پارتوو ژیۋای ئازاڎیی کوردسانی پەژاک جە کەشە سەرکەشەکا کوردسانینە حۆتەمین کۆنگرەو وێش بە دووشمەو( بە فەلسەفەو ژەنی ژیوای ئازاڎیی، کوردسانی ئازاڎ مکەرمۍ و نەتەوەوو دیموکراتیکی ئاواکەرمێ بریا راوە.
پەژاک جە ویسەمین ساڵەو مۆبارزەو وێشەنە حۆت کۆنگرێو کۆنفرانسێوەش بەردێنۍ راوەو و پی جۆرە تاوانش فەرهەنگوو دیموکراسی و ئازوو گۆز"ئاڵو گۆڕ" کەردەی ئەرکو وەرپرسیاریەتی دلێ وێشەنە وەشکەرۆنە. پەژاک جە حۆتەمین کۆنگرەشەنە سیاسەتوو کوردسانیش جە هەر چوار پارچەنە تاوتوێ کەردوو بە پاو ئا دەرفەتا کە جە هەرێمەکەنە هەنێ و ئازوو گۆزە سیاسیا کە کریانێ سیاسەتوو وەرکەوتوو کوردسانی و ئێرانینە؛ بە تایبەت جە دماو شۆڕشوو ژەنی ژیوای ئازاڎیی وست وەروو باسی و بە وردی دەسش نیا سەرو ئا نوقتە ئەرێنیا ئی شۆڕشیەو ئا عەواموو جەمیە کە جە گلێرگەو وەرکەوتوو کوردسانی هەر باسە ئا یۆگێریە کە دلۍ گەلاو ئێرانینە وەش بیەن. هەر پاسە بە تێرو تەسەلی باسوو کۆسپەکا و کەموو کوڕیەکا چوار ساڵی وەڵینوو پەژاکیش شی کەردێوەو و ڕەخنە و وێش کەرد و حۊڵشدا ئا کەلەبەرێ کە وەشێ بیێنێ پەڕێشا بکەرۆوە.
چی کۆنگرەنە باس سەرو پارادایموو ئازاڎیی ژەنێ و جەنگ دژوو هزرو پیاسالاری کریا، باس چا دەرفەتا کریا کە بە شۆڕشوو ژەنی ژیوای ئازاڎیی پەی فراوان کەردەی مۆبارزەی وەشێ بیێنێ. رەخنەو ئانەیش جە وێش گێرت گەر خاستەر وێش ئاماڎە کەردێ جە سەرو بەروو شۆڕشوو ژەنی ژیۋای ئازاڎینە تاوێ هەنگامێ خاسێ بنیۆنە و سەرمەشقی شۆڕشەکەیش کەردێ. بەڵام بە مەڵامەتوو ئا کەموو کوڕیاوە کە بێنێ نەتاواش پا جۆرە کە پەنەوازەن جڵەوە و جمیەروو ژەنی ژیۋای ئازاڎی گێرۆنە دەس.
هەر پاسە چی کۆنگرەنە بە بەشداریە کاراو جواناو ژەنا رەنگێ تایبەت دریا بە کۆنگرەکەی، گلێرگەو کوردسانی و ئێرانی گلێرگەیۍ زەریفا، پەوکی وەرچەم گێڕتەی جواناو رێکوستەیشا، هەر پاسە سەرمەشقایەتی جوانا جە شۆڕشەنە گرنگاو زەروورا. جوانەکێ ئاینڎەو نیشتمانینێ و ئەشۆ نەخشۍ کاراشا جە قەرار دای و بە جا ئاردەی راسپاردەکاو کۆنگرەینە بۆ.
پا جۆرە کە مزانمێ گرفتوو ژیۋگەی مژاری جیهانین و بێ چارەسەر کەردەی ئی گرفتیە هەسارەکەمانە دەرفەتوو ژیۋایش جە دەس مشۆ. یۆ جە مەڵامەتو تێکشیەی سیستەموو سەرمایەدارین کە جە وەرکەوتو میامینینە جە راو دەوڵەت- نەتەوەیۆ ملۆ راوە. دەوڵەتوو ئەرەگیروو ئێرانی جە راو مافیایەکەیشۆ هەر پاسە خراپ ئیدارە داو ژیۋگەیۆ بیەن بە مەڵامەتوو تێکشیەی ژیۋگەی جە گردوو جۆگرافیاو ئێرانینە. جە وەرکەوتەنە سپا سەرو نامێ ئاسایشوو وڵاتی خەریکا ژیۋگەو وەرکەوتی خراپ کەرۆنە. پەژاک کە سەرو بنەماو پارادایموو ئێکۆلۆژی- دیموکراسی ئازاڎیی ژەنێ مەرزیانەرە جە هەنگامە یوەمینەکاشانە مژارو ژیوگەیش کەردەن بە رەوتۍ مۆبارزەی و فەرهەنگوو ژیۋگە پارێزنیش پەرە پنەدا. جە حۆتەمین کۆنگرەو وێشەنە جارێوتەر پەی مۆبارزەی دژوو سیستموو سەرمایەداری و فەرهەنگوو بەکار ئاردەی (مەسرەفگەرایی) سەرو بنەماو پارێزنای ژوگەیرە پاش کوارە.
جە هەمان وەختەنە چی کۆنگرەنە گرینگیش بە کۆششو ئیدیۆلۆژی داو پەی وەشکەردەی گلێرگېوە ئازاڎیی کە تاۆنە سەرو پەیاشۆ مردۆ قەرارش گێرت. ئینەیچ پرسێوە پەروەردەیین کە پەنەوازەن گلێرگە بە هیچ کلووەجۍ پەروەردەو وێش نەڎۆ دەسوو دەوڵەتیوەو پەی پەروەردەیۍ دیموکراتیکی کە گلێرگێوە ئازاڎ بنیاڎ بنیۆ کۆشش مکەرۆ.
چی کۆنگرەنە چارەسەری سیاسیش سەرو بنەماو نەتەوەی دیموکراتیکی جە چوار چێوەو کۆنفدرالیزمو دیموکراتیکینە کەرد بە بنەماو مۆبارەزەیش. هەر پاسە پارێزنای رەوایش بە ئەرکوو دیموکراتکی گلێرگەی زانا.
چی کۆنگرەنە یۆ جە مژارە بنەرەتیەکا ئازاڎیی جەستەیی رابەر ئاپۆی بێ. کۆنگرە جەختش چانەی کەردۆ کە رابەر ئاپۆ تەنیا کەسێوە دلێ زینڎانی نیا، بەڵکو نمایەندەگی پارادایمێ تازەی جە ئاستوو جیهانینە مکەرۆ و بیەن بە سومبولو ملەملانۍ"بەربەرەکانی" چنی سیستەموو سەرمایەداری. جە کوردسانیچنە رابەر ئاپۆ کڕیێڵو چارەسەرین، پەوکی هامڕا چەنی کارزارو ئازاڎیی جەستەیی رابەر ئاپۆی و چارەسەری سیاسی پەرسوو کوردی چی کۆنگرەنە جارێوە تەر جەخت چانەی کریاوە کە هەرمانە پەی ئازاڎیی رابەر ئاپۆی هێقمتەرە کریۆوە.
جە حۆتەمین کۆنگرەنە جە کەشێوە ئاسایینە پسەو یووەم و تاکە پارتوو وەرکەوتی کە سیستموو هامسەرۆکایەتی پەیرەو مکەرۆ هەڤاڵ ئەمیر کەریمی و هەڤاڵە پەیمان ڤیانە پسەو هامسەرۆکا هۆرچنیێ.
جە حۆتەمین کۆنگرەنە بە دەسنیشان کەردەی حەقیقەتوو شۆڕشو ژەنی ژیۋای ئازاڎیی پەی یاوای بە داواکاری دیموکراتیکو گەلاو ئێرانی هامکاری و هامڕایی چەنی گردوو ئازاڎیوازا و رەوتە دیموکراتیکەکا و کوردسانی و ئێرانیچش کەرد بە بنەماو مۆبارێزەیش.
کۆنگرە بە پا کوایرە سەرو داوا کاری گەشمەرڎە سەربەرزەکا پەی یاوای بە ئامانجەکاشا بە یەکدەنگ قەرارش دا کە تا یاوای بە ئازاڎیی کۆشش و وێشا هێقمتەر مکەرانێوە.
