کۆنگرەو مابەینوو مەجلیسوو کوردی دیموکراتیکی سویسرای (جەدەکە-سە) ی کە چەترەو ڕێکوزیای و دەزگا کوردییەکا سویسرای جە بازل ئەنجامدریا.

کۆنگرەکە جە هۆڵوو کۆنفرانسو ناوەندوو گلێرگەی کوردی دیموکراتیکی بازلی ئەنجامدریا، ١١ مەجلیسۍ و ٦ کۆمۆنۍ و ٢ ئەندامۍ دەسوەڵێوستەی بەشدارێبێنۍ، خەباتوو ساڵێوە کارکەردەی هۊرسەنگیا و هامسەرۊکا وەختی هۊرچنیۍ.

دماو دەیەقێوە ڕێزگرتەی ئەنداموو دیوانوو هامسەرۆکایەتی کەجەدەکە-ئەی، موسا فارسئۆغلو قسێش کەردۍ، گەشمەرڎا هەڵمەتەو ١ و حوزەیرانیش یاڎ ئاردێوە، سەرنجش وست سەروو کەمپینوو ئازاڎیی ڕابەروو گەلو کوردی عەبدوڵا ئۆجالانی و چارەسەری پرسوو کوردی و واتش: "پێویسا ئی چالاکییە گۊرەتەر بکریۆ و ئەنجامگیرتەر بکریۆ. پێویسا ڕێکوستەی ۋێما گۆرەتەر بکەرمۍ".

ئەنداموو کۆمیتەو ڕاوەبەری کەجەکەی زوبەیر ئایدار قۆناغەو هەڵمەتەو ١ و حوزەیرانیش هۊرسەنگنا و ئەرەیاۋناش هەڵمەتەو ئازاڎیی، هەڵمەتێوە تاریخیە و دۆسا گەلوو کوردینە بە وەشەسیایۆ وەرگیری جە ڕابەروو گەلو کوردی عەبدوڵا ئۆجالانی مکەرا، واتش: "پەی ئازاڎیی ڕابەر ئاپۆی جە چنڎین وڵاتا جیهانیوە نامە و داوۍ مکیانا".

جە وەختوو قسەکاو ئایدارینە، بەشدارا پۆستەرۍ ڕابەروو گەلو کوردی عەبدوڵا ئۆجالانی و درووشمەکا "بژیۋۆ سەرۆک ئاپۆ" و بێ سەرۆکی ژیۋای مەبۆ"یشا بەرزۍ کەردێوە.

زوبەیر ئایدار سەرنجش وست سەرو مدرامانوو ژەنا و گەنجاو گەلو کوردی، بەتایبەت مدرامانوو گەریلای جە مەڕەکا جەنگینە دژوو چەکی کیمیاۋیی و قەڎەغەکریای، واتش: "بەیدۍ دەوروو ئاڎیشانە یۆبگێرمۍ، بەیدۍ ڕاو هەڤاڵا بگێرمۍ".

ئایدار ئەرەیاۋناش پێویسا کۊشېیای وەڵۍ وزیۆ و واتش: "ڕابەر ئاپۆ و هەڤاڵەکاش جە حیچۆ چېوېشا خولقنا و داشا دەسو ئێمۆ. پێویسا ئېمە وەڵێش وزمۍ، حەجگیز مەتاوا دلێمانە بەرا. کۊشېیایما دەوڵەتوو تورکیش وستەن قەیرانۆ. هەرچی ماچا، با بواچا، کۊشېیای ئازاڎیی سەرگنۆ".

دماو ۋەنایۆ ڕاپۆرتۍ و هۊرسەنگنای کار و چالاکییەکا وەڵتەری، دەنگ سەروو پەیڕەوو جەدەکە-سەی دریا. دماتەر دیلان چەتین کایا و جەمال ئۆزدەمیر پېسە هامسەرۆکا هۊرچنیۍ و واتشا: "کارمکەرمۍ پەی ئازاڎیی ڕابەر ئاپۆی و لایەق بیەی جە ئاستوو کۊششکارانە".

جە کۆنگرەکەنە خەڵات بەخشېیا بە مەجلیسوو گەلو کوردی ژنێڤی کە گرڎ ڕۊدیارۍ چوارشەمەی جە ٢٧ و تشرینی دوەموو ٢٠٢٠ یوە ۋەروودەم و نوێنەرایەتی نەتەوە یۊگېرتەکانە جە جنێڤ چالاکی ئەرەنیشتەی ئەنجام مڎا.