ئیسماعیل کارا ئاشکراش کەرد نەعیمە ئەملیکە بە مەڵامەتو ئاشکراکەردەو ئاژەو گۆشەگیریۆ پاڵبەسەکریێنە و واتش: "ئا زینانیێ فاڕیێنێ پەی گێرتەخانەو کورکچولەرو ئەدەنەی پێسەو 'زینانیۍ مەترسیڎار'ی نیشانە مڎریا و کەلەپچۍ مکریا."
نەعیمە ئەملیکیەی ٦٥ ساڵە یۆنە چا ٧ بنەیانەو تایاد-یە کە بەمەڵامەتو ئانەی جە ٦و نۆۊەمبەرو ٢٠٢٤ دۆخو گۆشەگیری دژومرۆڤایەتی جە گرتووخانەکا جۆرو وای، ئێسی و ئاڕیشا ئاشکرا کەرد و نامەش پەی زینانیا سیاسی کیانان، بەشێوێوە هەڕەمەکی و بێبنەما باڵبەسەکریێنە.
ئیسماعیل کارا هامژینو نەعیمە ئەملیکێ و تاتەو فیکرەت کارای کە جە گرتێخانەو ئەدەنەی ڕاگیریان پەی ئاژانسو هەواڵو فوراتی (ANF) قسیش کەردۍ و ئاماژەش پانەیەدا ئا زینانیۍ جە زینانو جۆرو وای-ینە فاڕییاوە پەی زینانو جۆرو ئێفی پێسەو 'زینانیۍ مەترسیڎار' ی نریارە و ماوەو ٤٠ ڕوان بە شێوەو کەلەپچەکریای ملا سەردای بنەیانەو و پارێزنەرەکاشا.
کارا باسش چانەیە کەرد کاتو گێڵایشۆ جە سەردانکەردەو کوڕەکەیشەنە فیکرەت گێڵانۆ پۆلیسو دۆڵەتو تورکی هورشاکوان سەرو یانەکەیش و کاتو گێڵایشۆ جە ئەستەنبوڵەنە جە نوقتێ هوشگنای پۆلیسینە هامژینەکەو نەعیمە ئەملیکی-یشا پاڵبەسکەردەن.
ئاشکراکەردەو گۆشەگیری و نویستەو نامەی تاوانەنە...
کارا ئاشكراش کەرد هامژینەکێش و بنەیانەکا تەرو تایادی بە ڕاسپاردەو پۆلیسی پەی داواکارو گرڏی پاڵبەسکریێنێ و ئاماژەش پانەیەدا جە لایەن ئی دەسەڵاتدارییۆ پاڵبەسکەردەو خەڵکی ئنە ئاسانا.
کارا ئاماژەش پانەیەکەرد نویستەو نامەی جە لایەن زینانییەکاوە و گیانای پەی زینانێ تەری پێسەو پاساو نیشانە دریۆ و واتش: "ئا داواکارییا پەی زینانیا نەوەشی سەرو دیجیتاڵ میدیا، ئاشکراکەردەو بارودۆخو گۆشەگیری جە گرتوخانەکا پێسەو تاوانو ڕێکوزتەی نیشانە دریا پەی هەرکەسێ ئانەی کەرۆ با پاساوێ دەستگیرکریۆ و هامژینەکەشێس ئا هەرمانێشە کەردێنە."
کارا دەستنیشانش کەرد، کوڕەکەو فیکرەت کارای ئینا زینانێنە کە ئەچۆ ژوورو مەردەین و ئاماژەش پانەیەدا زینانێ جۆرو ئێس، وای، ئاڕ هامشێوەو ژوورو مەردەینێ و واتش: "ئا زینانیێ وسیێنێ زینانو جۆرو ئێفی پێسەو 'زینانو مەترسیدار' ی نیشانەدریێنێ، نزیکەو ٤٠ ڕوا بە کەلەپچەکریا مەناوە."
