ئەنجوومەنوو ڕاوەبەریی کۆنگرەی نەتەوەیی کوردستانی (کەنەکە)، سەبارەت بە هجوومەکاو دەوڵەتوو ئێرانی پەی سەروو کۆڵبەرا ئەرەیاوناێوەش وەڵا کەردۆ.

ئەرەیاونایەکەنە ئامان، کە کۆڵبەریی هەرمانێوە پەڕ تەرس و ئازارەنە، بە هەزاران کەسێ وەرکەوتوو کوردستانینە بۆنەو نەبیەی هەلوو هەرمانێ و کەمتەرخەمیی وەرپەرساو ڕژیمیوە ناچارێنێ پەنا پەی کۆڵبەری بەرانێ.

کەنەکە واتش؛ حکوومەتوو ئێرانی لاێوە هەوڵێ پەراوێزوستەی و ئاوراکەردەی گلێرگەی کوردی مدۆنێ و لە لایێوی تەریچۆ پێسەو بەشێو جە سیاسەتوو کۆکوشیی سیستماتیکی، کۆڵبەرا، کە پەی بژێوی و بنەیانەکاشا پەنا بەرانێ وەروو ئی هەرمانە پەڕ تەرسێ، بە ئامانج مگێرانێ.

درێژەەنە ئامان، "بە هەزاران کۆڵبەرێ مەردێنێ، دەیان هەزار کەسێ بریندارێ بیێنێ و بە دەیان هەزار بنەیانێ زەرەرشا وەرکەوتەن. بەپاو ئاماروو تۆڕەو مافەکاو ئینسانی کوردستانەنە، لاوکەمیوە 48 کەسێ کۆڵبەرێ". ماوەو ساڵی ویەردەینە کوشیێنێ و 427 کەسێچ بریندارێ بیێنێ، تەنیا ماوەو 70 ڕۆی وەڵینینە لاو کەمیوە 17 کەسێ کۆڵبەرێ و کاسبکارێ کوشیێنێ."

کەنەکە یادش وستۆ، کە تا ئیساتێ هیچ کەسێو سەروو هەرمانە دڕندانەکا دادگایی نەکریان و واتش: "کاسبکارێ و کۆڵبەرێ هیچ تەرسێوە پەی سەروو هێزە چەکدارەکاو ئێرانی وەش نمەکەرانێ و ئادێ تەنیا گەرەکشانە بژێوییشا پەیدا بکەرا. بەڵام هێزەکاو ڕژیمی ئجۆ ڕاوە مکەرا، هجووم مکەرانێ سەروو کۆڵبەرا و ڕاستەوخۆ تەقەشا وەنە مکەرانێ و مکوشانێشا.

بەپێچەوانەو وەعە فرەکاشاوە، کە پەی چارەسەرکەردەی کێشەو کۆڵبەرا دانشا، حکوومەتوو ئێرانی جە دووە ساڵی ویەردەنە تندوتیژییەکاش دژوو کۆڵبەرا زیادێ کەردێنێ. هیچ بەهانیوی پەی ئی هجووم و کوشتەیاو خەڵکی نییارێ. پی هجووم و کوشتەیا سیاسەتی دوژمنکارانەو کۆماری ئیسلامیی ئێرانی دژوو گەلوو کوردستانی مکریۆنێ.  

ئێمە پێسەو کەنەکەی ئا هجوومە دڕندانا شەرمەزار مکەرمێ و داوا وەنەو حکوومەتوو ئێرانی مکەرمێ، هەرمانە و وەرپەرسییشا جە پاریزنای گیانوو خەڵکینە بیاونا یاگێ. پی بۆنەوە جارێوی تەر پەی قوربانییا ڕەحمەتە مکیانمێ و سەرەوەشی وەنەو کەسوکاروو قوربانییا مکەرمێ و هومێدوو خاسبییەیوە پەی بریندارا موازمێن."