جە شارو هەڵەبجەی ناوەندو پارێزگاو هەڵەبجەی، جە بەردەوامی گرنگیدای بەی بە هونەری و خوڵقنای ڕاوجای پەی کاتبەسەربەدەی و پەڕکەردەی ئا بۆشاییە فرەیە کە جە کات و ساتەنە هەن و بەفیڕۆ مدریۆنە، (گەلەری ھەتوان)ی کریاوە.
گەلەریەکە ژمارێوی فرێ هەرمانێ دەستیێ و کارێ ناوازێ هونەریێ جە وێش مەگێرۆنە و هامکات یاگێوەنە پەی کۆبییەی و کات بەسەربەردەی بەشێوازێوی بەسود پەی هاموڵاتیانی بەگردی و گەنجێ و ژەنێ شارەکەی بە تایبەتی.

(گەلەری هەتوان)یکە جەلاو خاتوو حوسنا مەحمود ھەورامیێ-وە سەرپەرشتی مەکریۆنە و مەبریۆنەڕاوە، ڕۆچانە هەر کەس کە سەردایش بکەرۆنە، بە گەرمی و بە پێشکەشکەدەی چای سروشتی پێشوازیش ونە مەکریۆن و سەبارەت بەکارە دەستیێ و هونەریەکان زانیاریش پنە مدریۆنە.جەوەتەی گالەریەکە کریانەوە، ڕۆچانە ژمارێو جە ژەنێ هەڵەبجەی و هەورامانی سەردایش مەکەرانێ و بەشێ جە کاتیشان دلێشەنە بەسەرمەبەرانێ.

هاموڵاتیێ هەڵەبجەی و هەورامانی بە تایبەتێ گەنجەکێ شادمانێنێ بە ئەوەکەردەی گەلەری هەتوانی و سپاگوزارێ خاتوو حوسنایەنێ و وازیارێنێ هەم کەسایەتییە هونەریێ و ڕۆشنویریەکێ و هەم سەرمایەدارێ و حکومەت جە بوارەکێ هونەری و ڕۆشنوییەنە زیاتەر خزمەت بە هەڵەبجەی و هەورامانی بکەرانێ، چونک هەڵەبجە و هەورامان هەمیشە یاگۍ هونەر، ڕۆشنویری و ئەدەب و موزیکی و گۆرانیێ بیێنێ و شایستێنێ جا ئا بوارانە فێشەر خزمەتگوزاریشان پێشکەش بکریۆن.