تەڤگەرو ئازادی: "با ١و ئایارینە، مەیدانو کۆشیای گەورەتەر و بە جۆشتەر بکەرمێ، دژو نادادی و پیاسالاری و جیاوازی ڕەگەزی و ھەژاری و بێکاری، کە سیما و تایبەتمەندیی دەوڵەتە ئەرەگیرکەرا و فاشیزمین".
تەڤگەرو ئازادیی بارەو ١و ئایاریوە واتش، ئی ڕوە بەرھەمو ڕەنج و خەباتی ھامبەشو کرێکارا و کۆشەراو ڕاو ئازادی و یەکسانیین سەرتاسەرو جیھانینە، سەرمایەداری وێش سەرو زەوتکەردەی ڕەنجو گەلی و سەرکوتکەردەی ژەنا بنیات نیان، با چی ڕووەنە مەیدانو کۆشیای گەورەتەر و بەجۆشتەر بکەرمێ.
دەسەو ڕاوەبەریی تەڤگەرو ئازادیی گلێرگەو کوردستانی، بارەو ڕۆو جیهانیی کرێکارا ١و ئایاریوە، ئەرەیاوناێوەش وەڵا کەردۆ.
ئەرەیاونایەکەو تەڤگەرو ئازادیینە ئامان، ڕۆو ١و گوڵانی، بەرھەمو ڕەنج و خەباتی ھامبەشو کرێکارا و کۆشەراو ڕاو ئازادی و یەکسانیین سەرتاسەرو جیھانینە، دژو سیستمی چەوسنەرو سەرمایەداری، ئی ڕوە جیھانییە پەی گەلو کوردی و شۆڕشە ئازادییوازەکەیش داراو مانێوە تارێخیێن، گەلو کوردی قوربانیێوی ئا سیستمە چەوسنەر و دەسەڵاتدارییەو جیھانین، ڕۆو ئارۆیچەنە ئا سیستمە، کە گرد چیوێ سەرو زەمینی و چێرو زەمینیش وستەن خزمەتو بەرژەوەندییە قازانجپەرسییەکەیش، سڵ جە ھیچ کردێوە نمەکەرۆوە.
ئاماژەیچشا کەردەن، سەرمایەداری، پایەکاش سەرو زھنیەتی دەسەڵاتوازی، پیاسالاری، قازانجپەرسی و زەوتکەردەی ڕەنجو گەلی و سەرکوتکەردەی ژەنا بنیات نیان.
ئانەیچ وزیان ڕووە، گەلو کوردی و جمیەرە ئازادییبەخشەکەش، وەراوەرو ئا سیستم و زھنیەتەینە سەرمەشقایەتیی کۆشیایێوی ھەمەلایەنەی مکەرۆ، جە ئاستو فیکری و سیستمی و وەرگێریی ڕەواینە، جە مدرامانێوی گەورە و تاریخیینە، یاگێش گێرتێنە و پەی پارێزگاری جە ماف و ئازادییەکا و بەھاکاو گلێرگەی و جیھانێوی خاستەری و ژیواێوی ئازادی، ئینەیچ پەی گەلو کوردی و تەمامو گەلە بندەسا، حەر پەوکای ١ـو ئایاری پەی ئێمەی کوردی ماناو کۆشیای و باوەڕبییەین بە سەرکەوتەی.
دەسەو ڕاوەبەریی تەڤگەرو ئازادیی گلێرگەو کوردستانی واتەنیچش،" با ١ـو ئایارینە، مەیدانو کۆشیای گەورەتەر و بەجۆشتر بکەرمێ، دژو نادادی و پیاسالاری و ھەڵاواردەی ڕەگەزی و ھەژاری و بێکاری، کە سیما و تایبەتمەندیی دەوڵەتە ئەرەگیرکەرا و فاشیزمان".
