ئەنڎاموو کۆمیتەو ڕاوەبەری پەکەکەی، موراڎ قەرەیلان، ئەرەیاۋناش، ڕەنگە جە ڕووانی ئاینڎەنە هجوومی ئەرەگیری جە مەتینا، کەش و وەهاری، سەروو خەتەو خاکورک – خنێرەی دەس پنە بکەرۆ و واتش: "قەناعەتما پاسەن کە دوژمن جوابی پێویس ورگێرۊنە."
ئەنڎاموو کۆنسەو ڕاوەبەری پەکەکەی موراڎ قەرەیلان جوابوو پرسیارەکاو ڕادوێنوو دەنگوو گەلیش داوە.بەشی دووەم و دیڎارەکەی ئینەنە.
پەیوەس پا جەنگەی جە ئیساتێنە جە هەرێمەکاو پارێزنای مەدیاینە ملۆڕاوە، چێش ماچدۍ؟ ئاژەو و ئاستوو جەنگەکەی چنینا؟
ئارۆ ئا جەنگ و مدرامانەی زاپ و ئاڤاشین و مەتینانە قۆمیۆ، جە تاریخوو کوردسانی و تاریخوو جەنگی جیهانینە نموونەش نەبیەن. ئیساتۍ ئا مدرامانەی جە کەش و گەشمەرڎە مونزوری سەر بە کەش و ئێف ئێم، جە کەش و جودی، کەش و ئامێدی ئەنجام مڎریۆ، پاش وستەن ساڵەی یەرەمۆ. ئی مدرامانە جە هەرێمەکاو پارێزنای مەدیاین، واتە جە مەنتیقەو حەفتانینیوە تا خواکورک جە شێوەو جەنگێوەنە ملۊڕاوە. دەوڵەتوو تورکی جە ئەساسەنە گەرەکشا بە وەشکەردەی مەنتیقەی ئارامی زەمینە ستراتیجییەکا پانیشتوو کوردسانی ئەرەگیر بکەرۆ. حەرپاسە گەریلا مدرامانۍ تاریخی دژوو ئی حۊڵەیە ڕاوەبەر مکەرۆ. ئی مدرامانە ٤ ساڵێن بەردەواما و بەتایبەتی ٣ ساڵێن سەروو بناغەو مدرامانوو مەڕەکا، جە ڕاو تیمە نیمچە گێڵیارەکاوە جە مێڎانەکا جەنگینە جە زاپ و مەتینا و ئاڤاشین بەردەواما. ئینە مدرامانێوە تاریخیا و جە چوارچێوەو ئی مدرامانەینە ئی چوار هەرێمەی نامێم ئاردۍ، ئامێنۍ وەڵۍ. پېسە ئاماژەما پنەدا، ئی جەنگە ئیساتۍ پاش نیان ساڵەی یەرەمۆ. جە تاریخوو جەنگوو کوردانە تولانیتەرین و تاریخیتەرین مدرامان مدرامانوو قەڵاو دمدمین. مدرامانوو قەڵاو دمدمی ساڵێوە زیاتەر درێژەش کێشان، جەنگەکۍ بەشێوەی نابەردەوام و پچڕ پچڕ قەومیێنۍ. هەڵبەت چەکەکۍ ئیساتێچ پېسە هینەکاو ئەوسای نیەنۍ. پۊکەی ماچمۍ ئارۆ قۊمیا، ئا مدرامانەی ڕابەرایەتی مکریۆجە تاریخوو کوردانە یووەم جارا و وەڵتەر مدرامانێوە پا جۆرە نەکریان. ئی مدرامانە جە ڕوو تاریخوو مرۆڤایەتیچۆ، گوزارشتا جە چێوۍ تازەی. سوپایۍ گۆرۍ خاوەن چەک و تەکنۆلۆجیای وەڵێکۊتە و مۆدێرن، مردان و جە ۋەرا ۋەرشەنە مدرامان مکریۆ. ئینە نائاساییا. ڕاسا مەتاومۍ ئی مدرامانەیە نیشانەو ڕای گرڎیی جیهانی بڎەیمۍ. تەنانەت نیشانەو گرڎوو کوردسانیچش مەڎەیمۍ. بەڵێ، ڕەنگە حۆڵێوە چاپەمەنی ئازاڎ بۆ، من ڕێز جە ڕەنج و حۆڵوو ئاڎیشا مگێروو. حۊڵێوە ئێژا مڎا. بەڵام داخەم مەشۆ نەتاوانما ئی مدرامانەیە بە ڕای گرڎینی بشناسمۍ.
دووۍ ڕەهەندۍ تەریچ هەنۍ. یووەم، ڕێبازو جەنگەکەین، چنی یەرۍ ساڵێن بەردەواما و دووەم سوپای گۆرۍ ناتۆی وەقفش پنەکریان- ئینە ڕەهەندی هەرە سەرنج کێشا. دووەم، چۍ چەکی قەڎەغەکریا بەکارمۍ. چەکی کیماویی، چەکی ئەتۆمی تاکتیکی و گرڎ جۆرە چەکێوە قەڎەغەکریا بەکارمۍ. تەماشەکەردۍ، ئیساتۍ بەمەڵامەتوو کەمی وەختیۆ مەتاوو بە فراوانی بە وردی ڕۊشن بکەرووە، بەڵام وەختارۍ ڕووانە شۊنیرە لووات پەی وەڵۍ کۊتەیەکا ئا مێڎانا مکریۆ، ئی حەقەتینە بە ڕۊشنی بەرگنۆ. پەی نموونەی جە ڕووێنە لاو کەمیۆ ٩-١٠ جارا بە شێوازی جیاواز هجووم مکریۆ سەروو کەش و گەشمەرڎە مونزوری. واتە بۆردومانی بەردەوام هەن. ئایا گەلەکەما جە کوردسان یان ئەوروپانە هەست مکەرۆ جەنگێوە هەمیشەیی ٢٤ سەعاتی جە کەش و گەشمەرڎە مونزورینە هەن؟ نا، گەلەکەما ماچۆ "هەڤاڵا مدرامان مکەرا" بەڵام چنی مدرامان مکەرا! تەنانەت بڕۍ جە هەڤاڵاما ماچا "دوژمن هەڵای دەسش پێنەنەکەردەن، ئامادەکاری مکەرۆ پەی هجوومکەردەی سەروو مەتینای". بەڵام ئێژاتەرین جەنگ جە مەنتیقەو ۋەرکەوتوو زاپی و گەشمەرڎە دەلیلو ۋەرنیشتوو زاپینە بەردەواما. جە تاریخەنە ئینسان دەگمەن جەنگی چانەش چەم پنەکۆتەن. مەسەلەن تۆ موینی، جە هەمان ڕۊنە پەی ماوەو چنڎین سەعاتا گازی کیماویی سەروو کەشێوەرە وارنۆ؛ بۆمبی ئەتۆمی تاکتیکی بەکارمۍ، سەرەمڕە تۆبۋاران مکەرۆ، بە درۆن تەقەمەنی وزۊرە واری، بە فڕۆکەی جەنگی بۆردوومان مکریۆ. واتە جە میانوو هەمان ڕۊینە گرڎ جۆرە چەکێوە ۋەرا ۋەر پی مێڎانا بەکاربەرۆ. زاپەنە پی جۆرە جەنگێوە بەقوەت بەردەواما.
ئیساتۍ ئا جەنگەی سەروو بناغەو جەنگوو تیمە پسپۆڕەکا سەروو زەمینی و دلۍ مەڕەکانە ئەنجام مڎریۆ، پەڕێوە تازەن جە تاریخوو جەنگینە پەڕێوە تازەش کەردەنۆ. بەڵام ئێمە گرڎ کەسێما چی حەقەتینەیە نەیاونانەنە. بێ گومان گەریلاکاو ئازاڎیی کوردسانی جگە چی شێوازە تاکتیکییا، چا بە ڕۆحی فیداکاریۆ داستانشا خوڵقنان، غیرەتوو ئازایی کناچە و کوڕە گەنجا کوردسانی بۆ بە مژاروو ڕۆمانی. ئینسان هەرچی واچۆ، ئی مدرامانەیە شرۆڤە بکەرۆ. جەنگوو ئیرادەیا و دلێچشەنە ئایدۆلۆجیا و ئازایی هەن، حەرپاسە وەڵێکۊتەو هونەری جەنگی شیاوو باسیا. هەردووە تێکەکە دلۍ ئی جەنگەینە هەنۍ. ۋێش ئەگەر پاسە نەبۆ، ٤ ڕووێچ تواناو مدرامانی مەبۆ. کێ متاوۆ ۋەرا ۋەروو ئی کیمیاویی و بۆردوومان و تۆز و دووکەڵەیە پەی ماوەو یەرۍ ساڵا مدرامان بکەرۆ! ئینە چێوۍ تازەن جیهانەنە. چۍ ئیرادێوە هەن. چی جەنگەنە موینیۆ، ئیرادەو ئینسانی متاوۆ چێش بکەرۆ. بێگومان چێوۍ تەریچ فرێنۍ، بەڵام گرڎ کەسێ بە عالی چی حەقەتینەیە نەیاوانەنە. چی نوقتێنە کێشەو یاوناینەیما هەن. مەتاومۍ بە عالی گوزارشت جە ۋێما بکەرمۍ.
بە پوختی گەریلاکانو ئازاڎیی کوردسانی پا مدرامانەی کە ئارۆ جە هەرێمەکاو پارێزنای مەدیای و سەرنیشتوو کوردسانی ئەنجامش مڎا، پا ئیرادەیەی کە ڕابەرایەتیش مکەرا، پا فیداکارییەی وەڵێشا وستەن، پا غیرەت و چنەئاماییەی هەنشا سەلەمنانشا کە هێزی جە بن نامێنۍ. سەرەڕاو چەکی قەڎەغەکریای، ئنڎە چەک بەکار مۍ، سەرەڕاو ئانەی کە دەیان هەزار سەروازۍ و سیخوڕۍ و چەتۍ چی جەنگەنە بەشدارێنۍ، ئا ئەنجامەی کە بەدەسئامان بە دڵنیاییوە هێزی جە بن ناماو گەریلاکا ئازادیی کوردسانی نیشانەش مڎۆ. بەڵام جە هەمان وەختەنە سەلەمنۆش کە ئیرادەو ئینسانی متاوۆ چێش بکەرۆ.
چێگەنە چێوی هەرە گرنگ ئانەنە: ئێمە ڕووبەڕوو دوژمنێوە پیلانگێڵنی و دووە ڕووینمۍ. سەرەراو گرڎوو دەرفەتە مادییەکاو ۋەروودەسیش، ئا گرڎ چەک و سیخوڕ و لایەنگرەی، چنیچش بیەو چەتە کوردەکا، کەچی ترسنۆکانە چەکی قەڎەغەکریا ۋەرا ۋەر بە گەریلاکا ئازادیی کوردسانی بەکارمارۆ.
بەتایبەت چی حەفتەو ئاخیرینە،دوژمن گرڎ ڕووۍ کەش و گەشمەرڎە مونزوری (کەش و ئێف ئێم)ی بە چەکی قەڎەغەکریا و گازی کیماۋیی کەردەن ئامانج. جار جار ئەوەتەقای ئێژا وەش مکەرا و ژەعر وەڵا مکەراوە. ئینەیچ پېسەنە ئەتۆمی تاکتیکیی. هەڤاڵاما دژوو ئینەی مدرامان مکەرا.
پەی نموونەی، جە مەڕەکا سیداینە هەڤاڵەکێما بە تەنیا جەنگ مکەرا و تاریخ منویساوە. چارەنوویسوو ئا هەڤاڵا هەرچیۍ بۆ ، غیرەت و ئازایی ۋێشا سەلەمنان. ئاڎۍ بەسەرە مدرامانوو قەڵاو دمدمیشا ۋییەرنا. دوژمن گرڎ جۆرە چەکێوە دژوو ئاڎیشا بەکارمارۆ. چی دماییانە عێراق پاسەوانی سنووری ۋێش کە هێزەکاو پەدەکەیچش ئینۍ چنە ئاردۍ نزیکوو ئا شۊنۍ. ئاڎۍ چا یارمەتی دەوڵەتوو تورکی مڎا. داخەم مەشۆ دەوڵەتوو تورکی چەکی کیمیاوی دژو ئا گەریلا قارەمانا بەکارمارۆ، تەنانەت ئەگەر ئاڎۍ بەشێوێوە ناڕاسەوخۆ دەسشا بۆ چی تاواناو دەوڵەتوو تورکی فاشیستینە، بێگومان بە شێوازی جیاواز هامکاریش مکەرا.
ئیساتۍ دەوڵەتوو تورکی چا یاگانە ئەرەگیرێش کەردێنۍ جە حەفتانین و زاپ، حەرچنڎە نەتاوانش گرڎوو ئا مەنتیقا ئەرەگیر بکەرۆ. چا بنکەی سەروازیش وەش کەردەن. دەوڵەتوو تورکی مەتاوۆ جە دۆڵە و نزماییەکانە مەنۆوە، چونکی جە گەریلای تەرسۆ. چا جۆرە یاگانە ئا هێزۍ کە پنەشا وچیۆ هێزوو پاسەوانی سنووری عێراقی پېسە هامکارەکاش بنەشا پنە وزۆ. پەی نمونەی مەنتیقەکۍ پېسە کەشانە و پیربەلای و شەرانشی جە حەفتانین کە ئا هێزۍ چنەشەنە بنەشا وستێنە، پی جۊرەنە. زاپەنە گەرەکشانە بەهەمان شێوە هێزەکاو پاسەوانوو سنووری عێراقی جە مەنتیقەکا پېسە ڕەنچپراخاینە یاگە گیرۍ بکەرا. هێزەکە ئامانجێوە دیارش هەن. ئاڎیچ یاردیدای دەوڵەتوو تورکین. ئیساتۍ ئەرکشا پنەسپاریان جە هەر شۊنێنە ئیمکانوو هجووم کەردەی بۆ چا وەڵێشا بکەراوە.
جە جەهانەنە ئاژێوە پاسە ئاڵۆز نییا
بێ گومان ئینە نموونێوە تازەن. ڕەنگە هیچ نموونێوەتەر جە جەهانەنە هامشێوەش نەبۆ. بە مەعنێوەتەر تر سوپاو بێگانەی ئامان و خاکەکەیش ئەرەگیر مکەرۆ، ئاڎیچ بە هێزی سەروازی ۋێش پارێزنۆشا، پاسەوانیشا پەی مکەرۆ. ڕەنگە جە جەهانەنە نموونێوە چامنە نەبۆ، یان فرە کەم بۆ. داخەم مەشۆ هێزەکاو پاسەوانوو سنووری عێراقی ئینۍ چی پێگەنە و ۋەرگیری جە سوپاو تورکی مکەرا. حەرپاسە سوپاو تورکی ئا سوپێنە کە خاکوو کوردسانی و عێراقیش ئەرەگیر کەردەن و پەی گرڎ کەسۍ چێوۍ شاراوە نییا. بە پوختی چا ئاژێوە فرە ئاڵۆز هەن.
ئانەی پەی ئێمە گرنگا ئانەنە کە مدرامانێوە تاریخی ئینا ئارانە و ئی مدرامانیچە بەردەواما. کەس جە ۋەرا ۋەروو هجوومەکا دوژمنینە پاشەکشە مەکەرۆ و مدرامان بەرز مکریۆوە. ئەگەر ئی مدرامانە نەبیۍ، ئەرەگیری جە گرڎوو هەرێمەکاو پارێزنای میدیاینە وەڵا کەرێوە، بەڵام پی مدرامانیە ڕاش ۋنە گیریۆ. ئەگەرچی تا حەدێوە گەرەکشا هجوومی ئەرەگیری تازە جە بڕۍ مەنتیقۍ تەرێنە پەرە پنە بڎۆ. جە ڕاسینە جە هەرێموو مەتینای جە ١٦و نیسانی بەدماوە پلانەش هەنە بە شێوازێوە تازە پێگەو ۋێش جە مەنتیقەکەنە فراوانتەر بکەرۆ. حۆڵ مڎۆ جە شۊنە ئەرەگیرکریایەکانە بۍ وەڵۍ. حەرپاسە تەسەور مکریۆ جە چن ڕۊی ئاینڎەنە هجوومەکاشا پەی سەروو مەتینای فراوانتەر بکەرا. بە هەمان شێوە گومان مکریۆ کە هجووم بکەرا سەروو کەش و وەهاری. ڕەنگە هجوومی ئەرەگیری پەی سەروو خەتەو خاکورک-خنێرەیچ بکەرا. ئی ئەگەرۍ ئینۍ ئارانە. مشۆم ئینەی بزانمۍ؛ ئەگەر مدرامانەکۍ یەرە ساڵی ۋییەردەی بەردەوامۍ نەبیێنۍ، دوژمن هجوومی ئەرەگیری فرە ۋەرفراوانتەرۍ ئەنجام دۍ. ئەگەر چی شۊنە تازایچەنە بە هەمان شێوە مدرامان بەرز بکریۆوە، زیاتەر جە جەنگەکەنە گیرواردۍ با. ئێمە قەناعەتما پاسەن کە دوژمن جوابی پێویس ورگێرۆ جا جە مەتینانە بۆ، کەش و وەهارینە بۆ یان خنێرەنە. مدرامانوو ئا شۊنا تەمامکەروو مدرامانی گرڎینی بەقوتتەر مکەرۆ و پی جۊرەیچە تەوقەو دوژمنی جە هەرێمەکاو پارێزنای میدیاینە قووڵتەر ميۊوە. پۊکەی ئێمە قەناعەتما چانەن کە مدرامان بەرەو قۆناغێوە فرە تازەتەر، وەر وەڵاتەر و بەقوەتتەر ملۆ.
بەپاو ئا زانیارییا دەس وزیێنۍ، بەکڕێگرتەکا سەرنیشتوو کوردسانی مارانۍ پەی بەرەکا جەنگ. پېسە هەپەگەی شمەیچ سەبارەت پا مەسەلۍ ئەرەیاۋنایێتا وەڵا کەردۆ، بەڵام وچیۆ فاڕایۆکۍ بەردەوامێنۍ. چی دماییانە کرێگرتێوە کوشیا. چی بارۆ چێش ماچدۍ؟
پېسە وەڵتەر باسما کەرد؛ دەوڵەتوو تورکی بەتەنیا مەتاوۆ جەنگوو گەریلای بکەرۆ، کارێوە قورسا. هەر پۊکەی شۊنەو کەسانێوەرە گێڵۆ کە جەنگش پەی بکەراو مرا. ئیساتۍ پانیشتەنە چی بوارەنە کار مکەرا. سەرنیشتیچەنە هەمان حۊڵشا هەن. جە سەرنیشتوو کوردشانینە جاشۍ بەکار مارا. ئی جاشۍ جە ڕوو یاساییوە پابەنڎێنۍ بە ۋەرگریکەردەی جە دەگایەکاشا. جە حەقیقەتەنە نامێشا دەگا پارێزنێنۍ. بەڵام سوپاو تورکی یاگۍ سەروازە وەڵێکۊتەکاشەنە بەکارشا مارۆ پېسە بەشێوە جە سوپۍ مشناسۊشا. حەرچنە یاساکۍ پېسە جارانینە، وزاشا وەڵێوە و ناچارشا مکەرۆ هجووم بکەرا سەروو ئا ئامانجەی کە گەرەکشا. تەماشە بکەردۍ؛ ئیساتۍ تەنیا جە شۊنەکا پېسە بۆتانی و گەڤەرینە نمارۊشا. بەڵکم گەرەکشا جە گرڎ مەنتیقێوە سەرنیشتوو کوردسانیوە جاشۍ پەی پانیشتوو کوردسانی بارۊنە و چنی ئێمە جەنگشا پنەبکەرا. جە حەقیقەتەنە چن ساڵێوەن ئا هەرمانۍ مکەرۆ، بەڵام ئێساڵ فرە زیاتەر جەختش سەروو ئا کاریە کەردەنۆ، ۋەروو ئانەی سەروازەکێش جە جەنگەنە ڕووبەڕوو قۆرتۍ باوە.
پی کارا دیسان گەرەکشا کوردی چنی کوردی تووشوو جەنگی بکەرۆ. پەی نموونەی ئیساتۍ جە چەولیک و سێرت و مێردین و هتد جاشێشا ئاردێنۍ. جە مەتینا، زاپ، حەفتانینەنە بنەش پنە وستێنۍ و جەنگشا پنە مکەرۆ. هەر پۊکەی ئێمە پېسە هەپەگەی بانگەوازیما کەرد. دیارا دوژمن گەرەکشا جەنگەکەی بکەرۆ بە جەنگوو کوردا. گەرەکشا کورد بە دەسوو کوردی شکس بارۆ. بە هیچ جۆرۍ گەرەکش نیا سەروازەکێش مرانە. جە ئیساتێنە بە تەکنەلۆجیا جەنگ مکەرۆ و بڕۍ سەروازێش بەکرێ گرتێنۍ و زەڕشا مڎۆ پنە، بەڵام گەرەکشانە "کوردی" بکێشا دلۍ جەنگەکەیۆ. چێگەنە دیما؛ سەرەتا حۊڵشا دا سەروازە عێراقییەکا بەکار بارا و ڕاسەوخۆ وزاشا دلۍ جەنگیۆ. بەهەمان شێوە حۆلی فرەشا دان پێشمەرگە بەشداری جەنگی ڕاسەوخۆی چنی ئێمە بکەرا و بەردەوامیچ حۊڵش پەی مڎا. بێگومان تا چن سەرکەوتەن چی بوارەنە مژارێوە تەرا ، بەڵام حۊڵەکێش پی ئاراستەرە درێژەشا هەن. ئیساتۍ زیاتەر گەرەکشا کرێگرتۍ بەکاربارۆنە.
سوپا کرێگرتەکا وزۆنە خەتەو وەلۍ جەنگەکەی. پەی نمونەی مارۊشا پەی مەتینای و سەروو کەشەکاوە ئەرەنیشتێشا مەکەرۆ. نا، گەرەکشا جاشەکۍ بلا ئا شۊنە مەترسیڎارۍ کە ۋێش مەتاوۆ چا مەنۆوە. ئەجۊم ساڵەو پاری بۍ، ڕستێوەم چا بارۆ بەکارئاورد، بەڵام ڕۆنامەکۍ سانسۆرشا کەرد. بەڵام ئینە حەقەتینێوە کوردسانیا. ئیساتۍ دەوڵەتوو تورکی گەرەکشا کورد بەدەسوو کوردی شکس بارۆ. کەسێوە کە پېسە ۋێش هۊرسەنگنای پەی ئاژەکەی بکەرۆ متاوۆ ئا ۋێنەیە بوینۆ کە پەی چی هەڵای گەلو کوردی بە چێردەسەیی ژیۋای مکەرۆ. تۆ چ کارێوەت هەن جە بینگولۆ مەی و مەتینانە جەنگ مکەری؟ ئایا تۆ پارێزنەروو دەگۍ نیەنی؟ جە ڕوو یاساییوە مشۆم ۋەرگیری جە دەگاکێت بکەری. چێگە چێش مکەری و شۊنەو چێشیرە گێڵی؟ ئیساتۍ ئانەی جە سێرتۆ ئامان کوشیان، چنی مەردەن؟ چونکی وستەنشا وەڵۍ وەڵیوە. سەروازەکۍ مەتاوا ۋێشا بەیا وەڵۍ، پۊکەی کرێگرتەکا مارا و وزۆشا خەتەو وەڵۍ. جە ڕاسینە ئا ڕستە کە سانسۆر کریان چێش بۍ؟ من واتەبێم "کوردێ پەی ئافەرینێوە متاوۆ ٧ تەنەکە پیسی ئینسانی بووەرۆ". بە مەعنێوەتەر ئەگەر دوژمن بە "کوردێوە" واچۆ، "ئافەرین تۆ فرە بەهرەمەند، فرە ئازا، فرە بەقوەتەنی" و پېسە نیشانۍ دەسوەشی دەس مازیشەرە مارۆ، متاوۆ ئا کەسە (کورد)ە بە هەر شۊنۍ و ئامانجێ کە گەرەکش بۆ ئاراسەش بکەرۆ) ئینە ڕاسییەکەن. پاسە بزانوو پی جۆرە ئی کەسێشا بەکار ئاردێنۍ.بە دڵنیاییوە واتەنشا: تۆ پیێوە بەتوانا و ئازانی" و دەسشا ئاردەن مازیشەرە. ئاڎیچ لووان خەتەو وەڵۍ جەنگی و پی جۆرە ۋێش دان کوشتەی، ڕاسی مشۊم چا کارا ۋێشا دوور دارا.
واوەی بانگەواز ئاراسەو گرڎوو بەکرێگرتەکا کریا
واوەی داوا جە گرڎوو بەکرێگرتەکا مکەروو. ئەگەر دەگاکێتەنە مەنیۆ کەس هجووم مەکەرۆ سەرت. وەڵتەر ئینەما واتەن. ئێمە مزانمۍ ئارۆ گەلەکەما ئینا چ ئاژێوەنە. حەرپاسە مزانمۍ پاسەوانوو دەگایەکا چنی بیێنۍ بەبەکرێگرتۍ. هەر پۊکەی ئێمە کرێگرتا مەکەرمۍ ئامانج. جە سەرنیشت یان پانیش مەبۆ دژوو ئێمە بەشداری هجوومەکا بکەرا، مەبۆ جە خەتەو وەڵێوە سوپێنە با. شمە جە سەرنیش نەمردێندۍ و مەیدۍ پانیشت و جەنگ چنی ئێمە مکەردۍ. ئینە قبوڵکریا نییا. ئینە جەنگوو کورد چنی کوردیا. ئا قارەمانۍ چا مدرامان مکەرا، ڕۆڵۍ ئی گەلەینۍ. ئی گەنجە فیدایۍ و بەبێ هیچ چەمەڕاییۍ گیانشا پەی گەلەکەیشا بەخشا. پەی چی چنی ئەم فیداییا کە پەی پارێزنای گەلەکەیشا کۊشیای مکەرا جەنگ مکەردۍ؟ ئایا گوناح نییا؟ ئایا ئینە زوڵمێوە گەورە نییا؟ کەواتە پەی چێشی بەشداری جەنگی چنی ئێمە مکەردۍ، مەبۆ بەشدارۍ جەنگی بیدۍ جە پانیشتوو ۋەرنیشتەنە. ئینە داواو منەنە پەی گرڎوو پارێزنەراو دەگایەکا.
حەرپاسە داوام پەی کۆچەر و بنەیانەو کرێگرتەکا. هیچ بنەیانە و خانەدانێوە، هیچ عەشیرەتێوە مەبۆ ڕا بڎا کرێگرتێوە پەیوەس بە وێشا بێنە پانیشت یان پەی جەنگ کەردەی چنی گەریلاکا ڕووە بکەرۆ کەشەکا، ئاڎۍ مشۆم دژایەتی ئینەی بکەرا. بە تایبەتی داوا جە بنەیانەکا مکەروو. داواو من پەی هامسەرا بەکرێگرتەکانە و زەنا کوردین. ژەنی پېسە پیایا نەتلیێنۍ چۊوە. بەڵکم پیا لووان سەروازی، لووا ۋەننگە و جە فرەو ڕوواوە چنی دەوڵەتی تلیان چۆوە. ژەنی پا جۊرە نیەنە. پاک و تەمیز مەنێنۆ، پۊکەی مشۆم ژەناو یانەی ناڕەزایی نیشانە بڎا. مشۊم کوڕ و کناچێشا ناڕەزایی برمانا. پێویسا واچا ئێمە سەروو ۋنەو قارەمانا ژیۋای قبوڵ مەکەرمۍ. پێویسا واچا: ئێمە گەرەکما نیا پا زەڕەی کە جە متەی ۋنەو کوردانە بە دەس ئامان بژیومۍ. ۋەرا ۋەر پی خیانەتەیە مشۊم جە بنەیانەکانە هەڵوێس سەر هۆربڎۆ. ئێمە جمیەرێوە کۆمەڵایەتیێنمۍ. پۊکەی پێویسا ئی پرسە دلۍ بنەیانەکایچەنە جەنگش چنی بکریۆ. کۊشیای ژەنا مشۊم کۊشیای گەنجا بۆ. کوڕۍ گەنجۍ و ژەنی مشۊم چی بوارەنە دەس بە کۊشیای بکەرا. چی جە سەرنیشت مەمەندۍ و ملدۍ پەی پانیشتوو کوردسانی و جەنگ چنی گەریلای مکەردۍ؟ پێویسا گلێرگەکەما جە ۋەرا ۋەروو ئا مەسەلێنە ڕەنگوەدای و کاروەدای نیشانە بڎۆ. خێڵ، عەشیرەت و بنەیانەکۍ مشۊم کاروەدای نیشانە بڎا. مشۊم پی جۆرە فشاری کۆمەڵایەتی وەش بکەرمۍ. مشۊم بزاندۍ دەوڵەتوو فاشیستی تورکی گەرەکشا کوردی بە دەسوو کوردی بڎۆ کوشتەی و بە متەی ۋنەو کوردی بە دەسوو کوردی گەرەکشانە شکس بە کۆشیای کوردا بارانە، مشۊم ئێمە دژوو ئا پیلانا مردمێوە و ئی گەمەیە هۊرشێونمێوە. پێویسا گرڎوو وڵاتپارێزنا و ئانۍ کە ڕوانگەو کوردسانی بیەیشا هەن، ۋەرا ۋەر پی گەما بێدەنگ نەمەنا و کاروەدای نیشانە بڎا.
