ڕامیاریمەدار مسەفا ساریکایا باسش چانەی کەرڎ، کە جە ئەنجامو هەڵمەتۊ ئازادی و مڎرامانینە دیڎار چنی ڕابەر ئاپۆی ئەنجامدریان و واتش، "ئانە پرۆسێوە چارەسەری نییا. نمەبۊ ئینسان هۆرخەڵەتیۆ. تاکو ئا کاتەی ڕابەرایەتی ئازاد مەبۊ ئی هەڵمەتێچە بەردەوامە مەبۊ".
هەرێمو نۆرماندی فەرەنساینە سەبارەت بە پێشئامایەکا کوردەسان-تورکیای و ۋەرکۆتوو مېیامینی، هەرپاسە دیڎار چنی رابەر ئاپۆی، گۆشەگیری ئیمراڵی و هێڵۆو مڎرامانی گلێرۆبیەو گەلی ئەنجامدریا.
ڕامیاریمەدار مسەفا ساریکایا و ئەندامو دیوانو کۆنگرەو جەمە دیموکراتیکەکا کوردەسانیا جە ئۆروپا (کەجەدەکە-ئە) موراد جەیلان قسێشا کەرڎۍ.
مشۆم زیاڎ جە گرڎ چێوۍ پەی ئازادیی رابەر ئاپۆی ئەرەکۆشمۍ
مسەفا ساریکایا هۆرسەنگنایش پەی سیستەمو قڕکەردەی، گۆشەگیر و ئەشکەنجەو ئیمراڵی و ئەرەکۆشای جە دژو ئانەی کەرد و واتش، "گۆشەگیری سەرو رابەر ئاپۆی بەردەواما. ئەگەر گۆشەگیری بەردەوام بۆ، مشۆم مڎرامانیچ بەردەوام بۆ؛ مشۆم ئانەی بزانمۍ. ئا دیڎارەی ئەنجامدریا، بەرهەمو هەڵمەتەو ئازادی و مڎرامانی بۍ. ئانە پرۆسێوە چارەسەری نییا. مشۆم ئینسان پانەی هۆرنەخەڵەتیۆ و چەواشە نەکریۆ؛ تا ئا کاتەی ئازادی رابەرایەتی دەسەبەر بۆ، ئێمەیچ مشۆم پەرە پا هەڵمەتۍ بڎەیمۍ. ڕا بە دیڎاری دریا؛ فاشیزم یاوانە کە ئیتر چانەی زیاتەر جە ۋەرا ۋەرو مڎرامانینە نمەتاوۆ وەرگە گێرۆ. رابەرایەتی ئازاد مەبۆ، ڕێوەتەرە نیەنە. وەڵێکۆتەی و مشتومڕەکۍ گرڎ ئینۍ دەورو کوردی و کوردەسانیوە. ۋەرو ئانەیچ پەنەوازشا بە رابەر ئاپۆی هەن. رابەر ئاپۆ بە واتەی 'ئا قوەتمە هەن کە پرسو کوردی جە بوارو جەنگیوە فاڕووە پەی بوار و زەمینەی سیاسی و یاسایی؛، دەسوەردایش جە پرۆسەکەنە کەرد. پېسە گلێرگەی مشۆم جە گرڎ کاتۍ زیاتەر پەی ئازادی رابەر ئاپۆی ئەرەکۆشمۍ و بە رۆحو هەمڕایا ئاسیا عەلیۍ و رۆژگەر هێلینی کە ئەنقەرەنە ۋێشا فیدا کەرڎ، هەنگام بنیەیمۍ".
ئەندامو کەجەدەکە-ئەی موراد جەیلانیچ دەسنیشانش کەرد کە گەلوو کوردی مشۆم جە گرڎ شۆنێنە رێکوستەی ۋێش قەوەت بکەرۆ و واتش، "ڕاو دەسەبەرکەردەی و مسۆگەرکەردەی ئازادیی جەسەیی رابەر ئاپۆی، بە ۋێرێکوستەی بۆ، بە سەروستەی ئازادی بۆ.
جە گلێرۆبیەکەینە بانگەوازو بەشداری جە ڕاپیمای گۆرەو ١٦و تشرینی دووەمینە جە شارو کۆڵنو ئەڵمانیای ئەرەیاۋییا. گلێرۆبیەکەی بە دروشمەکا 'بێ سەرۆکی ژیۋای نمەبۆ' و 'بژیۋۆ سەرۆک ئاپۆ' دمایش پنە ئاما.
