سەرۆک فراکسیۆنوو دەم پارتی سەزای تەمەلی ئەنجومەنوو نوێنەرانە کۆنگرێوی ڕۆنامەوانییش گێرت و پەرسەکاو ڕۆیش ورسەنگنێ.

ئەوەڵوو قسەکاشنە تەمەلی تیشکەش وستە سەروو کودەتاکەو بۆلیڤیای و باسوو ئانەیشە کەرد، کە چەنی حکومەتینێ و دژوو کودەتای سەروازیینێ.

 درێژەو قسەکاشنە تەمەلی باسوو ئانەیش کەرد، کە تورکیانە ئەشکەنجەی فرە هەن و واتش: "بەتایبەت زینانەکانە ئەشکەنجە هەن، کە دلێشانە ئاستێوی فرە بەرز و جیددینە مافەکاو ئینسانی پاشێلێ مکریا. سەبارەت پی بابەتەیە هیچ هەنگامێوە نەنریێنە و سەرڕاسە نەکریێنۆ. جەمۆبییەیەکەیمانە چەنی وەزارەتوو دادی چندین جارێ ئی بابەتەما باس کەردەن و کەردەنما بە پەرسەو ڕۆی، بەڵام وەزارەتوو دادی هیچ گرنگییش نەدان پەنە، زیندانەکانە ئەشکەنجە هەن، زییندانیێ نەوەشێ، زیندانیێ پیرێ. گردوو ئینیشا پاشێلکەردەی مافەکاو ئینسانین و تورکیانە مکریۆ."

سەرچەمەو دماییئاردەی بە ئەشکەنجەی ئیمراڵیین

ئاخروو قسەکاشنە تەمەلی سەرنجەش وستە سەروو گۆشەگیریی ئیمراڵی و ئاماژەش پانەیە دا، سەرچەمەو بنەڕەتیی گرد کردەوێوی ئەشکەنجەی تورکیانە گۆشەگیریی ئیمراڵیین و پێسە بەردەوام بی: "ماوەو ٢٥ ساڵان گۆشەگیریێوی سەخت سەروو بەڕێز ئۆجالانیرە سەپییان، ئینەیچە گۆشەگیریێوی قورسا جە هیچ یاگێوی تەروو جهیانینە شێوەش نییەن. ئی گۆشگیریکەرەیە بەردەوامییش هەن، وەختێوە بە وەزارەتوو دادی ماچمێ گۆشگیری بەردەواما، ماچۆ 'گۆشەگیری تورکیانە نییەن'. هەڵبەتە ٤٠ مانگێن گۆشەگیری بە شێوێوی قورس هەن، هیچ زانیاریێوە جە بەڕێز ئۆجالانیوە نییەن، بەتەمامی جە گرد جۆرە پەیوەندییوە بڕیانرە، نیگەرانییەکێما بارەو دۆخوو تەندروستییشۆ زیاتەرێ بانە. پەوکای ئەشکەنجەدای چی وەڵاتەنە دا هەن و ڕاو دماییئاردەی  بە ئەشکەنجەیچ بە ئیمراڵیرە مویەرۆنە."

سەزای تەمەلی بانگەوازش پەی جەمۆبییەیەکەو ٢٩و حوزەیرانوو کارتالیی ئەستەنبولی کەرد.