو دابینکەردەی شیەینەو خەسەخانەیش نییا، پڕۆسەو چارەسەرکەردەکەیش مردنیان و بەکەلەپچەکریای خەسەخانەنە مەنەنۆ.
هاوکات زیندانیی سیاسیی کەیوان ڕەشوزادە، کە دژوو هەلومەرجوو زیندانی و ڕاگێری جە ئازادیی مەرجداری مانیش جە واردەی گێرتەبێ، پەی چند ڕوێو فاڕیاوە پەی بنکەی سەروازیی ئەلمەدی و لاو ئیتلاعاتوو سوپاو پاسداراوە هەڕەشێش وەنە کریا، کە ئەگەر درێژە بە مانگێرتەی بدا دۆسیێوە تەرش پەی وەش مکەرا.
لاێوە تەرۆ شەهرام کازمیان زیندانیی سیاسیی کوردی، کە وەڵتەرێ بە نەوەشیی درێژخواینۆ بە شێوەی مەرجدار ئازاد کریابێ، بەڵام مانگێو وەڵێ ئیساتێنە واوەی گیریا و وزیا زیندانوو ورمێوە، دژوو فاڕای دەرمانەکاش لاو وەرپرساو زیندانیوە، شەوەو یەکشەممەی ٢٦و ئایاری هەوڵێ وێکوشتەیش دێبێنێ، بەڵام لاو زیندانییاوە ڕاش وەنە گیریێبێ.
پاسەواناو زیندانی ئا بەندکریا کوردەشا ڕاێڕەوو زیندانینە ڕووت کەردەبێوە و ئەشکەنجەشا دابێ، دماتەریچ بە فەرمانەو پەیمان خانزادی سەرۆکوو زیندانوو ورمێ ڕوانەو خەسەخانەو دەروونیشا کەردەبێ.
لە ماوەکاو وەڵێنە فشارەکێ پەی سەروو زیندانییاو زیندانوو ورمێ زیادشا کەردەن و مانگەو شوباتوو ئێساڵینە ٨٠٠ زیندانێ نامێوەنە پەی وەرپەرساو دەسەڵاتی دادوەریی ئێرانی داواو دووروستەیوە پەیمان خانزادەی سەرۆکوو زیندانەکەیشا کەردێبێ.
لە کاردایۆێوەنە پاسەواناو زیندانی چند جارێو هجوومشا کەردەبێ سەروو زیندانییا و ئەشکەنجەشا دێبێنێ، دژوو ئا هجوومانە چند زیندانیێوی پەناشا پەی وێکوشتەیوە بەردێبێ.
ڕوەکاو وەڵێچەنە ٣٩ بەندکریێ زیندانەکەی ئاشکراشا کەرد، ئا زیندانییێ ناڕەزایەتی بەرموزانێ بەندێوی تایبەتنە و ژووری گولانەنە بە شێوەی ماوەنادیار گۆشەگیرێ مکریانێ و گردوو پەیوەندییەکاشا چنی بەری دەرەوە مپڕچنیانێ.
