پرۆفیسۆر گیۆرگ ئورنهایمەر ئەرەیاۋناش، بە پاو بنەما میان نەتەوەییەکا گۆشەگیری سەروو عەبدوڵا ئۆجالانی ئەشکەنجەن. ئورنهایمەر ئانەیچش وست ڕووە کە پێویسا دەوڵەتوو تورکی گێڵۊوە سەروو مێزەو ئەرەنیشتەی و واتش، "پێسە هەنگامەی یووەمۍ پێویسا ئۆجالان ئازاڎ بکریۆ".
نزیکەو چوارساڵان ڕابەروو گەلوو کوردی عەبدووڵا ئۆجالان هیچ هەواڵێوە و زانیاریێوە جە بارەشۆ مەزانیۆ. جە ۋەرا ۋەروو گۆشەگیری ئیمراڵینە رێکوزیا و ئەرەمەرزیا پەیوەندیدارەکۍ بەتایبەتی کۆمیتەو ڕاگێرتەی جە ئەشکەنجەو ئەوروپای (سی پی تی) بێدەنگا.
پرۆفیسۆر گیۆرگ ئورنهایمەر کە تا وەختوو خانەنشین بیەیش پېسە مامۆسای جە کۆلێجوو زانستە مرۆییەکا زانشتگەو کۆڵنینە پېسە مامۆساو پەروەردەیێ پەیوەندییە کولتورکییەکا کارش کەردەن، قۆناغەو گۆشەگیری ئیمراڵی پېسە 'ئەشکەنجە'ی بەنامۍ مکەرۆ. گیورگ ئورنهایمەر ئانەش وست ڕووە کە گۆشەگیری رەها جە ئیمراڵینە 'بەهیچ جۆرێ مەتاویۆ رەوایەتیش پنە بڎریۆ' و واتش، پێویسا رابەروو گەلو کوردی ئازاڎ بکریۆ.
پێسە هانگامەو سەرەتای مشۊم عەبدوڵا ئۆجالان ئازاڎ بکریۆ
ئورنهایمەر ئانەش وست ڕووە، کە ژمارێوە فرە جە داواکارییەکا دیڎاری چنی ڕابەر ئاپۊی ڕەڎێکریێنێوە، یاخوڎ جواب نەدریێنێوە و ئەرەیاۋناش، "دەسەڵاتوو دادوەری تورکی دەیان ساڵێن عەبدوڵا ئۆجالانش جە ژوری تاکەکەسینە ئاستەنۆ، بە پاو پیمەر و بنەما میان نەتەوەییەکا ئانە ئەشکەنجەن و مایۍ قبوڵکەردەی نییا. ئانڎەی مزانوو عەبدوڵا ئۆجالان تەرەفڎاروو ئانەینە کە جە بەینوو کوردا و تورکانە ئاشتی چەسپیۆ، بەڵام ئەگەر تا ئیساتێچ ئۆجالان پەشتیوانی جە خەباتی سەروازی پەی مافەکا گەلو کوردی بکەرۆ، دیسانیچ گێرتەی و زینڎانیکەردەی ئانە ناحەقی و ناڕەوان".
پرۆفیسۆر ئورنهایمەر ئاماژەش پانەی کەرد کە مشۊم گۆشەگیری دمایش پنە بۍ و گفتووگۆیەکۍ ساڵەکا ٢٠١٣-٢٠١٥یش یاڎئاردێوە. ئورنهایمەر باسش چانەی کەرد، کە مشۆم تورکیا گێڵۊوە پەی سەروو ڕاو گفتووگۊی و پېسە هەنگامەی سەرەتایێچ مشۊم ئازاڎیی جەستەیی رابەروو گەلو کوردی عەبدوڵا ئۆجالانی مسۆگەر بکەرۆ. پرۆفیسۆر گیۆرگ ئورنهایمەر واتش، "رژێمی هەنوکەیی جە تورکیانە مشۆم گێڵۊوە پەی سەروو ڕاو ئا گفتووگۆیا کە چن ساڵۍ چێوەڵتەر چنی نوێنەرا کوردی ئەنجامشا دابۍ. هەنگامەی یووەمە و سەرەتایچ پەی ئانەی ئازاڎکەردەی عەبدوڵا ئۆجالانیا".
