گەشمەرڎە کاروان هۆرامی، گەشمەرڎەو ئەرەیاۋنای ئازادی کە دماو وێش خەرمانێوە جە واچۍ شیرینۍ و پرەنسیپۍ ڕۆنامەوانیش پەی جیائاستیمۍ. گەشمەرڎە کاروان هۆرامی تا دما نەفەسو ژیۋایش بە باوەڕداری حەقەتینەو هەمڕایی و دڵسۆزی، کە جە کەسایەتی ۋێشەنە نامنشین کەردەبۍ، بی بە ڕانیشاندەرێوە پەی کۊششکارا ئەرەیاۋنای ئازادی، کتێبو 'کارەوانێوە جە وشە ئازادەکا' گێڵنایۆ سەرگوزشتەو کارەوانو هەمڕای کۊششکاریا.

شەهادەتو کاروانی هامکاتا چنی ساڵیاڎو ئەنفالی

١٤و نیسانی، ڕۊو ئەنفالو گەلو کوردی و هەڵمەتێوە پەی تاونایۆ و ئەسڕیەیۆ نەتەوێوە بۍ. جە ڕوێوە چیمنەنە شۆڕە سوارێوە کەشو عەواڵانی بە کۆڵەبارێوە جە وشۍ نەرمتەری جە شنەو واو کۆساڵانو هۆرامانی یاوا بە کارەوانو  گەشمەرڎا ئەرەیاۋنای ئازادی. جە پیرۆزتەرین شۊنەماو ئەوەکۊشای ئازادی کوردەسانینە، جە هەرێمەکاو پارېزنای مەدیاینە جە ساڵەو ٢٠٢٣ێنە خەرمانو قسۍ شرینۍ و پرەنسیپە ڕۆنامەوانیەکێش بە میراتی پەی جیائاستیمۍ.

ئەرەیاۋنای ئازاد سەرەمڕە بیەن  بە دەنگ و رەنگو گەلا چێر دەسەی و ژانا ئازادیوازی. هامکات بیەن بە دەنگ و رەنگو چین و توێژە چەوەسیاکا گلېرگەی. گەشمەرڎە کاروان هۆرامی کە سالۊو ٢٠٠٨ بەشدارو ئاخێزو ئازادی کوردەسانی بی جە دەگاو تەختەو سەر بە هۆرامانی جە ئەڎۍ بیێەن و پەی دەس وستەو حەقەتینەکا رووەش کەردە هەوارگەو شۆڕشو ئاپۆیی.

کاروان؛ درێژەپنەدەرو گەشمەرڎا ئەرەیاۋنای ئازادی بۍ

گەشمەرڎە کاروان سەرو ڕاو هەڤاڵا غۆربەت ئەلی ئەرسۆزۍ و مەزڵووم دۆغانی و دەنیز فراتیوە بی بە ڕێوگارۍ ‌حەقێقەتی و هەوڵش دا بۆ بە دەنگو ئا کەسا کە نە وینیێنۍ و نەژنەویێنۍ.

گەشمەرڎة کاروان پېسە شۆڕشگێڵنێوە و ۋەرپەرسو بەشو فارسی ئاژانسو هەواڵوو فورات نیوزی ئەوەکۊشایش کەرد. هامکات پېسە ڕۊشنویرێوە گەلەکەیش بە قووڵی لوۍ دلۍ مژارەکا و بە ئەنەیاوای جە گلېرگەو کوردەسانی و سەرو بنەماو یاوای بە گلېرگێوە ئازادی هەرمانەو ئەرەیاۋنای کەرۍ. کاروان عال زانۍ گلېرگە چێشش گەرەکا و سەرو ئا بنەمایۍ هەرمانو کار کەرۍ و تەماشەو رووەدایەکا کەرۍ.

شۊنیرە گێڵای پەی مەرامەکا گلېرگەی

کاروان سەرەمڕە سەرو ئا باوەڕیۆ بۍ کە چنی جە ما بەینو ئا ژاوەژاوەو جەهانو ئەرەیاۋنکارا مەگەزینی وپۆپۆلیستی کە سەرو بنەماو فریوودای و جە خشتە بەردەی هۊرچنیان، بتاوۆ بۆ بە میدیاکارۍ حەقێقەت و گلېرگەی بەرەو ئاسۆو سەرکۊتەی بەرۆ.

گەشمەرڎە کاروان هۆرام ڕێوگارو ئا کارەوانەینە کە تا ئارۆ سەرو بنەماو حەقێقەتی بیێنۍ بە ڕێوگارۍ ئازادی و پەی حەقەتینەکا ۋنی بەخش. ئی کارەوانە تا بیاوۆ بە ئارۊی جە بەردەوامی ۋێشەنە بە گەشمەرڎا گۆڵستان تارۍ، هێرۆ بەهادینۍ، عەزیز کویلوو ئۆغلووی، نازم داشتانی و جیهان بیلگنۍ یاوان بە قولەپۊپە، هێز و غیرەت مڎۆ بە گرڎو ئا کەسا کە هەوڵ مڎا چی کاروانەنە بانۍ بە رێوگارو حەقێقەتی.