گەریلا شاهین ئارمانج و ڕۆژدا زاگرۆسە کە جە مېڎانوو کەش و ئۆرتێنە بەشدارۍ مدرامانی تاریخی بیێنۍ و چن مانێگێوە بەردەوامۍ بیێنۍ، باسشا جە هجوومەکا دەوڵەتوو تورکی بە چەکی کیمیاوی و مدرامانوو گەریلای دژوو ئا هجووما کەرد.
جە مەڕەکا جەنگینە جە مێڎانوو مدرامانوو کەش و ئۆرتێنە جە هەرێموو مەتینای، جە دژوو سوپاو ئەرەگیروو تورکی مدرامانێوە تاریخی گەریلاکاو ئازاڎیی کوردسانی بەردەواما. سوپاو ئەرەگیروو تورکی کە ۋەرا ۋەر بە مدرامانوو گەریلای شکسش ئارڎەن، پۊکاتی سەروو مەڕاکا گەریلاینە چەکی کیمیاوی و تەقەمەنی قەڎەغەکریا بە کارمارۆ. جە ئاکاموو ئا هجوومە کیمیاویایچەنە چوار گەریلۍ گەشمەرڎۍ بیۍ.
گەریلا شاهین ئارمانج و ڕۆژدا زاگرۆسە کە جە مېڎانوو کەش و ئۆرتێنە بەشدارۍ مدرامانی تاریخی بیێنۍ و چن مانێگێوە بەردەوامۍ بیێنۍ جە کۊشیای، چا گەریلایانۍ کە چەکی کیمیاوی و تەقەمەنی قەڎەغەکریا کاریگەریش بیەن سەرشا.
گەریلاکۍ باسشا جە تاوانەکاو جەنگی سوپاو ئەرەگیروو تورکی و هجوومە کیمیاوییەکا دەوڵەتوو تورکی کەرد کە بە چەماو ۋێشا دیەنشا.
ڕۆژدا زاگرۆسە: جە مەڕەکا مېڎانوو کەش و ئۆرتێنە هەڤاڵەکێما چنەش بێنۍ، کە جە مێڎانەکا تەریۆ ئامێبێنۍ. بڕۍ چا هەڤاڵا ساحیب تەجرووبۍ بێنۍ، بڕێچشا حیچ تەجرووبێوەشا نەبۍ، وە بڕێچشا بەشداری هیچ ئۆپراسیۆنێوەشا نەکەردەبۍ. دووژمن تا ماوێوە نەتاواش نزیکوو مەڕەکا بۆوە. جە سەرەتانە بۆردوومانوو دەوورووبەروو مەڕەکاش کەرد. دماتەر بە گازێوە هجووم کەرۍ کە چەمۍ و لوتەو ئینسانی سۆچنێوە و بووەکێش کاریگەری سەروو ئینسانی نیێرە، زاناما کە ئانە گازی کیمیاوییا. بێ ڕەنگ و بێ بووە بۍ. ئینسانی پەرێشان کەرۍ، هەتا یەرە چووار ڕوێوە سەرئێشێوە قورس وەشکەرۍ. جۆرە مادێوە کیمیاویی بۍ کە پېسەبۍ تۆزەی چەرمۍ. دماو ئانەی چەکە کیمیاوییەکۍ بەکار ئامۍ، کاریگەریش سەر وەشکەردیمۍ بە جۆرێوە کە حۆڵ دێنمۍ هەنگامە بنیەییمۍ قاچەکێما تەزێنۍ، فرەیچ پەرێشانێما کەرۍ.
جە ۋەرا ۋەروو گازی کیمیاوینە ڕاوجاو ۋێما گێرمێنە ۋەر. دەمامک بەکارمارمۍ. خاولیێوە یان لتە قوماشێوە وزێنمۍ سەروو دەمامکەکەی. ئینە ئیسفاڎەش بۍ پەیما. بڕۍ چا گازا بەکارئۍ بووەو شاپمۆیی کناچانەیش چۆوە ئۍ، بڕێشا بووەو ساوۍ، بڕێچشا بوەشا نەبۍ بەڵام کاریگەری فرە وەشکەرێنۍ. چەمۍ و لوتە سۊچنێنێوە، هەناسەو ئینسانی تەنگ کەرۍ، یەکسەری ئینسان توشوو دڵتێکشیەی بۍ. دووژمن سەرەڕاو ئا گرڎ هجووما و بەکارئاوردەی چەکی کیمیاوی، نەتاواش کاریگەری وەش بکەرۆ. دوژمنیچ ئینەی وینۍ، ڕۆ بە ڕۆ جە بەرەو مەڕەکۍ نزیک بێوە، حۊڵ دێنۍ کاریگەرییشا بۆ. بڕۍ وەختۍ دیاریکریۍ بێنۍ. نزیکەو دووۍ مانگا جە مابەینوو سەعات ١١:٣٠ پەی ١٦:٣٠ دەیەقا بە تەقەمەنی بۆردوومانوو بەرەو مەڕەکۍ کەرێنۍ. بڕۍ وەختۍ چڕێنێما واچێنۍ، 'بەیدۍ بەرۆ ۋێتا بڎەیدۍ دەسۆ، واردەی گەرمتا مڎەیمۍ پنە'. هەڤاڵەکێچما بە بۆمب جوابوو دووژمنی دێنێوە. فەرماندەکەشا واچۍ، 'گەر ۋێتا نەڎەیدۍ دەسۆ ئانە چەکی ئەقۆمی بەکارمارمۍ' پی قسا هەڕەشۍ کەرۍ.
دوژمن سیاسەتوو جەنگی تایبەتی بەکارئارۍ بەڵام هیچ کاریگەریێوەش سەروو هەڤاڵا نەبۍ. کەس گۆش پی قسا نەڎۍ. دماتەر دووژمن چەکی ئەتۆمیش بەکارئاورد. جە ١٨و تشرینی یووەمی هجوومێوە گەورەش کەرد و چەکی کیمیاویش بەکارئارد، دماو دەیەقێوە دلۍ مەڕەکۍ پەڕ بی دووکەڵ. دووکەڵێوە کە ڕەنگەش کرێمیە بۍ. هیچ بوێوەش نەبۍ. من یەکسەر ویەردانیۆ. دماو ٧ سەعاتا ئامانیوە هەڎەر. گرڎوو لاشەیم سڕبیەبۍ. تەنیا تاوێنا چەمەکام کەرووە و جوڵنوشا. هامڕاکام نەشناسێناوە. وەختۍ گەرەکم بۍ هورەبێزووە دڵم تێکشی و شێوییانیۆ. ماوەو چارەکوە جە هۆش شیانیۆ. ئێشۍ فرەم بۍ. جارێوەتەر دووژمن واچۍ، 'ۋێتا تسلیم بکەردۍ، حیچ شۊنێوەتەر نیا پەیش بلدۍ'. سەرەڕاو ئانەی هەڤاڵەکێما پەرێشانۍ بێنۍ، بەڵام بە بۆمبۍ جوابوو ئا داواکاریە دێنێوە. هەڤاڵەکێما وەڵۍ ئانەی گەشمەرڎۍ با، ئەڵخامۍ ۋەروو بەرەو مەڕەکانە چەقنێنۍ، هەر وەختۍ دوژمن هجوومش کەردەبیۍ ئێمەیچ ئەڵخامەکا تەقنێنمۍ. تەقنایۆ ئەڵخامەکا کاریگەریش جە ١٢ سەروازا ئەرەگیری کەرد.
ئامانجما ئانەبۍ کە سەروو ڕاو هەڤاڵە گەشمەرڎەکاما ئەرەکۆشمۍ، چی ڕوانگەیچۆ گۆش بە حیچ ئاستەنگیێوە نەڎێنمۍ. جگە جە کۊشیای و حەق کەردەیۆ هیچ جۆرە ژیۋایۍ تەری قبوڵمەکەرمۍ.
ئارمانج شاهین: دووژمن جە تەمووزوو ٣٠٢٣ێنە جە مێڎانوو کەش و ئۆرتێنە جە هەرێموو مەتیناینە هجوومش دەسپنەکەرد. جە ۋەرا ۋەروو ئا هجوومانە چنڎین چالاکیۍ ئەنجامدریۍ. ۋەروو ئانەی ئێمە جە گرڎ ڕووێوە ئاماڎۍ بێنمۍ، چالاکی کاریگەر ئەنجام دێنمۍ. مانگەو تەمووزی بۍ، کەش و هەوا گەرمش کەردەبۍ، فرۆکەی سیخوری ئاسمانەرە خولیێوە. وەختۍ دووژمن هجوومەکا کەرۍ، ئێمەیچ بە چەکی قورس چالاکی کەرێنمۍ. چا چالاکیانە دووژمن کوشتارۍ فرە دۍ. مۆراڵ و وزەما بەرزبۍ. ماوەو دووۍ یەرۍ مانگا دووژمن نەیارۍ نزیکوو مەڕەکا بۆوە. چالاکیە سابۆتاژەکێما پاسشا کەردەبۍ دووژمن نەتاوۍ نزیک بۆوە.
دووژمن دماو ئانەی جە بەرەو مەڕەکا دڵنیابیۆ دەسش بە بەکارئارڎەی چەکی کیمیاوی کەرد. ئا گازەی بەکارش ئارۍ ڕەنگەش سورە بۍ؛ لوتە و چەمۍ سۆچنێوە. نەتاوێنمۍ چەمۍ بکەرمێوە. دەمامکما بۍ، تەنیا پا دەمامکا تاوێنمۍ پارێزگاری جە ۋێما بکەرمۍ. گازێوە ڕەنگ چەرمە بەکارئارۍ؛ بینەو ئینسانی سۆچنێوە، بەزۆر هەناسە دێنمۍ.
دووژمن گازێوە تەری کیمیاوی بەکارئارۍ کە جە سەرەتانە کاریگەریش نەبۍ، بەڵام دماتەر تا حەدوو خنیکیای کاریگەری وەشکەرۍ. گازێوە فرە کاریگەر بۍ. وەختۍ جمێنیوە توشوو سەرئێشەی بێنی. ئا گازە پەی ماوەو یەرە سەعاتۍ کاریگەریش بۍ، بە جۆرێ چا ماوەنە ئەگەرش بۍ گەشمەرڎە بی.
