گلێرگەی کوردی، سەرڎەمی کۊنۊ، چند نۊعێوە بەرهەمۍ و وارڎەی تایبەتوو وێش بیەنش، بەپاو بارودۊخوو ئابوری و جوگرافی و شێوەژیوای ئا وەختەیە بەکارش ئاورڎێنۍ، بڕێشا وارڎۍ شلۍ و ئەوێشا تندۍ بیێنۍ، هەورامانیچ یۊن چا یاگا کە بە وارڎەی وێمانەی نامێش لوێنە و ڕووەبەرێوە فرەو ئاگەیە باخا و بە دەسوو هەورامییەكا شنیان و بەرهەمەكەیش پەی فرەو شار و شارۊچكەكاو پانیشت و وەرکەوتوو كوردستانی کیانا.

 یاگۍ باسینە جە وێرەگاو ڕۊو شەممەی، ٤وو تشرینوو دووەموو ٢٠٢٣، فێستیڤاڵوو هەنار و پایزوو هەڵەبجەی دماییش ئاما و ڕاوەبەری گردینوو گەشتوگوزاروو هەڵەبجەی واتش، کە ٢٧٠هەزار مێمانۍ پەی بەشداری جە فێستیڤاڵەکەی سەروو هەڵەبجەیشا دابۍ و ماوەو ئی یەرە ڕوەینە بە بڕوو زیاتەر جە ملیارۍ و ٣٠٠ موێن دینارا وەرەتەیش بییەن.

یاگۍ ئاماژەینە، حەرچندە فستیڤاڵەکە نامێش ڤستیڤاڵوو هەناری بۍ، وەلۍ نیمەکەی تەرش تایبەت بۍ بە هەرمانۍ دەسیۍ و وارڎەمەنییە بە کورڎەوارییەکا و وەزاو هەورامانی، تفی، سرکە، هەنگوین، دۊشاو و بەرهەمەکای تەروو مەنتێقەکەی نمایشۍ کریێنۍ بەتایبەتی بەرهەمەکاو مەنتێقەو هەورامانی، کە داوایۍ فرێشا سەرە بۍ.  

 ١٠ ساڵۍ زیاتەرا وارڎە کورڎەوارییەکا وەش کەروو

 شەهێن غەریبە، ژەنێوە هەورامانینە، کە بەرهەمە کورڎەواریەکا ورەشۍ فێستیڤاڵوو هەنار و پایزوو هەڵەبجەینە، بە ئاژانسوو هەواڵوو فوراتییش وات: "من فێستیڤاڵەکەنە بە بەرهەمی وێمانە بەشداریم کەرڎەن و ماوەو هەر نۊ ساڵەکەو ڤستیڤاڵەکەینە بەشدارە بیێنا وێم١٠ساڵۍ زیاتەرا هەرمانەو وەشکەرڎەی بەرهەموو وارەدی وێمانەی کەروو، گردوو ئی بەرهەما چێگەنە نمایشێم کەرڎێنی وێم وەشۍ کەرڎێنێ".

 ژەنی و گەنجۍ فرێما هەنۍ کە هەرمانەو وێشا هەنە

 سەبارەت بە گرنگیی فێستیڤاڵوو بەرهەمی وێمانەی چینەی پەی ساقۊکەرڎەی بەرهەمەکاشا، شەهێن غەریبە واتش: "ئی فێستیڤاڵە فرە گرنگا پەی ژووژنایوە کەرتی ئابووریی مەنتێقەکەی و ڕەخسنای هەلوو هەرمانۍ پەی گەنجەکاما، ژەنی و گەنجێوە فرێما هەنۍ، کە هەرمانەو وێشا هەنەشا بەرهەمی وێمانەشا هەن و متاوا چی فێستیڤاڵەنە بەرهەمەکاشا ساقۍ کەراوە، هەردووو لایەنوو بورەش و بسێن ئیسفادەشا پەی یۊترینی بۊ، پەی نموونە متمانۍ پی ئی بەرهەماو وارڎەیە بەینوو بورەشی و بسێنێنە پەیدا بۊ".  

 ژەنێوە فرە دەستڕەنگینێما هەنۍ، کە بژێوییشا مسۊگەر کەرا

 هەرپاسە ئا ژەنە هەورامیۍ واتش: "ژەنێوە فرۍ دەسڕەنگینێما هەنۍ و دەسوەشۍ چا ژەنا کەروو کە شان بەشانوو مێردی و بنەیاکەیشا ن بژێوییشا پەیدا کەرا جە ڕاو وەشکەرڎەی بەرهەرمە وێمانەکاو مەنتێقەکەیۊ پێسە ڕۊگناری، دۊشاوی و هەنگوینی و چند بەرهەمای تەری.  ئا بەرهەمێچە کە وستێنێم ڕووە ڕوەنوو خیگەی، ڕۊگنار، برنجی کوردی، هەنگوین و دۊشاوو تفا و چند بەرهەمێوە تەڕیۍ و وشکۍ چونکوم بەرهەمە وشکەکۍ بە درێژایی تارێخی ئیسفادەشا بییەن و پەڕۍ بیێنۍ ڤیتامین و کانزا چونکوم چا سەرڎەمەنە وارڎەو  قوتوۍ نەبیەن پەوکای بەرهەمە وشکكریێوەکۍ بەکارۍ ئامێنێ".

 نەوەکاو دماتەری ئاشنۍ وارڎەی کورڎەوارییانەی با

 ئاخرۊ شەهێن غەریبە داواش وەنەو لایەنە پەیوەندیدارەکا کەرڎە، کە زیاتەر گرنگی بدا پی نۊعە فێستیڤاڵا تا نەوەکاو ئیساتۍ و دماتەریچ ئاشناو بەرهەم و وارڎە کورڎەوارییەکا با و هۊششانە مەناوە".

 کەمتەرخەمیی حکومەتی زەرەرش بە بەرهەمەکام یاونان

 تەها تاهیر حسێن پیایۍ عومرکەرڎەی هەورامیین و خەڵکوو دەگاو هانەوقوڵین و ئامابۍ بەرهەمە وێمانەکاش ساقۍ کەرۊوە، واتش: "ساڵانێوە فرەن خەریکوو هەرمانەو  بەرهەمی وێمانەینا و ماوەو هەشت ساڵان بەشداریی ڤستیڤاڵوو هەنار و بەرهەمە وێمانەکا کەروو، ئا بەرهەمۍ کە هەنێم هەنجیری، شێڵانۍ، وامی، ڕوەنی وێمانە،  تفی، دۊشاو، کەشکی، دوینە و وەزیی هەورامانینۍ، حەز کەروو هەرمانەکێم وافرتەرە کەروو، وەلۍ حکومەت هامکار نییا جە وەختێوەنە  من زەرەم وەر کەوتەن، کە نیمەشەوی ویەرڎە واران واران و  چادرەکۍ دێبێنمێشا وارانش گل نەدانۊ و چێوەکێم تەڕۍ بیێنۍ، بەتایبەتی بەرهەموو هەنجیرەکام تەڕۍ بیێنۍ، کە یەک کیلوۍ بە هەشت هەزارێن و زەرەرم کەرڎەن".

 بەرهەمی وێمانە تامولەزەتی تایبەتش هەن

 ئاخرۊ تەها تاهیر حوسێن پەی ئاژانسوو هەواڵوو فورات (ANF)ی واتش: "بەرهەمی وێمانە تامولەزەتی تایبەتیش هەن، هیچ وەختێچ بەرهەمی خراپ مەورەشوو چونکوم حەزکەروو بژێوییم بە حەڵاڵی پەیدا کەروو".

 چەنی هامژینەکەیم دارسازیی کەرمۍ

 شنۊ عەزیزە ژەنێوە دارسازەنە، کە وێش و هامژینەکەش پێوە هەرمانەو دارسازی کەرا و بەرهەمەکاشا جە داروو وەزۍ، نەرەی و قەڵەم تۊزی وەش کەرا، شنو دەربارەو هەرمانەکێشا پەی ئاژانسوو هەواڵوو (ANF) فوراتی دوا: "ساعینەو پیشەو دارسازینا، کە چەنی هامژینەکەیم جە داری سروشتی کۊمەڵێوە پەنەوازیێی یانا وەش کەرمۍ، هەرمانەکێمانە دارەکاو نەرەی، قەلەم تۊزی و وەزەو هەورامانی بەکار مارمۍ و جۊرەها قاپۍ، تەختەو چنیەی، مێزەو نانوارڎەی  چێوێما هەنۍ و بسێن حەر داواکاریێوەش بۊ پەیش وەش کەرمێ".

 بەرهەمەکێما وێمانێنۍ پەوکای داواکاریی فرەشا سەر هەن

 واوەی سەبارەت بە ئەوەڵوو دەسپەنەکەرڎەی ئی هەرمانۍ، شنۊ واتش: "من حەزم بە هەرمانەو دارسازی بۍ، چوار ساڵۍ چێوەڵتەر وەختوو پەتاو کۊڕۊناینە هامژینەکەم ئی فرسەتشە پەی ڕەخسیا و دەسما پەنە کەرد، ورەتەیما خاسا و هەرکەسێوە کە بەرهەمەکێش بەرڎێبیمۍ پەی جاری تەریچ ئامانۊ، چونکوم  بەرهەمەکۍ وێمانێنۍ و خەڵک مەیلی فرەش هەن سەرشا چا بەرهەما کە جە ڕاو تۊڕی کۊمەڵایەتییوە ورەشیا".