پارێزگارو هەولێری ئومێد خۆشناو، سەرۆکو شارەوانی هەولێری کارزان هادی، پەرلەمانتارو پەرلەمانوو کوردسانی شڤان زراری و شاندو یاوەریشا سەردای شارەوانی مێردینشا کەرد، جەلایەنوو هامسەرۆکا شارەوانی مێردینی ئەحمەد تورک و دەڤریم دەمیرێوە و پەرلەمانتارا دەم پارتی ساڵیحە ئایدەنیزێوە پێشوازیشا چنە کریا.

"پەشگیری جە ئاشتی هەرێمەکەیما کەرمێ"

ئومێد خۆشناو دڵوەشی وێش بە سەرداکەی بەربڕی و سوپاسوو میماندارییەکەیش کەرد ، واتش: " حکومەتو هەرێموو کوردسانی پەشگیری جە ئاشتی هەرێمەکەی کەرۆ. پەی ئاشتی هەرچیما پنە کریۆ ئامادێنمی. ڕوۍ شمەیچ  پێسەو هامسەرۆکا ئازای مێمانداری کەرمی  پەی هەولێری، بەرەو ئێمە گرد وەختێ پەی شمە کریانۆ".

ئەحمەد تورک: پێویسا ئیدارەو پانیشتی مافوو کوردا پارێزنۆ

ئەحمەد تورک ئەرەیاوناش هیچ کێشیوە بەینوو گەلانە نیا و پێسەو گەلوو مێردینی گرد وەختێ زووان و خاکو وێشا پارێزنا، واتش: "وەشڵەی شارەکێ تەرو تورکیایچ پیسەو مێردینی فرەچاندێ بیێنێ. ئاوەختە دیموکراسی و ئاشتی مئ دلۍ تورکیا. پێویسا دلۍ کوردانە گفتووگۆ بۆ. پێویسا گردما پەی ئایندەو کوردی جە مەنتیقە جیاجیاکا کوردسانینە پەیوەندیما بۆ. پۆکەی گرد کوردێوە چەمش جە بانیشتوو کوردسانیا. پێویسا حکومەتو پانیشتی مافوو گرد کوردێ پارێزنۆ. ئاوەختە کوردەکێ یاوا بە ئامانجەکاشا. قەناعەتم پاسەن، جەڕوو سیاسی و دلۍ گەلینە، پەیوەندی دلۍ کوردانە بەقوەتەر بۆ".

دەڤریم دەمیر ئەرەیاوناش یۆگێرتەی گەلوو کوردی گرنگا و واتش: "جەلێوە  ئەبۆ خزمەتو گەلەکەیما کەرمی ، جەلێوە تەرۆر ئەشۆ پەی یۆگێرتەی کوردا بە گرد هێزێوە هەرمانە کەرمی ".