جەنگەوانا ئازادیی کوردەسانی بە رۆح و جۆش و خرۆشو شۆڕشیوە ئەرەکۆشایشا جە دژو دژمنی درێژە پنەمڎا. یۆ چا جەنگەوانایچە گەریلاو هەپەگەی ئاسلان سیسەرا.

ئاسلان سیسەر کە ئینا دلۍ تیمە گێڵیارەکانە، قسێش پەی ئاژانسوو هەواڵوو فوراتی (ANF)ی کەردۍ. گەریلا ئاسلان سیسەر واتش، "وەڵۍ گرڎ چێوێنە جە ساڵیاڎو گەشمەرڎەبیەیشەنە بە رێز و پنەزانایۆ یاڎو هەڤاڵ بێریتانۍ مکەرووە. هەمڕا بێریتانە دژو ۋێدایدەسۆی هێڵۆو مڎرامانیش پەی ۋێش بە بنەما گێرت، سەرەش پەی دژمنی نەنامنارە. ئا هێڵۍ کە وەششکەردە بیە بە بناغەو بە سوپابیەی ژەنا. چالاکی ئاڎۍ پەی ئێمە فرە گرنگ و تاریخیا. ئێمە بەردەوام بەهاکاو هەڤاڵ بێریتانۍ پارێزنمۍ. بێریتانە رۆحو سەرکۆتەی و ئازادییا. با دژمن عال بزانۆ کە جە کەشەکا کوردەسانینە شکس مارۆ.

'تا دما نەفەس ۋێڕاگری مکەرمۍ'

ئامانجو دژمنی چا هرووژمانە ماڕای هیواو گەلەکەیمانە. پەی ئانەی بتاومۍ پەی ئازادی ئەرەکۆشمۍ و ۋێڕاگری بکەرمۍ، ئێمە هێز جە رابەریما هۆر مگێرمۍ. جە فەلسەفە و مڎرامانوو رابەر ئاپۆی ئیسفاڎە هۆرگێرمۍ. رابەرایەتی چڼین ساڵێن جە ئیمرآڵینە ئەرەکۆشایۍ بێهامتا ڕاوەبەر مکەرۆ. سەرو ئا بنەمایۍ ئێمە تا دما نەفەس جە ۋەرا ۋەرو هرووژمەکا دژمنینە ۋێڕاگری مکەرمۍ. ئێمە جە یاگۍ و کاتو ۋێشەنە جوابی پەنەواز بە دژمنی مڎەیمێوە. ئێمە تا دما نەفەس خاوەنداری جە رۆحو مڎرامانو بێریتانۍ و عەگیدی مکەرمۍ. ئا مڎرامانە پەی ئێمە فرە تاریخیا. پا مەڵامەتۆ جارێوەتەر گەشمەرڎە بێریتانۍ بە رێز و پنەزانایۆ یاڎە مکەرووە. سەرو هێڵۆ و رێبازو ئاڎۍ کە پېسە میراتی پەی ئێمە مەنەنۆ، بەردەوامۍ بیمۍ جە ئەرەکۆشای".