پەرلەمانتار و سیناتۆرەکاو هامپەیمانی چەپی سەوزوو ئیتاڵیای پەیوەس بە گۆشەگیری ئیمراڵی، نامەشا پەی سەرۆکوو سی پی تی، د. ئالان میشێلی کیاست و داواشا کەردە دەمودەس شاندێوە بکیانا پەی ئیمراڵی.
جە چوارچێوەو هەڵمەتەو "ئازاڎیی پەی عەبدوڵا ئۆجالانی، چارەسەری سیاسی پەی پرسوو کوردی" کە ١٠ و تشرینی یووەمی دەسش پنە کەرد، ناڕەزایەتی میان نەتەوەیی دژوو گۆشەگیری سەروو ڕابەروو گەلو کوردی عەبدوڵا ئۆجالانی بەردەواما.
بەمەڵامەتوو ناچالاکی کۆمیتەو ڕاگێرتەی جە ئەشکەنجەی (سی پی تی) کە متاوۆ بلۆ ئیمراڵی، بانگەوازەکێ پەی یاڎ وستەیۆ وەرپرسیارییەکا سی پی تی زیاتەرێ با.
جە ڕووانی ۋییەردەنە، پەی سەرنج وستەی سەروو هەلومەرجوو گۆشەگیری سەروو ڕابەروو گەلو کوردی عەبدوڵا ئۆجالانی و یاڎ وستەیۆ وەرپرسیاریەکا سی پی تی، بە ئیمزاو دەیان پەرلەمانتارا و پارتی سیاسی و نوێنەراو سەندیکای و مافناسا و ڕۆشنویرا جە لایەنوو کۆمیتەو وەختی ئازادیی ئۆجالانی جە ئیتاڵیا، نامە پەی سەرۆکوو سی پی تی، د. ئالان میشێلی کیانیا.
جە ٢٩ و ئایاری، جە نامێوەنە بە نوویستەی سەرۆکەو فراکسیۆنوو هامپەیمانی چەپی سەوزی لوانا زانێلایێ و ئیمزاو ١١ پەرلەمانتارا پەرلەمانی نەتەوەیی و ٥ سیناتۆرا، داوا جە سی پی تی کریان دەمودەس شاندێوە بکیانۆ ئیمراڵی.
"دەمودەس شاندێوە بکیاندێ پەی ئیمراڵی"
لوانا زانێلایە جە نامەکەنە ماچۆ: "ئی نامە بانگەوازێوەن جە لایەنوو کۆمیتەو وەختی ئازادیی ئۆجالانیوە دەسش پنە کەردەن، گەرەکشا پەی ئاگاڎاربیەی جە ئاژەو بەڕێز عەبدوڵا ئۆجالانی، سی پی تی دەمودەس شاندێوە بکیانۆ ئیمراڵی. هەلومەرجوو بەڕێز ئۆجالانی لاو ئێمۆ مایێ نیگەرانیی جدییا. بەمەڵامەتوو گۆشەگیری ڕەهایۆ، کەس زانیاریش جەبارەو بەڕێز ئۆجالانیوە نییا. چی چوارچێوەنە، داوا مکەرمێ داوکێ دلێ نامەکەی وەرووچەما بگێردێ و دەمودەس شاندێوە بکیاندێ پەی ئیمراڵی".
