قسەکەرەو کۆمیتەو پەروەردەو کۆنگرەو ستاری گولستان گولۆوە ئاماژەش پانەیە دا سەیەو خەباتی پەرەوەردەییوە، ژەنی ئاستوو ڕاوەبەردەینە یاگێ وێش گێرتێنە و واتش: "ئارۆنە بە هەزاران ژەنێ گردوو مەیدانەکاو هەرمانێنە هەنێ و هەرمانەی قورسە مکەرانێ."
کۆنگرەو ستاری سەرانسەروو سەرنیشت و وەرکەوتوو سوریاینە وێش ڕێک وستەن و بە هەرمانەکاش هێز مدۆنە بە ژەنا، یۆ چا هەرمانایچە پەرەوەردەکەردەی ژەنان. پێوەس بە هەرمانەو پەرەوەردەکەرەی ژەناوە گولستان گولۆوە پەی ئاژانسوو هەواڵوو فورات (ANF)ی واتش.
ئەوەڵوو قسەکاشنە گولستان گولۆوە باسوو ئا زیهنێتە سەپیایشە کەرد، کە سەروو گلێرگەیوە هەن و چە کاریگەریێوەش سەر نیانرە و پێسە بەرەدەوامە ببیە: "سەروو ژەنا و گەلاو وەرکەوتوو دلێڕاسەیوە چندین سیاسەتێ پیسێ مکریانێ و ئینە پاسەش بە ژەنا کەردەن جە گلێرگەی و زانستی و زانایی دوورێ بگناوە. کۆنگرەو ستاری پەی ئازادیی ژەنێ دژوو ئی سیاسەتاوە خەبات مکەرۆ. خەباتێوی بنەڕەتی، کۆنگرەوستار ڕاوەبەردەیی پەرەوەردەو ژەنان. خەباتوو ژەنێ و خەباتوو پەرەوەردەکەردەین گردوو شار، مەنتێقە، شارەکڵە و دەگایەکانە مەرزیانەرە."
گرد یاگێونە خەباتوو پەرەوەردەی مکریۆ
گولستان گولۆوە قسەکاشنە باسوو ئا سیستمە پەرەوەردەییەیشە کەرد، کە مکریۆنە و واتش: "جە سیستموو پەرەوەردەو گلێرگەیوە دەس پنە مکەرمێ. پاسەیچ گرووپەکا مەرزنمێرە و خەباتەکاو گەلی بە بنەما مگێرمێ. دماتەر کۆمیتەکێما گردوو یاگەکانە هەرمانەکا مکەرا. خەباتوو پەرەوەردەی چا مەیدانانە مکەرانێوە و پەی ماوەو دووێ حەفتا بەردەوام مبۆنێ. بە شێوێوی سەرەکی چی خەباتە پەرەوەردەییەنە گەل پەرەوەردە مکریۆ، لایێوی تەرۆ پێسەو هەنگامەی دووەمێ ئەکادیمییەکێچ بەشداریی پەروەردەدەکەردەیەکا مکەرانێ."
ئێساڵ ئەکادیمیاییوی پسۆڕی کریاوە
بەردەوامیی قسەکاشنە گولستان گولۆوە باسوو ئانەیش کەرد ئەکادیمیاکانە سیستموو پەرەوەردەی بە شێویوی وەرفراوانتەر مکریانێ و واتش: " گردوو کانتۆنەکانە ئەکادیمیا هەن. پێسەیچ نزیکەو ساڵێوا ئەکادیمیایی پسپۆڕیی گەشمەردە زەینەب سارۆخانێ کریانۆ. چی ئەکادیمیانە فێروازێ سەبارەت بە بابەتێوی تایبەتی پەروەردە مکریانێ. ئەکادیمیاکانە وانەو چاندی و ئەخلاقی، حەقیقەتوو ڕابەرێتی، پاریزنای، زایەندی پەرسی، تاریخوو ژەنێ و کوردستان و گردوو ئا وانا مونیا، کە لکیدریێ ژەنێ و گلێرگەیەنێ."
دەرنجاموو پەرەوەردەکا، کەسێتیی قەوەتوو ژەناش چنە کەوتەنۆ
گولستانە باسش کرد دماو ئانەیە ژەنی بەشدارێ پەرەوەردەکا بانێ، جیاوازیێوی فرە ملوو کەسێتییشارە مێ، و واتش:"پەرەوەردەکانە باسو دەوروو حەقیقەتوو ژەنێ مکەرمێ پەوکای ژەنی دماو تەمامیای پەرەوەردەکەی هەست بە کەسێتیی نەرێیی و جیاوازیی کەسێتی مکەرا. کە دەرنجاموو وێشناسای ژەنا و قەوەتبییەی کەسایەتییشانە. سەیەو ئی ئەم پەرەوەرداوە ئارۆنە ژەنی حاسوو ڕاوەبەردەینە دەور و هەرمانەو وێشا ورمگێرانێ. ژەنی سیستموو هامسەرۆکایەتیینە شناسنامەو وێشا مپارێزنا و سەرمەشقایەتیی خەباتی مکەران دلێ گلێرگەیەنە."
