پەژاک بۊنەو کۆچی حەقەتینو سیاسەتمەدارو دیارو کوردی عەبدولڕەحمان حاجی ئەحمەدی، ئەرەیاۋنێوەش وەڵا کەرڎۆ و سەرەوەشیش ۋنەو بنەیانەکەیش و گەلوو کوردی کەرد و ئەرەیاۋناش: "پەژاک سەرو هێڵۊو ئەوەکۊشای هەڤاڵ عەبدولڕەحمان حاجی ئەحمەدی ئازادی گەلوو کوردی بەدی مارۆ."
پارتو ژیۋای ئازادی کوردەسانی (پەژاک) بۆنەو کۆچی حەقەتینو عەبدوڕەحمان حاجی ئەحمەدی ڕامېیاریمەدارو دیارو کوردی، هامسەرۆکی وەڵینو پەژاکی و ئەندامو ئەنجومەنو ڕاوەبەری کۊداریۆ ئەرەیاۋنێوەش وەڵا کەرڎۆ.
جە ئەرەیاۋناکەو پەژاکینە پېسە ئامان:
"پەی ڕای گرڎی کوردەسانی:
بەداخ و ئەسەفۍ گۊرۆ هەڤاڵما "عبدولڕەحمان حاجی ئەحمەدی، هامسەرۆکی وەڵینو پارتیما پەژاکی و ئەندامو ئەنجومەنو ڕاوەبەری کوداریۆ، ڕۊو یەرەشەممەی ١٨و ئادارو ٢٠٢٥ جە شارو کۆڵنو ئەڵمانیاینە کۆچی حەقەتینش کەرڎ. پارتو ژیۋای ئازادی کوردەسانی (پەژاک) پا بۆنۆ سەرەوەشی جە ڕابەر ئاپۆی، بنەیانەی ئێژایش، گەلوو کوردی، ئازادیوازا و کۊششکارا مکەرۆ. ئێمە بە بە ئەوەکۊشایۍ کە لایەق بە بەدیئاردەی ئازادی گەلەکەیما کە یۆ جە ویستە گۊرەکا هەڤاڵیما بۍ، درێژە بە ڕاو ئازادیی هەڤاڵیما مڎەیمۍ و بە ڕێزو حورمەتۆ یاڎش مکەرمېوە.
هەڤاڵ حاجی ئەحمەدی گرڎو تەمەنو ۋێش پەی کۊشش و ئازادی گەلوو کوردی و گەلا چېردەسەی تەرخان کەرد، هەرپاسە میراتێوە گۊرەش دماو ۋێش جیائاست هەم جە کوردەسان و هەم جە جبەرو وڵاتی. هەڤاڵ حاجی ئەحمەدی ساڵۊو ١٩٦٤ پەی وانای لوان ئۊرووپا و چاڎیچ دلۍ خۊنکارا کوردینە درێژەش بە کۊششو ۋێش دان. ماوێوە جە چکۆسلۆڤاکیانە درێژەش بە ۋەنای دان و دماتەر کە یووەم 'پەرلەمانو کوردەسانی جە ئۊروپانە' ئەرەمەرزیا، پېسە ئەندامی هۊرچنیا و چا کۊشش بەردەوام کەرد. هەرپاسە جە لوجنەو ئەرەمەرزنەرا کۆنگرەو نەتەوەیی کوردەسانینە کۊشش کەرڎەن، چالاکییەکێش جە کۆنگرەو نەتەوەیی کوردەسانینە کاریگەری فرەشا بۍ. هەڤاڵ حاجی ئەحمەدی جە ساڵۊو ٢٠٠٤ ینە بەشداری کۆنگرەو ئەرەمەرزنای پارتیما پەژاکی بی و تا ساڵۊو ٢٠١٤ جە کۆنگرەو یووەم و دووەم و یەرەمەنە بە سەرۆکو پەژاکی هۊرچنیا و پېسە سەرمەشقو پارتیما دەورش بیەن. جە کۆنگرەو چوارەمینە پېسە "هامسەرۆکو پەژاک"ی هۊرچنیا و بەردەوام بۍ جە ئەوەکۊشای تا ساڵۊو ٢٠١٦ . چا ساڵۍ بەدمایچۆ پېسە ئەندامو 'ئەنجومەنو ڕاوەبەری گلېرگەو دێموکراتیکی و ئازادی ۋەرکۊتوو کوردەسانی (کۆدار)' درێژە بە ۋەرپرسیاری و ئەوەکۊشای ۋێش دان هەتا دما نەفەسو ژیۋایش. هەرپاسە جە سەرهۊردای شۆڕشو ژەنی، ژیۋای، ئازادینە قارەمانانە جە چالاکییەکا ئۊروپاینە بەردەوام بۍ جە ئەوەکۊشای."
جە بەشێوەتەرو ئەرەیاۋناکەینە ئاماژە پانەی کریان: "هەڤاڵ حاجی ئەحمەدی گرڎو تەمەنو ۋێش پەی گەلوو چېر دەسەو کوردی تەرخان کەرد و گرڎ هەوڵێوە ۋێش پەی یاوای بە ئازادی و دیموکراسی گەلەکەیش تەرخان کەرد، بە سۆز و ڕێزدارییوە بەردەوام ویرش لاو گەلەکەیشۆ بۍ و بە چالاکییە سەرەمڕەکاش ئا سۆزو هەستەشە وزۍ بوارو جابەجێکەردەیۆ. بێ گومان بیەیش پېسە سەرۆکو پەژاکی دەورێوە کاراش بۍ جە گەشەکەردەی و لوای وەڵێوەو پارتیما. کەسایەتیۍ ئیلهامبەخشش بۍ بە تایبەتی دلۍ پەژاک و هێزەکا گەریلاینە. چی ڕوانگۆ بەبیەو هەڤاڵیما دەسکۊتۍ فرە بەدەس ئاما، و بی بە یۆ جە کۊششکارا ئازادیوازی و دیموکراسیوازانەی کە تاریخ هەمیشە بە ڕێزدارییوە یاڎش مارۆوە. بەڕاسی هەڤاڵ حاجی ئەحمەدی نموونەو کۊششکارێوە گەورەی بۍ تا دما نەفەسش خجڵو کار ئەوەکۊشای بۍ. پۊکەی پەی هەمیشەی جە تاریخو ئەوەکۊشایمانە بە زیڼەیی مەنۆوە.
ئێمە پېسە پارتو ژیۋای ئازادی کوردەسانی (پەژاک) جارێوەتەر بۊنەو کۆچی حەقەتینو هەڤاڵیماوە سەرەوەشی ۋێما ئاراسەو ڕابەر ئاپۆی و بنەیانەو گەشمەرڎا، ئەنداماو پارتیما و گەلوو کوردی مکەرمۍ و بە گرڎو هەرەکەتیماوە جە وەڵێوستەی ئەوەکۊشای ئازادیی گەلەکەیما، سەرو ئا ڕێبازەی کە هەڤاڵ حاجی ئەحمەدی بە هێزۆ دەسش پنەکەردەبۍ بەردەوامۍ بیمۍ جە ئەوەکۊشای هەتا بەدیئاوردەی ئازادی گەلەکەیما. هەرپاسە پابەندبیەی بە ڕێبازو ئەوەکۊشای هەڤاڵیما واوەی مکەرمېوە. ڕاو ئاڎی ڕاو ئازادی بۍ، هوتافەو ئاڎیی پابەندبیەی و وەفاڎاری بۍ بە گەلەکەیما تا دما هەناسەش. پۊکەی داوا جە گەلەکەیما و ئازادیوازا مکەرمۍ کە لایەق بە ئەوەکۊشای سەرەمڕەو هەڤاڵ حاجی ئەحمەدی با و بەڕێزدارییوە یاڎش بکەرمېوە و پېوەرە پەی بەدیئاوردەی ئازادی گەلەکەیما و بەدیئاوردەی خیاڵەکا هەڤاڵ حاجی بە شێوێوە ڕاس درێژە بە ئەوەکۊشای بڎەیمۍ. هەڤاڵ حاجی ئەحمەدی پەی هەمیشەی جە دڵمانە بە زیڼەیی مەنۊوە و قەول مڎەیمۍ ڕێبازەکەش پەڕ ڕێوگار بۆ."
