بۆنەو ١٤هەمین ساڵڕۆو گەشمەرڏەبییەی حسێن خزری و فەسیح یاسەمەنی، کە جەلایەنو ڕژێمو ئێرانیۆ جە قەنارە دریێ، پەژاک ئەرەیاونێوەش وەڵاکەردۆ و ئەرەیاوناش: "ڕێبازو ئا گەشمەرڏا تەنیا ئازادی بێ و پەی بەدیئاردەو ئازادیچ پەنەوازیش بە ئەرەکۆشای وەرفراوانیا."
کۆمیتەو گەشمەرڏا پارتو ژیوای ئازادی کوردەسانی (پەژاک) جە ساڵڕۆو یاڏو گەشمەرڏە حسێن خزری (هێمن بێ کەس) یۆ جە ئەنداما پارتەکەی و وڵاتپارێز فەسیح یاسەمەنی جە ١٤هەمین ساڵڕو گەشمەرڏەبییەیشنە پەیوەسێ بێنێ بە قەولەکا شۆڕشگڵنای بە گەشمەرڏا واوەی کەردۆ و بانگەوازش جە گرڏ توێژەکا گلێرگەی کەرد بە پابەندبییەی بە ڕێبازو ئەرەکۆشای گەشمەرڏاوە بە ئامانجو بەدەسئاردەی ئازادی و بەدیئاردەو دیموکراسی درێژە بە ئەرەکۆشیشا دان.
ئەرەیاوناکەو کۆمیتەو گەشمەرڏا پەژاکی بی جۆرەن:
کۆمیتەو گەشمەرڏا پەژاکی جە ١٤هەمین ساڵڕۆو گەشمەرڏەبییەی حسێن خزرینە، کە ئشناسیان بە"هێمن بێکەس" یاڏ و ویرەوەرییەکاش بەڕێزۆ ویر مارمێ و ڕاو ئا گەشمەرڏە بەنرخەی بە ڕاو یاوای بە حەقیقەتو ئازادی مزانمێ و بێگومان ڕێبازو گەشمەرڏا ڕاو ئازادی ڕاو حەقیقەتینە جە بەدەسئاردەو ئازادینە.
گەشمەرڏە هێمن جە ٥و کانوونو دووەمی ٢٠١١نە جە لایەنو ڕژێمو قڕکەری کۆماری زینانو ورمێ جە قەنارە دریا. گەشمەرڏە هێمن جە ساڵەو 1982 شارو ورمێنە جە بنەیانێوە وڵاتپارێزی جە ئەڏابییەن. جە تەمەنو جوانیۆ بییەن بە لایەنگرو جمیەرەو ئازادیی کوردەسانی و جە ساڵەو 1999 بە مەبەسو ڕووبەڕووبییەیۆ سیستەمو قڕکەری ئێرانی و بە ئامانجو ڕزگارکەردەو گەلە ستەمونەکریاکەیش پەیوەندیش بە ڕیزەکا ئازادیی کەردەن.
گەشمەرڏە هێمن نموونێوە ڕۆشنو کەسایەتی پوختە و پنەیاوا جوانێوە کۆششکار بێ بە نموونە پەی هەڤاڵاش. پەڕ ب جە حەماسەو شۆڕشگێڵی جە دۆزو گەلە ستەمونەکریاکەیشەنە و بەردەوام بێ جە ئەرەکۆشای. بە گرنگی دای بی لایەنەی، تەنانەت پە دەیەقێوە دەستبەردارو پابەندبییەو ئەخلاقی و سیاسی و شۆڕشگێڵی وێش نەبێ و هەتا گەشمەرڏەبییەیش سەرو ئی ڕێبازە گۆرەیە بەردەوام بێ. هەرچنە جە ناوەندەکا ئەشکەنجەو ڕێژیمو ئێرانینە مڏرامانێ گۆرەش ڕاوەبەرد، بەڵام قەد دەسبەردارو بڕواو وێش بە ئازادیی گەلەکەیش و بەدیئاردەو ژیوای دیموکراتیکی نەبێ و بی بە نموونێوە کۆششکارو حەقەتینە دژ بە سیستەمو چەوەسنەری ڕژێمی. ئاڏ هامشێوەو فەرزاد کەمانگەری و شیرین عەلەمهۆلێ بێ، حەجگیز ملکەچی و وێ دایدەسۆی نەزانێ.
جە سەیەو مڏرامانو گەشمەرڏە حسێن خزری و گەشمەرڏە فەسیح یاسەمەنی، سیستەمو قڕکەرو ئێرانی نەتاواش بە خواسو وێش کە چۆکپنەدای ئا شۆڕشگێڵا بێ، بکەرۆ. بەمڏرامانو ئا گەشمەرڏا دەسەڵاتو ساختەو ڕژێمی بێ کاریگەر کریا. زینان و ناوەندەکا ئەشکەنجەی سیستەمو ستەمکاریشا کەرد زانکۆو ئەرەکۆشای و مڏرامانی.گومانش چنە نییا کە ئارۆ جوانێ گەلەکەیما سەرو بنەماو ویرۆکەو ئازادیوازا ڕابەر ئاپۆ و بە پارێزناو جمیەرەو ئازادیوازا وێشا، خواس وئارمانجو گەشمەرڏا بەدی مارا.
کۆمیتەو گەشمەرڏا "پارتو ژیواو ئازادی کوردەسانی (پەژاک)" ١٤یەمین ساڵڕۆو گەشمەرڏە "هێمن بێکەس" ی و ١٥یەمین ساڵڕۆو یاڏو گەشمەرڏەبییەی "فەسیح یاسەمەنی" بەڕێزو حورمەتۆ ویر مارۆوە. ئاڎێ میراتو مڏرامانیشا پەی گەلەکەیشا جیائازتەن کە ڕاو ئازادیما ڕۆشن کەرۆوە. ئانە ئامانجو گەشمەرڏە بێکەس و یاسەمەنی بێ، ئیسەیش ئامانجو گەلەکەیمانە پەی بەدەسئاردەو ئازادی و ئارۆ جە سەیەو وشیاریی جوانا گەلەکەیما ئینا گەشەکەردەینە. پۆکەی سەرو ئا بنەمێ بانگەواز جە گرڏو چین و توێژەکا گلێرگەی، گەلەکەیما، جوانێ و ژەنێ کوششکەرێ کەرمێ هەتا بەدیئاردەو ئارمانجو گەشمەرڏا و بەدیئاردەو دیموکراسی درێژە بە ئەرەکۆشای وێشا دانە. ڕاو گەشمەرڏا جگە جە ئازادی حیچی یەر نییا و ڕێبازو بەدەسئاردەو ئازادی تەنیا وەرفراوان کەردەو ئەرەکۆشاین بە پەشت بینای بە ویر و پارادایمو ڕابەر ئاپۆی. یاڏ و ویرەوەری گەشمەرڏاما بەرز و بەقیمەت بۆ."
