بێدەنگی هەردووە حکومەتوو هەرێمی و عێراقی ۋەرا ۋەر بە هرووژمەکا دەوڵەتو تورکی ئەرەگیری تامۍ ناڕەزایی و نیگەرانی هاموڵاتیا زیاتەر مکەرۆ و داوا مکەرا ۋەرا ۋەر پا ئەرەگیریا کەس بێدەنگ نەبۆ و هەڵوێسی تن بگیریۆنە ۋەر.

**

هاموڵاتی هەژار جاف، سەبارەت بە هرووژم و ئەرەگیریەکا دەوڵەتو تورکی قسێش پەی ئاژانسوو هەواڵوو فوراتی (ANF)ی کەردۍ و واتش: "ئانە هەر ئیسە نییا کە کورڎەسان ئەرەگیر مکریۆ، بەدرێژایی تاریخی کورڎەسان ئەرەگیرکریان و کورد هیچ دڵسۆزێوەش نەبیەن، بەتایبەتی دەوڵەتو تورکی هەمیشە هەوڵوو ئەسڕیەیۆ ئی گەلەیشە دان، ئێمە پەی ئی خاکیە چڼەها گەشمەرڎێما دێنۍ و خاکەکەما شەرەفمانە، هەر کوردێوە بەشەرەف و بە ویژدان، پەنەوازا ئیساتۍ هەڵوێسوو ۋێش بەربڕۆ و بەیانە سەرو جاڎەی و دژوو ئا لەشکرکێشییە مرداوە، بەتایبەتی سیاسەتمەدارا و ڕۆشنۋیرەکۍ، بەڵام داخەم مەشۆ  ئانەی کە موینمېش، تەنانەت حکومەتوو هەرێمیچ ئاستوو ئی لەشکرکێشییەینە بێدەنگا، کورڎەسانوو ئێمە یەک پارچەن و حەرچڼە دووژمن گەرەکش بۆ ئا حەقەتینە نمەواڕیۆ."

 هەر چی بارۆ، هاموڵاتیێوە کتێب ورەشوو شارو سلێمانی، واتش، بێدەنگبیەی ئاستوو ئی پاشێلکاریی و هرووژمانە مرۆڤی مکەرۆ بە کەسێوە مەردە، چونکی ئەرەگیر نیازش ئەسڕیەیۆ گەلوو کوردین و واتش: "ئەرکوو گرڎ کەسێوەن ئیساتۍ هەڵوێس هۊربگێرۆ، بەدرێژایی سەڎ ساڵی ۋییەرڎەی هیچ وەختۍ ئاژەکە ئانڎە ترسناک نەبیەن، بەتایبەتی جە ئیساتێنە ۋەرپرسیاری ڕۆشنۋیرا و موفەکیرەکان کە هەڵوێس هۊربگېرا، ئی خاکە ناموسوو ئێمەن و نمەبۆ ڕا بە ئەرەگیری و پاشێلکاری بڎەیمۍ."

 حەرپاسە سەبارەت بە ڕا وەشکەردەی پەی ئی هرووژما جەلایەنو دەسەڵاتی کوردییوە ئاڎ واتش: "بێگومان گرڎ ئەرەگیرێوە وەڵۍ ئەرەگیرکەردەینە هەڵوێس جە دەسەڵاتوو ئا وڵاتیە هۊرمگېرۆ، نمەکریۆ حەرپاسە هرووژم بکەرا، بێگومان ئاسانکاری و ڕا وەشکەردەی پەیشا بیەن، پۊکەی تاوانشا ئی هرووژم و پەلامارا ئەنجام بڎا."