چواردەمین فیستیڤاڵو چاندی دێرسیمی فرانکفۆرت و ئەڵمانیاینە ئەنجامدریا.

فیستیڤاڵەکە بە سەرمەشقایەتی فیدراسیۆنوو عەلەویە دیموکراتەکا (فەدا)ی فیدراسیۆنوو یەکێتی دیموکراتیکی دێرسیمی و کۆنگرەو ئاوەدانکەردەیۆ دێرسیمی (دیک)ی ڕێکوزیا و بە پانێڵوو ژەنی و ئیکۆلۆژی دێرسیمەنە دەسش پنەکەرد.

جە پانێڵەکەنە سەرنج وزیا سەروو کۆمکوژی ژەنا دێرسیمەنە، ئاماژە پانەی کریا، باوەڕ و چاند و جوگرافیاو دێرسیمی وێرانکریان.

حەرپاسە ئاماژە پانەی کریان بێجگە جە کۆمکوژییەکا تاریخوو دێرسیمی، کۆمکوژی چاندی و ئیکۆلۆژی ئەنجامدریان، جە وەختێنە جە نەریتوو دێرسیمینە ڕێزگرتەی جە سرووشتی و زیندەوەرا  باڵادەسا، چاندو یەکسانی و دادپەروەری زاڵا.

دماو پانێڵەکەی چالاکییە چاندییە هەمەڕەنگەکێ بەردەوامێ بیێ، هونەرمەندێ لووێ سەرو سەکۆی.

دماتەر بە نامێ ڕێکوزیای و پەرلەمانتاراوە ئەرەیاونای ونیاوە و چندین چالاکیێ هونەریێ پێشکەشکریێ.

دماتەر یۆبیەی ژەنا ئەوروپای پەی چالاکی حەفتەو ١٠٠٠ ەمین و ئەڎایا شەممەی پەیاموو پەشتگیریشا واوەی کەردۆ.

جە چالاکییەکەنە سەرۆکوو دەدەفی، عەلی ڕەزا بلیر ئەرەیاوناش بەمەڵامەتوو قەیرانی ئابووریی و جەنگێوە تایبەتیوە بە نیازێنێ هەرێمەکەی چۆڵ بکەرا، پێویسا ڕا بە چۆڵکەردەی دێرسیمی و فاڕای دیمۆگرافیکیش نەڎەیمێ.

پەرلەمانتار ئایدن کۆردو سەرنجش وست سەروو گەشمەردا مانگەو ئایاری و دۆزو کۆبانێ و گۆشەگیری ئیمراڵی و مدرامانوو زیندانیا و ساڵیادوو ١٠٠٠ ەمینی چالاکی ئەدایا شەممەی، ئاماژەش پانەی کەرد درێژە بە ڕاو گەشمەردا مدا، تەئکیدش کەردۆ سیاسەتوو نکۆڵی و ئاسیمیلاسیۆنی و کۆچبەرکەردەی بەردەواما، واتش: "ئانەی دێرسیمی مکەرۆ بە دێرسیم باوەڕ و زوانەکەشا، پێویسا بە وەشەویسیۆ چاندەکەیما پارێزنمێ، گەرەکشانە بنیادی دیمۆگرافی و گلێرگەی و ئشناسنامە و زوانوو دێرسیمی بواڕا، پۆکەی بیانییەکا مارا، هجووم مکەرا سەرو خاک و ئیکۆلۆژیای دێرسیمی، کانەکاو دێرسیمی تاڵان مکەرا، هجووم مکەرا سەرو خاک و ئیکۆلۆژیاو دێرسیمی، کانەکاو دێرسیمی تاڵان مکەرا، کۆشیایما سەروو خاکەکەیماوە بەردەواما".

ئایدن سڵامش جە کۆشیای ئەڎایا شەممەی کەرد و ئەرەیاوناش ئایێ پەی ئاشتی و دیموکراسی ئەرەکۆشا.

ئایدن سەرنجش وست سەروو دۆزوو کۆبانێ و ئەرەیاوناش تا ئازادکەردەی گردوو هەڤاڵەکاما ئەرەکۆشمێ.

حەرپاسە ئایدن کۆرو ئاماژەش کەرد بە گۆشەگیری سەروو ڕابەروو گەلو کوردی عەبدوڵا ئۆجالانی و ئەرەیاوناش گۆشەگیرییەکە سەروو ژەنا و گەنجان، جەختش کەردۆ بێ هۆرگێرتەی گۆشەگیری چارەسەری دیموکراتیک و ئاشتیانەو پرسوو کوردی محاڵا، واتش: "تا مسۆگەرکەردەی ئازادیی جەستەیی بەڕێزعەبدوڵا ئۆجالانی درێژە بە کۆشیای مدەیمێ. پۆکەی زیندانیا مدرامان مکەرا، پی بۆنۆ سڵام جە مدرامانوو ئەڎایا مکەرو. ئێمە شکۆمەندێنمێ، سەربەرزێنمێ، درێژە بە کۆشیای مدەیمێ".

فیستیڤاڵەکە بە گۆرانیێ و هۆرپڕای دمایش پنە ئاما.