سەزایی تەمەلـلی پەرلەمانتاروو بازنەو مووشوو هەدەپی بارەو دۊخی تەندروسیی ڕابەروو گەلوو کوردی عەبدوڵڵا ئۊجالانیوە پەرسێش وەنەو وەزیروو تەندروسیی تورکیای فەخرەدین کۊجای کەرڎە.
پەرلەمانتاروو هەدەپی سەزایی تەمەلـلی بە مەبەسوو ورگێرتەیوە جوابوو وەزیروو تەندروسیی یاداشتێوەش ئاراستەو وەزارەتوو داڎی کەرد.
تەمەلـلی یاداشتەکەشنە ئەرەیاونانش، " جە ڕێککەوتوو ٠٩.١١.٢٠٢٣ کۊمسیۊننە پلان و بودجەنە ئێمە جە میانەو قسەوباسی سەروو بودجەو وەزارەتوو تەندروسینە، یدا، پەرسێوەما وەنە کەرد وەلۍ نە بە زوانی و نە بەنویسیای جوابما نەدریاوە. ٢٥ ساڵێن عەبدوڵڵا ئۊجالان ئینا زیندانوو ئیمراڵیینە. ڕای گردین، بنەیانە و پارێزنەراو عەبدوڵڵا ئۊجالانی گەرەکشانە بارەو دۊخی تەندروسییشۊ زانیارییشا بیاوۊ پەنە".
تەمەلـلی ئی پەرسێشە کەردێنێ:
"ئایا بارەو دۊخی تەندروسیی عەبدوڵڵا ئۊجالانیوە زانیارییتاهەن؟ بارەو دۊخی تەندروسیی ئۊجالانیوە چی ڕای گردین، پارێزنەرۍ و بنەیانەکەش هاگادارۍ مەکریاوە".
ئینەیچە وەختێوەنە ٢٥وو ئاداروو ٢٠٢١ێوە حیچ هەواڵ و زانیاریێوە بارەو ڕابەروو گەلوو کوردی عەبدوڵڵا ئۊجالانیوە وەرڎەس نییا و داواکارییەکاو بنەیانە و پارێزنەراش پەی کەرڎەی دیداری بێجوابۍ بێنۍ.
ماوەکاو وەڵێچنە پەرلەمانتاراو فراکسیۊنوو هەدەپی بە مەبەسوو کەرڎەی دیداری چەنی ڕابەروو گەلوو کوردی عەبدوڵڵا ئۊجالانی داواکاریێوەشا پێشکەش بە وەزارەتوو داڎی کەرد، وەلۍ تا ئیساتۍ جوابشا نەدریانۊ.
حەر چا چوارچوەنە ١٠و تشرینوو یوەمیوە سەرووئاستوو میاننەتەوەیی بە دەسوەڵێوستەی دۊساو کوردی زیاتەر جە ٧٤ شارا سەرتاسەروو جیهانینە هەڵمەتەو 'ئازادیی پەی ئۊجالانی و چارەسەری سیاسی پەی پەرسەو کوردی' دەس پەنە کریا و تا ئیساتێچ بەرڎەواما.
